Home Editorial Editorial: E herencia di Betico Croes ta triunfo despues di lucha

Editorial: E herencia di Betico Croes ta triunfo despues di lucha

58
0
SHARE
- Advertisement -

Un lider ta caracterisa su mes pa e hecho cu continuamente e pueblo cu el a dirigi, lo ser inspira pa e logronan cu el a alcansa. E ta semper bibo den historia pa duna pueblo animo pa sigui cana ora momentonan dificil trata di crea barera pa nos registra victoria.

Awe cu Aruba a pone e base pa crea un futuro nobo den un crisis severo, e tin e sosten eterno di e Arubiano cu a dirigi Aruba na e momento di triunfo dia Prome di Januari 1986.

E bida y mision di Gilberto Francois Croes a cuminsa den tur silencio dia 25 di Januari 1938. Tabata na e momento imposibel pa Aruba realisa cu e homber cu lo a percura pa e anhelo Arubano ser cumpli, a nace.

El a bira maestro di school, pero su destino no tabata limita na yuda hobennan crea nan futuro pero pa dirigi henter pueblo pa un porvenir den cual e autonomia di Aruba lo a entrega responsabilidad pa e pais den man di tur Arubiano.

Ora Betico Croes a termina e obra cu tabata na su encargo y Status Aparte a bira realidad dia Prome di Januari 1986,  el a bira parti indiscutibel di historia di Aruba. El a entrega su pais e luz di triunfo despues di un lucha cu den menos di dos decada el a cambia den logro.

Betico Croes tabata tin e capacidad pa transmiti loke Aruba ta y loke ta biba den curason di Arubianonan pa e hecho cu e tabata simbolo di su pais. El a planea un caminda pa futuro pa Aruba como lider cu ta parti real di su comunidad.

E Arubiano tabata presente den cada palabra cu el a expresa y cada accion cu el a tuma den union cu pueblo, cu por a reconoce su mes den e himno y bandera pa yega den un periodo sumamente corto na realisacion di e soño Arubano.

El a subi baricada pa protesta. El a uza palabranan cu tabata biba pa tanto tempo den e alma di Aruba cu a papia na referendum y cu Reino mester a scucha.

El a reuni anhelo y posibilidad concreto y a haci uzo di expertonan di e pais pa diseña un futuro basa riba realidad y responsabilidad gubernamental.

Aruba tabata prepara pa dentro di tres aña ehecuta su transformacion di teritorio insular pa pais autonomo den Reino.

DIARIO por duna testimonio di e forma cu Betico Croes a dirigi realisacion di un pais cu un structura legal a base di orden di ley y democracia y asina a duna muestra cu e tabata naci pa ta lider.

E no a bira minister ni diputado. E tabata bos di Aruba den Staten y Eilandsraad y consehero di gobiernonan cu tabata tin e tarea di goberna e pais cu responsabilidad.

Betico Croes a percura pa e base gubernamental tabata presente y tabata duna prueba na Reino cu Status Aparte lo no a bira un aventura pero e funcionamento di e pais Aruba a base di gobernacion duradero y sostenibel.

E autodeterminacion di Aruba a ser confirma den e Banco Central di Aruba cu su propio moneda y Ministerio Publico den man di e pais.

Aruba a ricibi e hermentnan pa carga responsabilidad propio riba e terenonan mas importante pa sigura felicidad berdadero di pueblo.

Betico Croes a realisa soño di su pueblo como lider na un forma planea. E no por a planea e panorama mundial cu a haci Lago cera su porta na 1985. E ultimo encargo cu Betico Croes tabata tin pa su pais, tabata pa tuma medida pa un pais den crisis cu el a guia te na porta di e cas constitucional nobo.

Mientras dande tabata anuncia yegada di 1986, e tarea di Betico Croes a termina. El a cumpli cu su promesa. El a entrega Aruba e luz di triunfo prome cu destino a pone cu e mester a habri su hala y bula bay.

Como lider e ta bibo. E ta aliento pa su pais na momentonan dificil. Pa tin victoria mester tin lucha. Pa ta lider, mester comparti alma di bo pueblo.

Awe atrobe Betico Croes ta ehempel pa Aruba determina su futuro. E ta keda pa semper e lider, e guia, e tata di su pais.

 

 

 

 

 

 

 

 

 

- Advertisement -

DUNA COMENTARIO

Please enter your comment!
Please enter your name here