ORANJESTAD (AAN) – Mañan Diasabra scolnan miembro di Aruba Taekwondo Association Aruba, lo bini hunto den Centro Deportivo Frans Figaroa unda lo bataya pa e prome campeonato di aña cu lo bay ta e Campeonato Nacional Dia di Betico 2019. Mester bisa cu e atletanan por participa segun categoria, edad, grado y division.
Lo bay tin exhibicion bou 6 aña minimo faha blanco, Infantil 9 – 11 aña minimo faha blanco, grado y peso Cadet 12 – 14 aña minimo faha blanco Pesahe, Hubenil (Junior) 15 – 17 aña minimo geel Pesahe, Mayor (Senior) 18+ aña minimo faha blanco Pesahe.
Mester bisa cu e ceremonia di apertura lo ta pa 9’or di mainta mientras na final lo haci entrega di e demas premionan. Lo tin premiacion pa Kyorugi den cada categoría 1° lugar – medaya 2° lugar – medaya 3° lugar, lo premia tambe mihor atleta infantil feminino y masculine, Cadet femenino y masculine, Junior, femenino y masculino, Senior femenino y masculino y lo premia tambe e Best Team.
Taekwondo den e ultimo aña nan aki ta den un desaroyo formidabel unda nos atletanan ta presta den gran forma den torneonan local y internacional. Nos ta logrando premionan grandi den exterior unda tin hopi wowo riba e prestacion di nos atletanan. Recientemente e atleta Zahyon Klaber a logra gana e campeonato Hulandes di taekwondo.
Stichting Sportsubsidie Aruba ta contento di por aporta y brinda e ayudo necesario na e federacion di taekwondo pa cu nan prome campeonato nacional y nan calendario di actividad 2019.
