Home Economia Crisis na Merca ta loke a pone prijsnan di lechuga bira exorbitante...

Crisis na Merca ta loke a pone prijsnan di lechuga bira exorbitante na Aruba

456
0
SHARE
- Advertisement -

ORANJESTAD (AAN): No ta solamente na Aruba, pero varios isla den Caribe a bin ta hayando nan mes sorprendi con caro tur tipo di Lechuga procedente di Norte America a bira ultimo simannan.

Na Aruba algun persona sin investiga mas profundo, a core tira tur culpa riba e doñonan di Supermarket y Tiendanan cu nan lo ta hortando pueblo.  Otronan a core tira culpa riba Reforma Fiscal, e cambio di BBO riba recibo, etc.

Sinembargo e motibo real ta bay directamente riba e hecho cu Merca a caba di pasa den un crisis cu lechuga tipo Romaine, y esaki a pone cu awor tanto na Merca y den Caribe mes, prijsnan di tur otro tipo di lechuga a redobla.

   CRISIS CU ROMAINE:

Por corda con na fin di luna di November 2018, cu un crisis a presenta na Merca, unda hopi hende a bira malo ora di come lechuga tipo Romaine.  Algun di nan tabata potencialmente contamina cu bacteria tipo E.coli cu por haci hende hopi malo.

Pa luna di December, e crisis a finaliza, pero e situacion no a regresa normal pa esnan cu stima salada.

Prijs di lechuga tipo iceberg, green leaf y otro tipo, a subi exorbitantemente debi cu demanda a bira grandi, despues cu productornan a recall lechuga Romaine.

Fin di December, un caha di lechuga na mercadonan wholesale na California, tabata wordo bendi como $60 pa caha.  Siendo cu 1 luna prome, un caha wholesale na Merca tabata wordo bendi na $29.

Na Merca, prijs di otro tipo di lechuga manera “Boston Lettuce”, el a subi cu 175%.  Lechuga tipo “Green Leaf” a subi cu 160%.  Hasta e lechuga tipo “Kale” a subi for di $12 pa caha, y a bay te na $16 pa caha.

Te ainda no ta conoci con largo e situacion di lechuga aki lo sigui asina.  E lo por keda halto pa algun tempo, pasobra e cadena di produccion ta manera kibra aworaki.

   PRIJS DEN CARIBE:

Por a tuma nota cu islanan den Caribe cu ta importa lechuga for di Merca, tambe a haya nan sorprendi cu prijs asina halto pa lechuga.  Lechuga den algun Supermarket tabata wordo bendi te cu hasta US$5.90 pa uno.

Na Aruba tambe den e prome siman di Januari, por a nota cu algun Supermarket tabata bende lechuga na casi 7 Florin pa uno.  Algun lechuga a wordo mira hasta na casi 13 Florin pa uno.

Restaurantnan local cu ta costumbra di cumpra Lechuga den caha procedente di Merca, a haya nan e siman aki ta paga como 160 Florin pa un caha.  Esey ta hopi halto mes.

Pues e aumento di prijs di lechuga tin nada di haber cu medida di Gobierno, ni hortamento di parti di comerciantenan na Aruba.  Ta un trend e ta den e continente Americano aworaki.  A compronde cu lechuganan procedente di Sur America, y esnan produci na Aruba mes, no ta afecta pa prijs halto asina.

Con hopi e prijsnan halto aki lo dura?  Crisisnan similar den pasado a yega di demostra, cu tin biaha ta dura hasta aña pa prijsnan regresa na e nivel anterior di demanda pa un articulo cu ta envolvi den un recall na Merca.

- Advertisement -

DUNA COMENTARIO

Please enter your comment!
Please enter your name here