Minister mr. Xiomara Ruiz-Maduro:
ORANJESTAD (AAN) – Manera ta bon conoci, pa hopi tempo a papia na Aruba riba un reforma fiscal, y tur hende ta warda pa esaki. No obstante, e ta un trabao hopi grandi y gobierno a cuminza na e prome fase, premirando cu henter e reforma aki lo bay den cuater fase.
Asina Minister di Finanzas y Economia a menciona den conferencia di prensa di gobierno, Diahuebs.
“Awe, nos a cuminza cu e reunionnan di loke ta bay bira e di dos fase di e reforma fiscal y sigur den e cuadro aki Minister Presidente ta instrumental, door di su experticia como Hurista Fiscal y mas cu claro, su pasion pa esaki, el a sali padilanti pa duna splicacion tocante e parti aki”, e dignatario a expresa.
El a agrega cu tambe tin e protocol cu a keda finaliza cu Hulanda, y cu tambe ta importante pa mencione den e parti di transicion unda cu ta bin mas informacion encuanto e normanan di cual Aruba ta bay tene su mes pa loke ta regarda finanzanan publico y e supervision di CAft tambe lo trece mas claridad con esaki ta.
E mandatario a menciona cu ainda falta pa trata e Ley di LAF cu ta institui e parti di supervision, pero ya caba na un nivel politico mas halto e protocol a duna indicacion cu CAft su supervision ta tene kico ta e normanan cu Aruba ta bay atene na dje y sigur e norma di gastonan di personal. Un trabao hopi duro cu e minister ta gradici na tur esnan envolvi den dje y e expertonan cu a traha riba dje.
2019, Aña di Implementacion:
Minister Xiomara Ruiz-Maduro a señala cu aworaki: Aña 2019, nos a drenta den un aña di implementacion.
“2019 sigur e ministerionan cu ta bao di mi maneho, nos ta bisa cu e parti financiero semper ta keda e ader cu ta keda core; e preocupacion pa nos no tey ainda, nos tin cabes riba awa y aworaki nos tin cu bay traha riba e parti economico pa nos pais”, e dignatario a splica.
E parti economico sigur, mester di atencion. Asina el a remarca. “Nos ta mira si, cu na 2018 tin trabaonan a wordo haci, aworaki nan a finaliza, y dentro di poco mi ta bin cerca boso tambe pa asina por presenta locual ta bira e maneho economico pa añanan 2019 pa 2022”. E mandatario a mustra e documento cu ta encera e plan economico cu lo wordo implementa.
E dignatario a menciona cu ainda nan kier tin algun combersacion cu Banco Central riba e aspecto aki, pa asina por presenta e plan aki cu ta hiba e nomber “Pa un economia fuerte y resiliente pa Pais Aruba”.
Minister Ruiz-Maduro a indica tambe cu pa loke ta trata e cuadro economico, gobierno ta trahando riba e Vestigingsvergunning, di cual den un par di dia lo bin conferencia di prensa pa splica riba e aspecto di simplificacion den e proceso di haci negoshi, y tambe lo haci control pa cual pueblo ta pidi pe, no solamente riba e canasta basico, pero tambe den comparacion di prijs pa asina haci e consumidor conciente di na unda e por haci compranan pa ta mihor pa su cartera. Den esaki e control multidisciplinario lo sigui cu ta bay hunto cu Departamento di Higiene.
