Home Enseñanza Muchanan di scol preparatorio a haya informacion riba proyecto nobo den ramo...

Muchanan di scol preparatorio a haya informacion riba proyecto nobo den ramo di turismo

48
0
SHARE
- Advertisement -

ORANJESTAD (AAN): Alumnonan di Klas 6B di Scol Preparatorio Kudawecha a ricibi bishita di Aruba Hotel & Tourism Association (AHATA) y Kids Council Program, pa cuminsa un proyecto nobo den ramo turistico.

Laurentien van Oranje a funda De Missing Chapter Foundation (incluyendo e programa Kids Council) na 2010 y e obhetivo di e fundacion ta pa contribui na solucion pa comunidad y tuma na cuenta e perspectiva di mucha y adolescente. AHATA a bira pionero den traha cu Conseho di Mucha desde October 2015 hunto cu otro partnernan den sector di turismo.

Mirla Passchier, Project Manager di Kids Concil Program, a splica e muchanan tocante e programa y con nan por participa den busca solucion pa nos comunidad.

CEO di AHATA, Tisa LaSorte y AHATA su manager administrativo, Vanessa Rasmussen, a haci un presentacion na e alumnonan tocante e rol di AHATA y e importancia di turismo na Aruba. Despues a introduci e dilema, cual ta pa motiva mas persona local pa traha den sector di turismo y sostene e pilar di nos economia, specialmente e hobennan.

E muchanan a demostra gran interes den e topico y a haci diferente pregunta y comentario interesante. Siguientemente, nan lo haci research, cu guia di nan docente Rene Kannegieter, pa nan por finalmente presenta nan conseho na AHATA.

Tisa LaSorte a considera e presentacion di introduccion un exito y a keda impresiona cu e pregunta y comentario di e alumnonan, bisando: “Ta un placer di traha cu mucha y siña di nan, alabes pa duna nos hubentud e oportunidad di participa den asunto importante.”

Den pasado AHATA a traha cu e Conseho di Mucha y diferente scol cu bon resultado, y ta keda entusiasma pa sigui traha cu alumnonan y scucha nan conseho. AHATA ta gradici Mirla Passchier y Rene Kannegieter pa nan atencion y colaboracion, y tambe Scol Preparatorio Kudawecha pa e participacion.

 

- Advertisement -

DUNA COMENTARIO

Please enter your comment!
Please enter your name here