Home Editorial Editorial: Fayo di Parlamento a bira supervision

Editorial: Fayo di Parlamento a bira supervision

165
0
SHARE
- Advertisement -

Aruba conoce un di e miho constitucionnan na mundo. E structura legal di e pais ta cumpli cu tur exigencia pa democracia por ta realidad bibo na e pais y no un formula morto riba papel.

E separacion di poder ta e arma mas poderoso cu pueblo tin pa evita cu dictadornan scondi por uza eleccion liber pa yega y keda na poder despues como dictador. Democracia y eleccion ta e forma alternativo pa dictadornan alcansa poder sin uza revolucion.

Un bon funcionamento di Parlamento ta stroba dictadura bira realidad na un pais, pero tambe ta stroba un gobernacion corupto. Ora papia di corupcion no ta papia unicamente di politiconan cu a enrikece nan mes pa medio di fabor cu nan ta otorga contra ley, pero ta papia tambe di tur politico cu sabiendo cu nan ta actua contra ley, ta actua contra interes di e pais.

Un politico cu ta actua na interes propio sea pa keda na mando, sea pa haya popularidad y crea un carera politico of pa satisface otro persona of grupo, ta corupto. E ta destrui e bienestar di e pais.

Na 2018, ora Aruba a cay den un pos cu mal gobernacion a crea, instancianan oficial a mustra riba e necesidad pa Parlamento realisa su responsabilidad pa por sigura bon gobernacion.

Parlamento ta e organo di control cu pueblo tin. E mester tin e capacidad pa percura pa trabou y decisionnan di gobernantenan ta di acuerdo cu ley.

Pakico awe tin supervision na Aruba? Kico lo a pasa cu Aruba si no tabata tin supervision?

Durante e ultimo dies añanan, Gabinete Mike Eman a demostra kico por haci cu un pais. E tabata tin sosten mayoritario den Parlamento. E sosten aki a conduci na un crisis nunca bisto pa Aruba.

E miembronan di Parlamento di AVP, durante dies aña, a trapa riba democracia y bon gobernacion y asina a destrui e bienestar di Aruba.

Un miembro di Parlamento no mester di un grado di universidad pa e sirbi e pais. E tin sosten di organonan independiente pa yuda cumpli cu su trabou di control. Pero a permiti Gabinete Mike Eman hiba un maneho financiero cu awe tin Aruba destrui. E miembronan di Parlamento di AVP a haci posibel pa e acuerdo cu CITGO a keda secreto pa e totalidad di Parlamento y a kibra regla democratico pa hinca Aruba den e problemanan economico actual.

E aña aki Hulanda a scucha gobierno di Evelyn Wever-Croes,  cu a yega na un forma nobo pa atende supervision financiero na interes di e pueblo di Aruba cu ta bira victima directo ora partido politiconan sin consenshi, malogra bienestar di e pais.

Pa Aruba haya respet atrobe den mundo, no mester di politiconan cu ta yena sala cu palabranan bunita, pero mester di politiconan cu no ta mancha nomber di pueblo. Reino mester salvaguardia e interes di e Arubiano cu paga belasting pa bon gobernacion, ora miembronan di Parlamento no ta cumpli cu nan trabou.

Awe e mayoria den Parlamento cu a sostene durante ocho aña e gobierno anterior, ta esun responsabel pa supervision den e situacion di bancarota cu nan a permiti nan gabinete Mike Eman, laga atras.

Nan a pidi pa supervision ora cu mentira nan a pone economia na peliger cu un proyecto cu mester a mantene nan den gobierno pero hasta den esey a faya.

Democracia ta exigi supervision pa defende bienestar di pueblo pa medio di control y condena di tur cu a abusa di confiansa di pueblo.

- Advertisement -

DUNA COMENTARIO

Please enter your comment!
Please enter your name here