Home General Dianan di fiesta hopi druk pa Servicio di Ambulance

Dianan di fiesta hopi druk pa Servicio di Ambulance

106
0
SHARE
- Advertisement -

Sr. Liberato Hoek ta splica:

ORANJESTAD (AAN): Señor Liberato Hoek, hefe di Servicio di Ambulance, den entrevista cu nos redaccion a duna di conoce cu mescos cu nan a premira, e dianan di fiesta aki tabata hopi druk pa nan, specialmente di 31 di December pa 1 di Januari.

Pa loke ta trata December mes di 1 pa 31 Servicio di Ambulance a haya un average di 680 melding, hopi similar na aña 2017. A transporta un total di 433 persona, cu ta 33 menos cu aña pasa; a duna asistencia na 36 caso di accidente den trafico cu ta tres menos cu aña anterior. A drenta 452 melding cu ta mas halto cu na 2017, principalmente pa personanan cu a bira malo: casonan interno, casonan di cardiologia y neurologico. A atende 31 melding di personanan cu a cay for di cierto haltura por ehemplo for di dak, dos caso di hende cu a haya lesion pa motibo di vuurwerk, algo cu aña pasa no tabata tin ni un caso.  A registra diez caso di maltrato, cu ta tres mas cu aña pasa, y den e dianan di fiesta mes a keda registra 45 melding cu ta menos cu aña pasa cu tabata tin 100.

Prome di Januari, pues cambio di aña a resulta mas druk, cu 20 melding, cu ta mas compara cu aña pasa, mientras cu pa Dia di Pasco tabata tin 25. Hopi asistencia tabata pa hende cu a bira malo. Encuanto accidentenan di auto mayoria a sosode den cambio di aña. Tanto velocidad halto como stuur bao influencia di alcohol ta parti di e motibonan.

Sr. Liberato Hoek a comenta cu apesar cu tin basta campaña pa concientiza e ciudadanonan pa no stuur bao influencia di alcohol pasobra e por ta peligroso, ainda tin hende cu no ta conciente di esaki. Mescos algun persona cu ta sufri di un malesa cronico, cu no ta cuida nan mes debidamente, sea no ta tuma nan medicamento na tempo, of cu ta come cosnan cu nan no mag come. Pero tur esaki ta keda na e persona mes.

Servicio di Ambulance ta cuminza prepara adelanta ora e temporada di carnaval ta acercando. Diasabra awor ta cuminza cu Fakkel, y segun sr. Hoek e actividad aki semper ta esun unda mas melding nan ta haya. Ta bay tin reunionnan cu SMAC pa concreta e detayenan cu falta.

- Advertisement -

DUNA COMENTARIO

Please enter your comment!
Please enter your name here