Home Turismo Aruba a gana 10 premio cu e campañanan ‘Authentic Aruba’ y ‘MVP:...

Aruba a gana 10 premio cu e campañanan ‘Authentic Aruba’ y ‘MVP: Mmost Valuable Playa’

49
0
SHARE
- Advertisement -

Pa e prestigioso HSMAI Adrian Awards 2019:

ORANJESTAD (AAN) – E siman aki un biaha mas nos isla a destaca den e premiacion anual di Hospitality Sales & Marketing Association International (HSMAI). Den un total di 10 categoria, e campañanan di Aruba a bay cu 4 premio di Oro, 5 di Plata y 1 di Brons. E reconocementonan aki ta merito pa e colaboracion exitoso entre Aruba Tourism Authority (A.T.A.) y e agencia di ‘advertising’ ‘The Concept Farm’.

Desde 1956, HSMAI Adrian Awards ta reconociendo pioneronan creativo y logronan den mercadeo. E premionan HSMAI ta premia e excelencia den mercadeo y publicidad cu criterianan cu ta evalua entre otro e obhetivonan concreto, e strategianan; ehecucion innovativo; y tambe con efectivo esakinan ta.

E categorianan den cual Aruba a destaca ta, entre otro, Web Ad Series, Social Media, Facebook Mobile Video, TV Campaign y Integrated Marketing. Adrian Awards ta representa e mihonan den e mundo di e industria y A.T.A. ta sumamente honra y orguyoso cu e diferente reconocementonan, cual ta refleho di tur e esfuersonan, creatividad y efectividad cu e promocion a trece dilanti.

Consciente di e dependencia grandi di Aruba riba turismo, A.T.A. ta busca pa semper destaca mey mey di tur otro destino den Caribe y na mundo. Aplicando tacticanan progresivo y atractivo, ta logra capta atencion di e biahero y di e biahero potencial. Creatividad ta hunga un papel importante den e contenido y plataforma di entrega.

Di e manera ey tin hopi concepto cu ta strategicamente diseña pa aumenta cantidad di bishita afluente y mas cu claro como tal loke nan ta laga atras den nos economia. Esnan cu a bay cu premio HSMAI Adrian Awards ta ‘Local Stories’ y ‘Papiamento Lessons’ di e campaña ‘Authentic Aruba’; como tambe e concurso ‘Most Valuable Playa.’

E campañanan di publicidad y mercadeo di A.T.A. ta busca pa expone e atributonan mas atractivo di Aruba como destino turistico. Ya ta pa varios aña consecutivo cu Aruba ta entre e destinonan cu cantidad mas halto di e premio HSMAI Adrian Awards. Mayoria di premio ta den e categoria digital y ta un refleho di e presencia solido cu Aruba tin den e plataforma moderno cu awendia ta esun di mas efectivo.

Entrega di premio a tuma luga e siman aki na New York. E cuater premio den categoria ‘Oro’ a haci cu Aruba a ricibi un premio ‘Platina’ cual a percura cu esaki ta e di cuater aña tras di otro cu ta ricibi e distincion prestigioso aki.

CEO di A.T.A., Sra. Ronella Tjin Asjoe Croes a expresa su satisfaccion bisando cu e galardonnan di HSMAI cu Aruba ta ricibi ta suma na e premionan cu A.T.A. a ricibi anterior, cu ta inclui Finalista di Effie, premio dobel di Mobile Marketing Effectiveness y numeroso premio di Travel Weekly Magellan.

“Masha pabien na e ekipo di A.T.A. y nos agencianan socio kende pa medio di nan experticio y dedicacion ta haci di e makinaria integral di mercadeo di Aruba, un di esnan miho na mundo,” asina e ehecutivo di e entidad di maneho y promocion di destino Aruba a laga sa.

- Advertisement -

DUNA COMENTARIO

Please enter your comment!
Please enter your name here