Noticia a cay manera un bom emocional!
ORANJESTAD (AAN)—Den e transcurso di Diaranzon, despues cu varios pensionado a tuma nota di un aviso di SVb, relaciona cu un cambio den e Reparatietoeslag unda ta mustra cu esnan cu banda di nan pension tin otro entrada, y cu hunto cu esun di AOV ta sobrepasa e suma di fls.1134,= e compensacion aki lo wordo kita, a cuminza reacciona.
Tin di nan cu a yama na e number di telefon cu ta aparece den e aviso, pero via voice mail nan ta wordo informa cu e persona concerni no por tuma e yamada, y esaki a pone nan mas bravo ainda.
Di un of otro manera, e pensionadonan aki a logra confirma e noticia: nan ta perde nan reparatietoeslag cu gobierno anterior a otorga nan y nan tin riba nan presupuesto di cada luna, como parti di nan entrada.
E informacion ricibi ta indica cu entrante 1 di Januari e ley a introduci in evaluacion di e entradanan pa determina si tin derecho riba e 125 florin di reparatietoeslag.
Esaki ta un ley cu Parlamento a aproba y cu SVb mester ehecuta. Lamentablemente, ora cu e ley aki a pasa y cu lo ta vigente entrante 1 di Februari, pueblo no a wordo informa. Ni sikiera a wordo comenta durante e tratamento di presupuesto ni a wordo menciona pa e parlamentarionan ora nan a wordo acerca pa prensa, pa puntra ta cual ta e leynan cu a pasa.
E noticia aki a cay manera un bom emocional pa e grupo di pensionadonan aki, cu no tabata spera esaki at all. Esnan cu a tuma contacto cu nos redaccion ta puntra si e slogan “e ser humano central” no ta conta pa e pensionadonan aki?
E ta un grupo grandi esnan cu ta sigui traha pasobra cu un entrada mas abao cu salario minino nan por sobrevivi. Y mucho menos esnan cu na pension ta haya 400 florin y hasta menos, y cu banda di esaki sin duda mester a busca manera pa un entrada extra y pesey a sigui traha.
E pensionadonan aki ta sinti cu nan ta wordo castiga, nan ta indigna y ta sinti cu e ley aki ta un bofta di e parlamentarionan cu a aprobe, y cu a lubida cu nan ta representa un pueblo, y cu tin di e pensionadonan aki cu a deposita nan confianza den nan y pesey nan ta den Parlamento y den Gobierno.
Nan no a pensa riba loke e placa menos aki ta bay nifica pa e pensionadonan concerni. Costo di bida a aumenta drasticamente, y na lugar di mehora nan poder di compra gobierno ta limita esaki ainda mas pa e grupo aki.
Nan ta corda cu ex-minister Eman, un par di luna atras, a publica e asunto den corant caba, pero poco despues gobierno a bin nenga y bisa cu e no ta berdad, y algun di e pensionadonan a tume como “speculacion” pero awor numa e berdad ta bin sali na cla.
Algo cu ta bon pa destaca ta cu algun di e pensionadonan aki ta masha rabia cu SVb. Pero SVb no ta dicidi riba su mes, sino cu ta un instancia cu ta ehecuta locual e ta haya como ordo di e superiornan cu ta parlamento y gobierno. Por imagina cu e trahadornan di SVb cu tin di haber cu pension lo por ta pasando den un mal momento si acaso e mesun expresionnan cu por a scucha na nos mesa di redaccion, nan tambe a scucha.
Well, un grupo di pensionado aki tin cu sigui “hala faha mara” ainda mas, pasobra e placa aki lo no bin mas pa nan ya cu e ley keto keto a pasa tras di nan lomba.
