Home Hudicial Cinco aña di prison y 10 aña sin por postula como politico...

Cinco aña di prison y 10 aña sin por postula como politico exigi pa Paul Croes

1752
0
SHARE
- Advertisement -

Fiscal a expresa: “If you can’t do the time, don’t do the crime”

ORANJESTAD (AAN): Manera DIARIO a publica diasabra, Fiscal a baha pisa riba Paul Croes. Dialuna mainta despues di a sigui cu e requisitorio, Fiscal a expresa cu e ta haya Paul Croes culpable di tur e acusacionnan esta: 

   REGLA PERMISONAN:

Fiscal ta mustra cu no por bisa cuanto placa exacto Paul Croes a gana y cuanto dispensacion di permiso el a duna. E cantidad ta hopi cien. Den e caso di corupcion aki bo tin esnan cu ta paga y esnan cu ta worde cumpra cu ta actua manera nan no sa di nada.

Fiscal a mustra cu den e caso aki tin pruebanan di sosten. El a mustra cu e investigacion na cas di e sospechoso Filiciana a haya un bista cla cuanto placa esun cu kier haya un dispensacion di permiso a paga y a bay pa Paul Croes. E prueba di sosten tambe por haya for di declaracion di e sospechosonan Siem Mong y Schwengle.

Tambe tin combersacionnan via cellular cu a scucha y tambe combersacionnan cu Paul Croes tabata hiba for di su auto cu Aparicio y otronan. 

    MAL USO DI FUNCION:

Fiscal a bisa cu Paul Croes a abusa di su funcion di minister di Labor. Como hefe di DPL, el a yama Trimon y orden’e dia 5 di November 2016 pa bisa Kock di DPL pa no bay controla Restaurant 297. Fiscal a señala cu e dia ey, Paul Croes tabata na Miami y a bisa Trimon cu e tabata den exterior y pa ordena Kock pa no bay controla Restaurant 297.

Ta asina cu e dia ey Blijden di Guarda Costa a worde yama pa Paul Croes, door cu a detene dos empleado di +297 Restaurant. Paul Croes a bisa cu e tin e documentonan. Blijden a bisa Paul Croes cu e no por sigui tapa. Fiscal a bisa tambe cu Paul Croes a percura pa 29 permiso pa +297 Restaurant.

Un otro caso ta cu Paul Croes a yama Vingal di Imigracion pa laga e dama Venezolano di inicial Y. pasa pasobra Paul Croes a bisa cu e dama lo bay traha p’e. E dama aki a worde para na aeropuerto pa no drenta pero despues a drenta.

Na 2017, e Chines Yifen Wu a yama Paul Croes pa stop control na Harmony Supermarket na Ponton. E funcionario Oduber tabata controla y Paul Croes a papia cu Oduber pa duna un aviso.

Oduber a keda asombra con e Chines ta yama Paul Croes direct, y Paul Croes ta duna Oduber orden. Fiscal a bisa cu Wu ta percura pa cosnan pa Paul Croes y Paul Croes ta regla permiso. 

   LABA PLACA:

Fiscal ta haya cu Paul Croes y Melony Croes Paesch a gasta mucho mas placa cu loke nan tabata gana. E ta haya cu a malversa placa malversa di Stichting Leadership & Excellence.

Miembronan di RST a haci investigacion financiero y a constata cu tin mucho mas gastonan compara cu entrada. Na opinion di Fiscal mas cu 700 mil Florin a gasta y cu lo mester tabatin entrada ilegal entre 2014 y 2017.

Fiscal a bisa Hues cu te ainda e pareha no a duna splicacion aceptabel for di unda a haya placanan. Si duna un splicacion, lo mester haci investigacion atrobe pa determina si ta cuadra. 

   MALVERSA STICHTING:

Fiscal a mustra cu Paul Croes a bisa cu Capriles tabata encarga cu Stichting Leadership & Excellence. Tur decision mester worde evalua cu Paul Croes. Fiscal a bisa cu placanan di donacion tabata worde deposita den e Stichting aki pa Paul Croes su campaña.

Fiscal a señala cu Paul a usa placanan di e Stichting pa asuntonan personal entre otro paga financia di estudio di 15 Mil Euro. Investigacion a mustra cu mas o menos 100 mil Florin Paul a usa pa su mes. Hopi placa tabata worde deposita riba credit card di Paul.

Segun Paul, e tarea di e Stichting tabata pa drecha su imagen. Fiscal a mustra cu Paul a cumpra holoshi Cartier di US$ 1.500 

    ORGANIZACION CRIMINAL:

Fiscal a remarca cu den e organizacion criminal nan a palabra prijsnan pa regla permisonan. A falsifica documentonan pa haci cu hendenan ta traha pa e tramitadornan siendo cu no ta asina.

Fiscal ta haya cu ta un asunto hopi mas serio y ta mas castigabel. Ademas di Schwengle, Filiciana y Vazquez, Paul, Aparicio y Capriles tambe ta den e organizacion criminal.

   TRAHADOR ILEGAL PA PAUL:

Dama Y. a yega Aruba y Vingal lag’e pasa. E tabata Dec 2016 te Maart 2017 trahando sin tin permiso. Promer cu esey e tabata kedando como turista y trahando caba y ganando 200 Dollar.

Melony bisa cu Y. tabata den periodo di prueba. Esey segun Fiscal no por. Dama Y. tabata na Aruba como turista y trahando ilegal.

   CORUPCION:

Fiscal ta haya cu aki por papia di corupcion. Hendenan no ta worde trata igual. Corupcion ta causa mal funcion den comunidad y crea pobreza. Aruba ta un comunidad chikito, tur hende conoce otro.

Door di no debido control, Paul tabata haci y deshaci cu dunamento di permiso. Fiscal a remarca cu si bo ta hiba un maneho corecto, bo no ta bay haya cantidad di hende para pafor di bo oficina of na bo cas pa haya permiso. Fiscal ta haya cu Paul mester a para esnan cu a bin busca permiso y bisa cu tin maneho. Fiscal ta puntra su mes ki ora Paul su pensamento a bira cu ora e tabata den politica na mando el a bay haci mal uso di poder. Fiscal ta haya cu Paul tabata kier biba na grandi.

El a mustra cu e hecho cu Paul no kier a firma e carta cu a worde traha cu ta solamente DPL lo ta encarga cu admission di extrahero. Fiscal ta haya cu no por ta otro cu Paul kier dicidi riba decision di DPL.

Ta masha hopi permiso Paul a bende. Den Corte por scucha kehonan con autoridad a bay haci investigacion. Fiscal a cuestiona e hecho cu medionan liga na Paul ta pinta e caso no ta asina grandi manera Fiscal ta pretende.

Fiscal a expresa: “If you can’t do the time, don’t do the crime”. Fiscal ta mustra cu Schotte no tabata ambtenaar promer cu el a drenta politica pero Paul Croes. Esey ta nifica cu awor cu Paul Croes a distancia di politica e lo por bolbe bira ambtenaar.

Fiscal ta haya cu Paul Croes a discualifica completamente pa ta un ambtenaar. E mihor cos lo ta si Paul Croes nunca por bira ambtenaar, politico, pero esey den ley no ta posibel. Fiscal a bisa cu Ministerio Publico a scoge pa un medida cu tin e periodo maximo y esaki no solamente pa Paul Croes no por bira politico sino tambe no por bira ambtenaar.

   EXIGI CASTIGO:

Fiscal a exigi 5 aña di prison, kitando e tempo cu Paul tabata sera na KIA. Ademas Fiscal a exigi 10 aña cu Paul no por postula su mes pa worde eligi.

Pa e señora Melony Croes Paesch, Fiscal a exigi 240 ora di trabao pa comunidad. Si Melony no cumpli cu esaki e lo mester bay 120 dia sera.

Tambe Fiscal a exigi 6 luna di prison condicional cu un tempo di prueba di 3 aña.

Riba Diaranzon, e defensa di Paul y Melony lo ta na turno den Corte y nan lo duna nan banda di medaya.

 

- Advertisement -

DUNA COMENTARIO

Please enter your comment!
Please enter your name here