Home Politica Benny Nisbet: Pabao di brug ta hayando cantidad di rotonde y San...

Benny Nisbet: Pabao di brug ta hayando cantidad di rotonde y San Nicolas lo haya nada

734
0
SHARE
— Benny Nisbet kier sa di con San Nicolas a haya nada.
- Advertisement -

ORANJESTAD (AAN): Segun Benny Nisbet di PPA, cu gran atencion PPA a tuma nota di e  prome conferencia di prensa di parti di Director di DOW den cual nan a publica e trabaonan grandi di infra-structura cu lo tuma lugar durante aña 2019.  Mayoria  di e trabaonan tin di haber cu e construccion di e Watty Vos  Boulevard.

Por a comprende cu lo bay construi 8 rotonde y  2 viaducto y crusadanan.

Si nos a comprende bon e siguientenan:

Na Paradera lo bin riba e caminda di Paradera pa Oranjestad lo bin un rotonde estilo Paperclip na Sero Patrishi.

Na Oranjestad ta bin e siguiente rotonde nan nobo: (*) Na Sta Helenastraat lo bini un rotonde nobo.  (*) Na Yrausquin Boulevard lo bin un rotonde na altura di Alhambra Casino. (*) Na Eagle Beach altura di Oceania  tambe lo bin un rotonde.  (*) Rotonde banda di Ling & Sons.

Lo tin dos overpass:  (*) Un Overpas lo bin na Hato.  (*) Un Overpas lo bin na Meiveld.

Na Noord lo traha riba: (*) Dos rotonde cu lo conecta estilo Paperclip e cruzada di Shaba y Montaña na altura di compleho deportivo Frans Figaroa. (*) Un rotonde lo worde construi na altura di Rio Grandi.

PPA ta contento cu e dinamismo y atencion projecta pa gobierno pa medio di departamento di DOW pa  Paradera, Noord y Oranjestad nan infrastructura y PPA ta sostene e  inversion aki den nos infra-structura 100 porciento.

Pero PPA mester puntra publicamente di con Nada Nada Nada  no a worde publica pa worde construi den infrastructura p’ariba di brug. Ciudadanonan di p’ariba di brug tambe ta paga belasting, tambe ta paga Bbo etc, tambe lo paga e prijsnan halto pa bebida y tabaco etc.

Gobierno MEPORED a anuncia cu nan lo duna atencion na e .o e districto lubida cual ta San Nicolas.

Nisbet ta puntra, unda e voz di e asina yama miembronan di parlamento di pariba di brug a keda  despues cu e anuncia aki a tuma lugar?  Nan ta consciente entodo caso cu MEP  como partido NO tin ningun miembro di parlamento di San Nicolas!  Unda otro voz di San Nicolas a keda den esaki? Constitucionalmente na tur ta representa henter Aruba!

Tin hopi caminda na San Nicolas cu no ta hayando atencion.  PPA kier mustra riba cu tin caretera na San Nicolas cu e ultimo vez cu nan a ricibi atencion ta ora cu partido PPA  tabata forma parti di e asina yama Bestuurschoollege di Aruba.  Despues di esaki  e careteranan aki NO a worde drecha ni manteni.

PPA kier mustra riba e necesidad pa careteranan manera  Diamantbergweg, Juana Mortostraat  y ex-Nijhoffstraat cu mester di atencion …tin e caya mes y tin e  ‘trottoir’ cu nunca a worde traha.

Si bay over na construccion di ‘trottoir’ por haci un parti hancho cu por crea  un asina yama  parti unda e pueblo di e barionan aki lo por  kana tambe pa baha peso of keda den condicion.

Na e crusada di  Nijhoffstraat, Juana Mortostraat, Golfweg kizas lo por bin un rotonde! Palisiaweg merece aceranan hancho, y parti di Weg Fontein merece acera hancho tambe!

Varios caminda na  Sabana Basora, Pos Chikito, Savaneta, Brazil y Cura Cabay ta pidi atencion pa tanto e caretera como trottoir y cierto caminda e asina yama ‘sleeping police’.

Lamentablemente ni gobierno MEPORED, ni miembro di parlamento actual  no a sali na vanguardia di e pueblo di San Nicolas y vecindario.

San Nicolas tin añanan wardando pa algo worde haci na  e crusada  di Lago Weg –Bernardstraat  net pabao di  Carnival Plaza  cual ta worde considera peligroso.

Un tempo tabatatin un spiel  riba e muraya di e misa chikito cu trafico biniendo for di direccion di e refineria por wak ora cu tin trafico biniendo p’ariba, pero desde cu e spiel a worde kibra nunca mas e lugar aki a ricibi atencion di parti di autoridad.

Entodo caso No ta mustra cu Ministerio di Infrastructura e.o. DOW lo tin p’ariba di Brug como prioridad pasobra si esaki tabata e caso e proyectonan impactante pa p’ariba di Brug a worde mencion tambe !! E hecho cu NO a menciona ningun ta nifica cu no a dedica atencion den planificacion na ningun.

PPA ta pidi Gobierno pa dedica atencion na tur districto, pues p’ariba di Brug tambe, Sabana Basora, Pos Chikito, Spaans Lagoen,  Savaneta, Brazil, Cura Cabay y San Nicolas completo  tambe merece atencion  debido!

- Advertisement -

DUNA COMENTARIO

Please enter your comment!
Please enter your name here