Home Beyeza Aworaki Sol Pa Ofishi no ta cumpliendo cu loke e ta 

Aworaki Sol Pa Ofishi no ta cumpliendo cu loke e ta 

73
0
SHARE
- Advertisement -

Minister Lampe:

ORANJESTAD (AAN): Relaciona cu e protesta di maestronan di Scol Pa Ofishi (SPO) diahuebs mainta, Minister di Enseñanza, Rudy Lampe, kende tabata presente pa atende cu e docentenan, el a duna di conoce cu tur protesta p’e ta legitimo.

Ora cu el a tende ayera mainta cu e maestronan tabata den protesta mesora el a acudi na SPO Santa Cruz. E mes a yama inspector di enseñanza pa pidi autorizacion pa e muchanan por a bay cas pasobra tur maestro cu ta protesta merece debido atencion, a bisa.

Di e manera aki e mandatario a reuni cu e maestronan y scucha nan preocupacionnan. E maestronan a pidi’e pa acudi na Savaneta y el a cumpli cu e deseo aki, a expresa.

Lampe a ricibi un carta di e maestronan unda nan a duna un siman pa contesta y el a bisa e ta bezig ta analizando e carta ey. Kiermen, e maestronan no a warda un siman y nan a bay den accion prome cu e fecha cu nan mes a skirbi den e carta.

“Un maestro mester tin un motibo pakico nana drenta den protesta y mi ta akinan pa scucha nos maestronan”, Minister Lampe a bisa.

Den e ultimo simannan, a agrega, el a haya di mayornan di alumnonan di SPO, carta di doctor cu algun alumno a haya un sorto di infeccion di cuero pa motibo di e condicionnan cu tin na e baraknan na SPO Santa Cruz.

Cu e declaracionnan di doctor riba su mes cada e ta merece atencion y no por sigui cu e sistema na SPO Santa Cruz pasobra tin cierto condicionnan cu no ta higienico ni saludabel pa e muchanan, e mandatario a indica.

“Esaki ta un preocupacion pa mi mes y como minister mi ta preocupa pa e condicion di e muchanan aki”, a bisa.

Banda di esey tin otro preocupacion cu tin cu bay atende mesora tin cu SPO ta un scol di enseñanza secundario pa muchanan cu ta caba Emmaschool, cu ta caba Caiquetio Scol y Paso pa Futuro Scol.

Aworaki SPO no ta cumpliendo cu loke e ta. “A manda muchanan cu diferente necesidad akinan tambe. Anto esey no ta cumbini e maestronan pa traha bao di e condicionnan aki”, a indica.

Segun Lampe, e kier yuda e maestronan door di bin cu un maneho cu e maestronan ta atende un grupo di muchanan cu tin cierto necesidad y cu nan kier enfoca riba esey.

E ora ey lo duna atencion na un otro espacio na e muchanan cu merece otro tipo di atencion. Henter e maneho ta pa yuda e muchanan, pa sanea e situacion no higienico cu tin na SPO Santa Cruz y pa yuda e maestronan pa nan por cumpli mihor cu nan trabao.

Door di a combina asina diferente necesidad, e docentenan no tin tempo ni e posibilidad di duna tur e atencion cu e muchanan merece y pesey e trabao ta bira hopi pisa pa nan, e mandatario a señala.

- Advertisement -

DUNA COMENTARIO

Please enter your comment!
Please enter your name here