Home General Awor bo por duna un ‘rating’ na servicio di bo docter di...

Awor bo por duna un ‘rating’ na servicio di bo docter di cas

34
0
SHARE
- Advertisement -

AZV a lanza app nobo

ORANJESTAD (AAN): AZV a caba di lanza nan app nobo, na unda usuarionan por baha esaki sea via Google Play of App Store, pa asina duna aseguradonan por ‘rate’ servicio di nan docter di cas. E app aki ta hopi facil pa compronde, e ta na Papiamento y den futuro, AZV lo amplia esaki na otro servicionan medico y por ta otro idiomanan.

Segun Minister di Salubridad, Sr. Dangui Oduber, e app aki ta pa midi servicio cu docternan di cas ta duna na tur asegurado. For di aña pasa nan a anuncia nan intencion di traha e aplicacion aki, haciendo uso di tecnologia y innovacion, y esaki ta cuadra cu e maneho cu nan kier hiba pa loke ta trata salubridad publico.

Minister a indica cu nan momento cu nan a drenta den Gobierno, nan a boga pa trece cambionan, specialmente pa mehora cuido medico y servicio, y e app aki ta un di e decision cu nan a tuma cu lo contribui na un mehoracion di e servicio aki. Pa varios luna e app a wordo desaroya hunto cu e team profesional di IT di AZV, y finalmente nan a logra lanza e app y Minister ta contento cu riba 15 di Januari nan por lanza esaki oficialmente, caminda e aseguradonan ta haya e posibilidad y oportunidad di un rating na servicio cu nan ta experencia durante nan bishita na docter di cas.

Minister Oduber a bisa cu e app aki ta un desaroyo positivo, no mester wordo mira como algo negativo, of como un medio di duna castigo na e docternan di cas, sino mester wordo considera un medio pa nan mehora nan servicio cu nan ta duna na e aseguradonan.

Oduber a agrega cu e presion di comunidad ta hopi grandi, y nan ta tene cuenta cu tur exigencia di poblacion, nan meta ta pa mehora e servicio brinda na pueblo di Aruba, y e tin tur confianza cu e app aki lo contribui pa mehora e servicio aki.

Periodicamente AZV lo haya tur data, na momento cu un asegurado ta rate nan docter, AZV lo revisa esaki, y si cuminsa nota cu cierto docternan tin un rating abao, AZV lo tuma pasonan necesario pa haya sa kico ta pasando y e docter mes lo por duna su banda di medaya. Un biaha mas e mandatario a enfatiza cu e app no ta pa castiga ningun docter, pero nan mester mira esaki como algo positivo. El a indica cu docternan di cas, na principio, no tabata mucho di acuerdo cu e introduccion di e aplicacion aki, pero apesar di diferencia di opinion, gobierno ta kere cu esaki ta un medida positivo pa un mehoracion di e experiencia, mehoracion di e servicio, haciendo uso di tecnologia. E rating ta completamente anonimo, kiermen cu docter di cas no lo haya sa cua pashent a duna nan un bon of mal rating.

AZV lo haya un bista cua ta e docternan di cas cu tin un bon rating of esnan cu no tin un bon rating, pero na final, nan kier percura pa tur docter di cas tin un bon rating. E mandatario a agrega cu esaki ta e meta final cu tur hende ta contento cu servicio y experiencia durante nan bishita na nan docter di cas.

E mandatario a tuma e oportunidad pa gradici AZV pa tur nan cooperacion brinda, como tambe e team profesional di IT, pa hunto cu e web developer por a traha riba e app nobo di AZV, y haci un yamada na comunidad pa haci bon uso di e aplicacion y no haci mal uso of abusa di e app, pa asina na final di dia, tur hende por ta contento cu e app y gobierno di su banda, por logra mehora servicio y experiencia di e aseguradonan den nan bishita cu docternan di cas.

 

- Advertisement -

DUNA COMENTARIO

Please enter your comment!
Please enter your name here