Na 2019 tog ta mira un mehoracion den cumplimento
ORANJESTAD (AAN): Vocero di Departamento di Impuesto, Meverly Romano, a duna un relato basta extenso pa loke ta e datonan di pago di impuesto di vehiculo di motor di 2019.
El a indica cu den esaki ta resalta un categoria di vehiculo pa loke ta incumplimento. Esaki ta e categoria A. Di un total di 39 mil, tin 32731 plachi di categoria A cu no ta paga. Esaki ta representa 43% den e categoria ey.
E di dos categoria cu ta resalta ta e brommernan. Tin un cantidad di 2258 brommer registra di cual 1154 no tin pago registra pa 2019. E V-carnan tambe tin 63% di nan cu no tin pago registra. Di 4642, tin un cantidad di 3389 no paga, Romano a señala.
DIMP ta haci un yamado na e clientenan cu ainda falta pa haci e pago pa no keda pospone esaki pa motibo cu e lo por tin su consecuencianan despues.
Aña pasa, na September a saca e “naheffingsaanslag” pa e clientenan cu no a cumpli y e clientenan a ricibi nan cobranza di e periodo Januari pa Juni como tambe esnan no no a paga nan di dos mitad di aña a haya nan “naheffingsaanslag” pa e periodo di Juli te cu december.
E “naheffingsaanslag” aki a inclui un boet di 50%. Esaki kiermen cu un persona cu no a paga su belasting di aña 2018 completamente, por ehempel, si un belasting ta 300 florin, e lo mester paga 450 florin pasobra e boet ta 50% di e suma di belasting.
Esaki ta sancionnan cu ley ta duna cu no ta recomendabel pa ningun cliente pasa den esaki pasobra e ta nifica menos placa den su cartera, Meverly Romano a expresa.
Un persona cu tin su vehiculo di motor mester sa cu e tin cu cumpli cu su debernan y cu esakinan mester wordo paga na tempo.
COMPARACION CU 2018
Segun e relacionista di DIMP, a pesar cu tin un non-compliance di 45%, compara cu aña pasa, el a mehora.
Aña pasa, den e categoria mas grandi tabata tin un incumplimento di 58% na Januari y e biaha aki tin un incumplimento di 43%. Ta mira un mehoracion den e pagonan pa loke ta e plachinan A y esey sigur ta un desaroyo positivo.
Relaciona cu e V-Carnan, aña pasa e incumplimento tabata di 81% na Januari y e aña aki e incumplimento ta di 73%.
Por mira un desaroyo positivo, pero basta hopi ainda prome cu baha e porcentahe na un miho, si ta posibel bao di 10%, el a indica.
