Home General Cu cambio di tarifa di belasting a bin un reparticion mas husto

Cu cambio di tarifa di belasting a bin un reparticion mas husto

220
0
SHARE
- Advertisement -

Prome Minister mr. Wever-Croes:

ORANJESTAD (AAN) – Prome Minister mr. Evelyn Wever-Croes a repasa e tema di reforma fiscal cu a drenta na vigor dia 1 di Januari 2019.

E dignatario a splica cu 1 di Januari a yega y tur e cambionan di belasting a wordo ehecuta, y ta den proceso aworaki.

El a reitera cu e prome cambio ta e rebaho di tarifa di loombelasting y inkomstenbelasting, cual e ciudadano lo cuminza sinti for di e prome pago di salario di Januari awor, sea si e ta cobra pa kincena of fin di luna.

E dignatario a reitera tambe cu 30 mil hende no ta bay paga e impuestonan aki mas, 25 mil hende si lo paga pasobra nan ta riba 27 mil florin pa aña, pero nan lo paga menos pasobra e tarifa lo baha pa tur hende.

Grondbelasting tambe entrante 1 di Januari e tarifa a wordo ahusta. E impuesto aki tin dos aspecto, segun e mandatario a splica. E tarifa cu tabata 0.4% awor a cambia pa entre 0.0-0.2-0.4 of 0.6% y e porcentahe aki e persona ta multiplike pa e balor di e propiedad.

E prijs di e propiedad no ta cambia. Si e persona su cas a wordo balora y e ta haya e cobranza di 2018 na un balor di 150 mil florin, ley ta bisa cu pa cinco aña e balor ta keda riba e 150 mil florin ey, cu cierto excepcion pero den mayoria di caso ta keda riba e balor ey.

E tarifa ta cambia pa tur esnan cu tin propiedad pa un balor abao di 750 mil florin. E ta baha den algun caso pa 0.0% pa un grupo, pa casnan na un balor di entre 120 mil pa 250 mil florin e tarifa ta bira 0.2% y esnan entre 250 mil pa 500 mil florin ta baha na 0.3% y esnan cu tin balor entre 500 mil pa 750 mil ta keda 0.4% y riba 750 mil e ta bira 0.6%, mescos cu pa propiedadnan comercial y pa esnan cu no ta residente na Aruba pero cu tin un cas of condominium na Aruba e tarifa ta bira tambe 0.6%.

E dignatario a reitera cu ta importante pa señala cu e balor di e cas no ta bay cambia, pero si e tarifa di grondbelasting.

E mandatario a splica cu tin un confusion encuanto grondbelasting, y esaki ta e “meldplicht”. E ta un deber cu a wordo introduci awor pa esnan cu tin un propiedad y nunca a wordo cobra e grondbelasting.

E persona tin cu bay Departamento di Impuesto y meld eynan mes. Esaki ta asina pasobra a bin ripara cu den e ultimo añanan por haya den un bario cu tin tres bisiña cu nan cas ta banda di otro, dos di nan ta conoci na Departamento di Impuesto cu ta pagando talvez diez aña e belasting riba nan propiedad, pero e otro persona nunca su informacion a yega na Belasting, pasobra nunca tabata tin e deber di bay bisa ora su cas ta cla, ta nan a bin haya sa cu bo cas ta cla.

Tin hende cu podise cinco of diez aña a pasa cu nunca nan a haya un cobranza di grondbelasting, pero no ta husto pa keda sin paga e belasting.

Den e casonan aki prome cu 1 di April mester bay meld den Belasting Kantor, pasobra esaki ta un cambio husto y esaki kiermen cu hende ta carga y paga e peso cu nan tin cu paga.

E mandatario a aclarea cu pa meld no mester bay cu taxatie rapport.

E mandatario a reitera pa conclui cu e belasting a cambia y cu esaki tin un reparticion mas husto.

- Advertisement -

DUNA COMENTARIO

Please enter your comment!
Please enter your name here