Minister di Husticia di St. Maarten:
ORANJESTAD(AAN): Tur e ministernan di Husticia cu a participa na e asina yama JVO, esta e ministernan di Aruba, Corsow, St. Maarten y Hulanda a keda satisfecho cu e encuentro di e ministernan na Aruba, den cual a yega na palabracionnan riba diferente asunto importante pa loke ta combatimento di criminalidad.
Esey ta conta tambe pa Minister di Husticia di St. Maarten Cornelius de Weever.
Durante un conferencia di prensa despues di firmamento di dos protocol y un memorandum of understanding, de Weever a gradici tur su coleganan pa e bon cooperacion cu tabata tin.
“Awe tabata un ehempel claro di respet mutuo y comprension pa e situacion y limitacionnan di otro”.
“Mi ta kere cu via cooperacion nos por logra masha hopi mes”.
“St. Maarten a wordo uza como ehempel specialmente pa loke ta RST y esaki lo fortalece nos cooperacion mas ainda”.
Esaki segun de Weever, kende a sigui bisa cu e ta warda cu anticipacion riba e proximo JVO, cu ta bay ta na St. Maarten na Juli.
