Home Editorial Famia ta e factor esencial pa un comunidad di calidad

Famia ta e factor esencial pa un comunidad di calidad

23
0
SHARE
- Advertisement -

Editorial

Despues di a demostra e capacidad pa carga e responsabilidad como lider gubernamental di Aruba den un tempo di crisis severo, Ministro Presidente Evelyn Wever-Croes a entrega na Aruba e formula mas eficiente pa debolbe Aruba un comunidad di calidad.

Na momento cu el a anuncia cu 2019 lo bira Aña di Famia y di Cuido di nos Muchanan, el a duna muestra di ta consciente cu mester debolbe Aruba su ingrediente mas importante cu ta un bida familiar di calidad cu ta encera tambe e cuido necesario di e mucha, cu lo ta dirigente di futuro.

Di e forma aki el a confirma su e ta capaz pa duna liderazgo na un pais cu mester di un desaroyo planea pa sigura bienestar duradero a base di normanan y balornan Arubiano.

Na 2018 a keda demostra cu problemanan financiero y economico no ta un asunto di solamente cifra pero na prome luga di e mentalidad cu ta prevalece den e gobernacion di e pais. E amor pa un pais ta exigi pa demostra responsabilidad y duna prioridad na necesidad di e pais prome cu busca popularidad politico.

Patriotismo a resalta na 2018 ora a tuma medidanan di austeridad den un crisis financiero y economico y coregi falta di vision den maneho di fondonan di pueblo.

Solucion pa situacionnan severo cu tabata afecta e grado di bienestar y felicidad di e pueblo directamente, tabata exigi conocemento di e materia mas importante di Aruba cu ta e mentalidad y cultura Arubano, carga pa normanan y balornan di mas halto.

Parti di situacionnan cu a desaroya y na forma severo a afecta e calidad halto di bida na Aruba tabata importa y destila di problemanan internacional. Un gran parti di e factornan cu a conduci na sucesonan y desaroyonan sumamente tristo na Aruba, tabata directamente conecta na e falta di liderazgo segun espirito Arubano.

E grado di violencia, agresion, criminalidad cu a marca e sentido di insiguridad y a causa sufrimento grandi na Aruba, tabata exigi pa bolbe na e base mas importante di Aruba cu ta famia.

Gobernacion responsabel cu caracter duradero ta exigi pa percura cu awe y mañan un comunidad Arubano di calidad tin como su base e balornan y normanan Arubano cu na forma directo ta e arma di pueblo pa sigura bienestar y felicidad.

Famia ta e base mas importante di un comunidad y sigur e comunidad di Aruba cu a lucha semper pa mantencion di su identidad propio, di Arubianismo, basa riba reglanan di mas halto di moral y norma.

Famianan tabata y ta fortalesa di e pais, respeta pa mundo. Famianan sano den cual muchanan por desaroya y acepta nan encargo pa percura pa desaroyo positivo duradero di e pais.

Sigur den e era digital, den cual mundo ta topa pa aspectonan positivo y negativo, liderazgo ta exigi pa gobernacion sostene famia sano y asina directamente resolve problemanan grandi cu ta afecta paz, trankilidad y siguridad cu ta afecta calidad di bida.

Cu e proclamacion di aña 2019 como Aña di famia y di Cuido di Mucha, Gabinete Wever-Croes a demostra cu e ta asumi e responsabilidad mas grandi den planificacion di futuro duradero di un comunidad di calidad, cu ta na su turno exigencia di un bon gobernacion.

- Advertisement -

DUNA COMENTARIO

Please enter your comment!
Please enter your name here