Home General Homber casa cu un dama a casa cu un homber na Bonaire

Homber casa cu un dama a casa cu un homber na Bonaire

10719
0
SHARE
- Advertisement -

El a presenta awe den Corte y a haya castigo pa bigamia

ORANJESTAD (AAN) – Diahuebs mainta e homber A. a presenta den sala di Corte pa duna cuenta pa e delito cu e ta wordo acusa di dje. E sospechoso A. a admiti di ta casa cu un dama di Colombia pero no tabata sa cu ta prohibi pa casa dos biaha. El a bay casa na Bonaire cu un homber. Hues a confirma e castigo exigi pa Fiscal cu ta un castigo combina.

 ACUSA DI CASA DI DOS

Fiscal a bisa Hues cu e acusacion contra A. ta cu intencionalmente el a casa dos biaha (bigamia) door di casa riba 13 Januari 2018 na Bonaire cu un homber, mientras cu e tabata casa caba cu un muher Colombiano.

Hues a mustra cu Censo a haci denuncia di bigamia ora a constata cu A. a registra su matrimonio cu un homber na Bonaire siendo cu segun registro e ta casa cu un dama Colombiana. A. a bisa Hues cu e ta den proceso di divorcio cu e Colombiana. El a bisa Hues cu ningun hende, ni su famia tabata sa cu e ta casa cu un dama Colombiano. A. a splica cu el a wordo forza pa e mama di e dama pa casa cu e Colombiana pa asina e dama por establece na Aruba. Segun A. tur dia e mama di e dama tabata yam’e pa e casa cu su yiu y cu lo pag’e algo. Segun A. e no a haya placa. El a bay Colombia pa casa cu e dama, siendo cu e no tin ningun relacion cun’e.

Hues a hala A. su atencion cu e no por casa dos biaha pasobra esey ta bigamia. Segun A. e no tabata sa cu ta castigabel pa casa dos biaha. El a bisa cu si e tabata sa e no a bay casa. Hues a puntr’e pakico el a bay casa na Bonaire y no Aruba. A. a splica cu el a bay casa na Bonaire pasobra na Aruba no ta permiti e matrimonio di mesun sexo.

Hues a remarca cu na Bonaire, A. no a bisa cu e tabata casa na Colombia. Pakico? Segun A. e no tabata kier pa ningun hende sa. El a bisa cu e ta den relacion 2 aña caba cu su amigo y no kier perd’e. Ta asina cu pa e caso aki A. a wordo deteni pa algun dia y despues laga liber. Door di esaki el a perde trabou pero actualmente tin trabou.

 EXIGENCIA FISCAL

Fiscal ta haya legalmente proba cu A. a haci bigamia. El a bisa cu Censo a constata cu A. a casa dos biaha. Fiscal a remarca cu ta dificil pa kere cu A. no tabata sa cu e no por casa dos biaha. E ta haya cu ora di casa e ta wordo informa di esaki. Segun ley tin castigo pisa pa bigamia. Fiscal a bisa Hues cu ta promer biaha e ta trata un caso di bigamia. El a mustra cu tin castigo maximo di 1 aña di prison. El a bisa cu segun sentencianan, tin hendenan a haya castigo di prison pa bigamia. Na opinion di Fiscal, e parti malo di e caso aki ta cu A. a casa cu un dama Colombiano pa e dama por bin Aruba y establece su mes. Fiscal ta haya cu A. ta debil pa tuma decision. E ta wordo convenci facil. El a keda 3 dia sera. Fiscal a exigi 120 dia di prison di cual 117 dia ta condicional cu un tempo di prueba 2 aña.

 ABOGADO

Abogado mr. Cafarzuza a bisa Hues cu A. no tabata sa cu e no por casa dos biaha. El a casa na Colombia y no a kere cu esaki lo wordo registra. E no tin relacion cu e dama y a cuminsa un proceso di divorcio. Segun e abogado, ta e mama di e dama Colombiano a registra e matrimonio na Aruba y no A. E abogado a mustra cu segun nos ley, no ta reconoce casamento den exterior o sea no tin casamento. E unico casamento reconoci ta esun na Bonaire. Pesey e ta haya cu no por bisa cu A. a casa dos biaha (bigamia).

Fiscal a remarca cu segun hurisprudencia tanten cu no tin divorcio e ta keda dos casamento.

SENTENCIA

Hues a sera tratamento di e caso y a dicta sentencia di biaha. E ta haya legalmente proba cu A. a casa dos biaha intencional. Hues a rechaza e ponencia di abogado cu mester declara A. liber. Hues a mustra cu tin denuncia di Censo cu tin dos registro di casamento di A. esta uno na Colombia y despues na Bonaire. Esey ta haci A. culpable di bigamia. Hues a bisa A. cu promer e mester a percura pa a divorcia pa despues bay casa atrobe. Hues a confirma exigencia di Fiscal. El a condena A. na 120 dia di prison di cual 117 dia ta condicional cu tempo di prueba di 2 aña.

 

- Advertisement -

DUNA COMENTARIO

Please enter your comment!
Please enter your name here