Home Deporte Jomark Flanegin ta conquista Premio “Oro” Royal Power

Jomark Flanegin ta conquista Premio “Oro” Royal Power

192
0
SHARE
- Advertisement -

ORANJESTAD (AAN)- E equipo campeon di aña 2018 esta SV Royal Power Tat Fat Home Depot a celebra nan Christmas party 20 di December ultimo na residencia di Mama Sofia esta Sta Cruz 38. Un anochi hopi bunita unda atletanan, dirigentenan, familiares di tur miembronan ta bini hunto pa un cena y goza di e ambiente unico a la Royal Power.  Jerrino Ridderstap y  D”Licious tambe tabata den cas pa asina pone ambiente te den oranan laat di anochi. Royal Power a invita tambe esnan cu a traha boluntario durante e campeonato femenino internacional di CONSURSA y brinda nan tambe un gratitud pa nan aporte. Despues di un dushi cena Presidente di SV Royal Power Sr. Endy Croes a bay over na dirigi algún palabra. A splica un poko di e historia di Royal Power. Un equipo cu a inicia desde decadanan atras bou nomber di Chuchubi, Honda, Video Center.

Endy Croes na su regreso di Hulanda hunto cu un directiva a tuma e equipo Video Center over y mesun aña a bira Pueblo Food Center y a titula campeón AA. Despues a bira First National Bank, Kwihi Power y desde 2003 a cambia di nomber y a bira Royal Power unda a join alaves Copa Noord. Endy Croes, Poy Flanegin y Gracindo Wester ta esnan cu a inicia e transición nobo bou di e nomber Royal Power desde aña 2003 y Franklin Odor a join directiva poko mas despues. Endy a splica e historia desde 2003 en adelante  y a conta e storia di e Royal Power di e tempo aya y e Royal Power di awe. Royal Power di 2003 pa 2013 a marca su historia y segun Endy Croes esaki lo keda graba den historia. Locual dirigentenan y directiva di Royal Power a considera fuertemente ta pa rehobenese e equipo poco poco tratando di keda competitivo y den top locual nan a logra tambe te cu awor. Solamente 3  soldat di 2003 ta activo of semi activo ainda ta Gregory Pilin Krosendijk , Richard Nunn Flanegin y Alvaro Barrios. Otronan atletanan kendenan a marca historia den e proceso manera Poy Flanegin, Gracindo Wester, Estefano Croes, Edward Cannister, Bob Peterson, Jimmy Tromp, Angelo Arnold, Pierre Richardson, Charro Loopstok, Jonathan y Joshua Ramada ta entre esnan cu sea a retira of awe ta milita den otro equipo.

Royal Power a rehobenese su equipo cu cautela y tin atletanan awe manera Eldrick Dijkhoff( kende a forma parti di tur dos epoca), Jomark Flanegin, Kenny Hart, Kelvin Silvania, Giandrick Lacle, Jair Thompson, Franco Wouters, Edmar Macho Tromp, Guyon Cannister, Dijendrick Croes, Luis Pelayo, Dayson Croes ta entre otro e hobennan cu a “take over” y “make over”  Royal Power y tin e tarea pa kibra record di e grandinan. Royal Power desde 2003 tin 14 titulo di campeon den 15 campeonato oficial  di fast pitch di Aruba. Den Copa Noord a logra hunga den 12 final den 15 aña cu un total di 8 titulo di campeon. Den  Champ of The Champs un torneo internacional di mas grandi den Caribe  a logra hunga den 11 final consecutivo den 11  di existencia di Champo of The Champs di cual a titula 9 aña campeón y 2 sub campeón. Sin conta torneonan habri Royal Power ta disputa di un record hopi amplio y ta ilustra asina nan deseo, disciplina, dedicacion y determinacion pa cu e deporte.

Royal Power ta reparti un premio special fin di aña esta e Premio “ORO” di SV Royal Power cual ta bay  pa un atleta kende a destaca den henter aña y a cumpli cu diferente rekisito cu bo mester cumpli cune pa bin na remarke pa e premio aki entre otro e 4D. Jomark Flanegin ta conquista e Premio “ORO” di SV Royal Power pa cu aña 2018. Pabien Jomark Flanegin pero pabien na tur atleta cu a aporta pa Royal Power titula Campeon Copa Noord y campeón di Fast Pitch di Aruba Softball Bond den 2018. Un celebración na su lugar cu tremendo animación di D”Licious unda Jerrino Ridderstap durante su presentación  a proclama y priminti  cu lo traha un canción pa Royal Power den 2019. D”Licious tabata fabuloso.  Danki na tur esnan cu a sostene Royal Power den 2018 y ban traha duro pa por tin un tremendo anja den 2019. Aruba un Felis y Prospero aña 2019.

- Advertisement -

DUNA COMENTARIO

Please enter your comment!
Please enter your name here