Un desaroyo politico unico a presenta den e escenario politico na Venezuela. Ora mundo practicamente a perde speransa cu lo por tin intervencion pacifico, Juan Guaido a presenta su mes.
E tabata tin un impacto grandi pasobra Guaido ta Presidente di e Asamblea Nacional cu pueblo di Venezuela a eligi na forma legal durante eleccion y pa tal motibo a ser kita for di mapa di gobernacion diario dor di Nicolas Maduro.
Ora el a huramenta como presidente, el a pone fin na e posibilidad pa Maduro neglisha reaccionnan internacional y local contra su presidencia . Venezuela a ser saca for di su isolacion cu durante e periodo largo di Maduro como presidente eligi pa e prome mandato a uza pa su maneho causa un situacion cu a paralisa normalidad den mundo.
Mundo e siman aki a duna inicio na proceso pa debolbe democracia na Venezuela, caminda orden di ley a ser reemplasa pa un maneho caotico cu resultado riba tur tereno pa e pais.
Esaki ta haci cu hasta ora paisnan liber logra un base democratico pa Venezuela, nan lo mester dicidi riba un plan total cu ta atende cu tur e sectornan di un comunidad.
Na prome luga mester atende e parti humanitario. Refugiadonan cu a lo largo di e regimen di Chavez y Maduro a ser forsa di entrega nan propiedadnan contra nan propio boluntad, mester haya posibilidad pa bolbe nan pais natal y reanuda nan bida cu e dictadornan socialista a destrui. Dictadura no ta solamente mara na con ta bira presidente, pero tambe na e forma cu ta dicidi riba bienes nacional y propiedad priva di ciudadanonan.
Mester yega na un plan pa tur e Venezolanonan cu e situacion crea pa Maduro a reduci na limosna, prostitucion, criminalidad, angustia y riesgo di morto den exterior, por bolbe Venezuela pa famianan por uni y mira con nan ta bay crea un futuro nobo.
Aliadonan mester traha riba plannan financiero, economico, social, medico pa un pueblo y un pais. Banda di esaki, manera tanto biaha nos a splica, mester mira con ta atende e propiedadnan di Venezuela cu e regimen socialista a entrega na otro paisnan manera Rusia, China, Turkia.
Maduro a hipoteca, manera nos a splica, companianan di estado manera CITGO. Con ta bay yega na un entendimento cu Rusia riba e compania tan importante pa Venezuela y cu mundo a yama “baca di lechi” di e pais? Aruba tambe ta pendiente un solucion.
Cu informacionnan a base di investigacion profundo y experto, DIARIO a cumpli cu su tarea pa splica Aruba e desaroyonan na Venezuela cu resultado directo pa Aruba tambe.
Awe tin un luz na final di e tunnel pero e luz mester briya na un forma total riba e pais cu a conoce destruccion riba tur tereno.
Na un forma urgente mundo, mester yega na acuerdonan. A base di informacion di expertonan nos lo sigui informa nos lectornan di tur paso cu ta ser tuma actualmente pero tambe e efectonan pa Aruba.
Mientrastanto laga nos sigui uni nos bos den un oracion constante pa un solucion pa mas cu tur otro cos, e drama di hende cu a perde su dignidad y a ser reduci na nada pa opresion triunfa.
Laga nos ta un di curason y cu pronto nos por brasa nos rumannan Venezolano atrobe sin e condicionnan doloroso cu nan status di refugiado a provoca.
