Home Politica Husticia ta mustra claramente con Paul Croes no por splica di unda...

Husticia ta mustra claramente con Paul Croes no por splica di unda el a haya mas di mey miyon Florin

82
0
SHARE
- Advertisement -

ORANJESTAD (AAN): Parlamentario Endy Croes a splica di a sigui e caso di Paul Croes hopi di cerca. Sigur mester accentua cu tin comprension pa locual e famianan ta pasando aden.

Parlamentario Endy Croes ta bisa esaki pasobra e mes a pasa den un investigacion hopi pisa cu a dura algun aña y sigur e momentonan ey ta momentonan pisa den bida unda henter bo famia ta sufri y bo tarea ta pa mitiga e sufrimento, esta trata na no laga bo famia y amigonan nota cu bo ta pasando den duro pa nan por ta trankil.

Diferencia caso di Endy y di Paul:

Croes ta sigui bisa sinembargo e diferencia den esaki ta cu Parlamentario Endy Croes e tempo aya a worde persigui inhustamente politicamente door di AVP y Mike Eman na un manera di hendenan sin escrupulo y finalmente 3 hues a declara su persona liber di tur acusacion unda finalmente Endy Croes nunca mester a presenta dilanti tribunal den ningun strafzaak.

Tambe Parlamentario Croes ta bisa cu ta fresco den su memoria na 2013 momento cu el a subi riba lista politico despues di a worde declara liber di tur acusacion y su persona tabata pasando na e cruzada di Rio Grande, unda Paul Croes tabata tin su oficina di campaña, con sostenedornan di Paul Croes tabata grit’e como ladron y tanto Paul Croes y Juan David Irausquin tabata den e grupo aki y no a tuma ningun accion pero al parecer tabata aprecia locual tabata pasando.

Paul Croes a dispone di 538 mil Florin:

Parlamentario Croes ta sigui bisa, esaki ta e prijs cu tin biaha bo mester paga ora bo ta pasiona cu politica y ta sostene ideal di nos Libertador y su partido. Persecusion sin base pa bo por keda cu un mancha riba bo.

Awe nos ta mira con e scenario ta bolter y tin di haber cu un investigacion real y di berdad y no persecusion politico unda Ministerio Publico mediante su Fiscal a baha pisa riba hayazgonan cu nan a compila atrabes di e investigacion incluyendo tapmento di hopi telefon cu a trece e claridad con e grupo aki tabata opera. Un total di 23 sospechoso mas un ex Minister. Fiscal den su strafmaatmotivering a relata den un version di mas di 170 pagina diferente pasahe di e investigacion.

Ministerio Publico riba pagina 168 a skirbi textualmente: “Verder heeft het OM kunnen vaststellen dat Paul Croes beschikte over meer dan Afl.538.000,- dan verklaarbaar is.”  Esta despues di a haci investigacion profundo Ministerio Publico a determina y afirma  cu Paul Croes tin 538 mil Florin cu a keda inexplicabel con el a yega na e placa aki.

Ricibi placa a cambio di ontheffing:

Tambe OM a splica riba mesun pagina “Het openbaar ministerie heeft wel kunnen vaststellen dat Paul Croes in tientallen zaken beslissingen tot toelating tot de Arubaanse arbeidsmarkt heeft genomen en daarvoor een tegenprestatie heeft ontvangen.”

Pues aki OM ta confirma cu tin hopi prueba cu Paul Croes na varios ocasion a ricibi placa a cambio di duna ontheffing. Riba pagina 170 di e strafmaatmotivering Ministerio Publico ta bisa lo siguiente: “Croes heeft zich naar oordeel van het OM echter volledig gediskwalificeerd als ambtenaar. Het beste zou zijn als hij nooit meer enig ambt, politiek of anderszins zou bekleden, maar dat staat de wet niet toe.”

Pues Ministerio Publico ta considera e actonan di Paul Croes ta asina condenabel cu hasta OM  ta splica cu den nan opinion Paul Croes ta keda completamente descualifica como ambtenaar y mihor lo tabata ta cu nunca mas e lo por haya un funcion sea como ambtenaar of politico pero e ley no ta prescribi e parti aki.

Parlamentario Endy Croes ta termina bisando cu di acuerdo locual cu e por a lesa di OM nan lo bay pidi un castigo basta fuerte pa Paul Croes den e caso aki y asina manda un señal duro pa tur Politico y Gobernantenan. Ta di lamenta y claro tin comprension pa e familiarnan pero basa riba locual por a lesa di “feiten” cu OM ta papia di dje e caso aki ta uno hopi pisa, Endy Croes ta termina bisando.

- Advertisement -

DUNA COMENTARIO

Please enter your comment!
Please enter your name here