Home Hudicial Comerciantenan sospecha di a duna Paul Croes placa pa regla permiso dilanti...

Comerciantenan sospecha di a duna Paul Croes placa pa regla permiso dilanti Hues

1703
0
SHARE
— Ex-Ministro Paul Croes y su casa Melony.
- Advertisement -

ORANJESTAD (AAN): Diamars mainta comerciantenan sospecha di a paga Paul Croes pa e regla permiso pa nan, a presenta den Corte. Ta trata aki di e dama Chines Chunyan Liang, Fernando Latoracca, Juan Vasquez Lopez y e Chines Tat Yan Cheng activo corupcion,

Tur ta worde acusa di complice di corupcion activo door di a paga Paul Croes pa regla permiso pa nan. Den sala di Corte tabata presente Paul Croes, kende na final a reacciona riba e declaracion di e sospechosonan.

E dama Liang a bisa cu el a duna Aparicio mil Dollar pa e bay cu vacacion y cu e no a paga pa regla permiso aunke cu e kier a regla un permiso pero Aparicio tabata cu vacacion.

    CHENG A ADMITI DI A PAGA TRAMITADOR:

Hues a bisa cu sospecha Cheng cu a paga Paul pa haya dispensacion pa permiso pa su trahadornan.

Segun Cheng e conoce Filiciana kende tabata yud’e pa traha peticion pa permisonan. El a bisa cu e tabata paga Feliciana tin biaha 5 mil Florin pa e promer permiso. Si tin cambiamento di firma of compania e tabata paga 1500 Florin

Hues a remarca cu tin mas tramitador y nan tarifa ta menos cu e 5 mil Florin. Cheng a bisa Hues cu e no conoce nan.

Segun Cheng e 5 mil Florin ta pa hopi trabao pa e promer permiso pa su trahador. El a bisa Hues cu e proceso ta dura lunanan largo promer cu haya permiso. Hues a bisa cu promer Cheng tabata traha cu Tromp kende tabata cobra hopi menos cu Filiciana. Hues a mustra cu tabatin un combersacion entre Filiciana y Paul caminda nan a papia di Cheng. Filiciana ta pidi Paul pa regla permiso pa Cheng. Filiciana a bisa Paul cu Cheng a paga caba pero no tin papel di DPL.

Ta trata aki pa un trahador pa Acero. Paul a bisa cu e lo regla esey. Tambe a bisa cu si nan por conta cu Cheng su cooperacion pa otro aña.

Hues a mustra cu e sospechoso Schwengle tambe a papia di Cheng. El a bisa cu Cheng tin hopi placa y tin Cheng’s Supermarket na Bubali y a compronde di Filiciana cu Cheng mester a paga Paul 5 mil Dollar pa por haya firma di Paul pa un trahador. Filiciana a bisa Schwengle cu e Chines ta paga bon.

Cheng den Corte a desmenti di tabata paga cu Dollars sino Florin. Hues a remarca cu den transcurso di añanan Cheng a haya hopi firma pa permiso. Cheng a admiti esey.

Hues a mustra cu durante investigacion na cas di Filiciana, a haya hopi envelopnan cu nomber di Cheng y tamber nomber di Croes. Segun Cheng, e tabata paga Filiciana pa regla permiso p’e. E no tabata sa cu esaki tabata un forma di corupcion.

   LATORACCA:

Hues a puntra Latoracca si el a pidi dispensacion di permisa na Paul pa un dama di exterior. Segun Latoracca e dama Bibi ta biba na Aruba. Hues a mustra cu segun DPL, Latoracca a pidi permiso pa traha. Latoracca a bisa Hues cu e dama tabata cla pa casa. El a papia cu Paul pasobra e dama tabata victima di abuso fisico. E dama tabatin miedo pa yama Polis pasobra e ta kere cu e lo worde deporta.

Hues a mustra cu dia 15 Augustus 2016, Latoracca a haci peticion y su siguiente dia a manda Paul mensahe pa e haya number di Roque pa asina e por manda carta pa Paul. Segun Latoracca el a papia anterior cu Paul y Paul a bis’e manda e carta directamente p’e y no DPL. Segun Latoracca anterior ya a rechaza e peticion pa permiso di e dama. Hues a mustra cu dia 19 Augustus 2016, Paul a firma e dispensacion.

Hues a puntra Latoracca si e no a haci donacion na Paul. Latoracca a bisa cu no. Hues a mustra cu Latoracca a manda Paul mensahe pa laga Roque pasa pa cumpra ticketnan. Segun Latoracca varios biaha caba el a cumpra ticket. Hues a bisa cu e ta mustra cu ta a cambio di e fabor a cumpra ticket. Segun Latoracca no ta asina. Hues a bisa cu pesey Latoracca ta worde persigui pa Ministerio Publico. Hues a remarca cu 29 Augustus 2016, Latoracca a manda apps pa Paul y puntra si e permiso di Bibi ta cla y cu Roque no a busca e cheque pa e ticketnan.

Segun Latoracca el a paga 1000 Florin pa e ticketnan di concierto di Pasco. Hues a remarca cu por mira esaki cu Latoracca a scoge pa cumpra e ticketnan pa e concierto aki pa tin un relacion mas estrecho cu Paul. Latoracca a desmenti esaki. El a bisa cu e sa cumpra ticket di partido pero nada pa tin un mihor relacion cu Paul. El a bisa cu e conoce Paul hopi tempo caba. Fiscal a bisa cu ta 10 ticket a cumpra. Segun Latoracca el a cumpra tickets pa su trahadornan. Fiscal a bisa cu e ta conclui cu Latoracca a cumpra e tickets pa yuda Paul.

   VASQUEZ LOPEZ:

Hues a puntra Vasquez Lopez cu como empresario di 4 compania e mester trahadornan y tabata pidi pa permiso. E ta worde sospecha di a paga Paul Croes pa haya permiso. Vasquez Lopez a bisa cu no ta asina. El a bisa cu 12 aña cu e tin negoshi, e ta haci peticion manera e procedura ta. El a bisa cu e tin un asistente cu ta bay DPL cu ta sigui e proceso.

Si e peticion worde rechaza, DPL ta bisa cu e unico persona cu por yuda ta e minister di Labor. E por a compronde cu por haci un peticion na e minister pa e haya trahador di exterior. Hues a bisa cu por conclui cu Vasquez Lopez tabata depende di Paul pa haya hende pa traha como hardinero.

Hues a mustra cu un di e trahadornan, Elias, 27 Mei 2016, Paul a duna dispensacion. Na Juli 2016 ora cu e permiso a keda confirma, Vasquez Lopez a haci un deposito di 2500 Florin riba cuenta di e Stichting di Paul Croes.

Segun Vasquez Lopez, e tabata un casualidad cu a haci un aporte pa hubentud riba cuenta di Stichting di Paul. El a bisa cu e placa tabata pa un torneo di bowling pa hubentud. Hues a remarca cu e ta parce cu a paga pa e permiso keda regla. Hues a mustra cu pa dos otro trahadornan cu a worde rechaza pa DPL, el a pidi Paul su ayudo.

Riba fecha 24 October 2016, Paul a bisa cu e lo check.  Dia 29 October 2016, Selma Arends a yama Vasquez Lopez y bisa cu mester paga pa e dos productonan. Vasquez Lopez a contesta cu ya a paga pa e productonan. Hues a bisa cu esaki ta crea e impresion cu ta paga pa e permisonan. Vasquez Lopez a bisa cu esey no ta asina.

   PAUL CROES TA REACCIONA:

Paul Croes a reacciona riba e declaracion di e sospechosonan. El a bisa cu e no a haya ningun placa for di Cheng y tampoco Filiciana. Pa loke ta Latoracca, e conoce pa hopi tempo promer cu e tabata politico. Na opinion di Paul, e imagen cu Fiscal kier crea cu a haci donacion door di cumpra ticket “no ta real”.

- Advertisement -

DUNA COMENTARIO

Please enter your comment!
Please enter your name here