Home General Seis comerciante sospecha di a cumpra Paul Croes dilanti Hues

Seis comerciante sospecha di a cumpra Paul Croes dilanti Hues

1339
0
SHARE
- Advertisement -

ORANJESTAD  (AAN)  – Ayera mainta 6 sospechoso di a cumpra Paul Croes pa haya dispensacion di permiso, a presenta dilanti Hues. Ta trata aki di: Marco Arango Quinceno, Jairco Wever, dama Hang Chang Fung, Luis Ochoa Ramirez, Robio Di Vecchia, Franklyn Bareño. Paul Croes tabata presente y a duna su comentario riba declaracionnan.

Fiscal a bisa cu tur ta sospecha di a cumpra minister Paul Croes pa haya dispensacion di permiso.

LUIS OCHOA RAMIREZ

Hues a puntra Luis si e sa di kico e caso ta. Segun Luis el a pidi un cooperacion di Paul pa un extranhero bin reemplace pa asina e por bay Colombia. Hues a bisa cu Luis ta un empresario y mester di trahadornan. Segun Luis e tabata malo y e persona lo tuma over e negoshi pa e por bay Colombia.

El a bisa cu Paul ta su amigo y e ta afilia cu e partido di Paul. Hues a bisa cu den pasado caba Luis a haya dispensacion di permiso di Paul. Luis a bisa Hues cu no y cu mester a cambia firma pa otro negoshi, un restaurant. Hues a mustra cu tin sospecho di 4 caso di a haya dispensacion y lo a paga Paul.

Segun Luis no ta asina. Hues a bisa cu na final 2016, tin combersacion graba caminda Paul a pidi pa cahanan di cerbez pa concierto cu Paul su partido a organiza. Segun Luis e ta kere cu el a duna Paul dos caha di cerbez como amigo. El a bisa Hues cu esey ta algo normal. Hues a mustra cu for di combersacion scucha ta saca afor cu Luis a bisa Paul cu e no tin pero e por cumpra dos caha di cerbez pa Paul. Hues a mustra cu Luis a papia cu Paul si e por haya permiso pa haya dos dama pa traha den un bar.

E tabata kier a topa cu Paul caminda e lo duna e dos cahanan di cerbez. Hues a bisa cu tin combersacion entre Luis y Aparicio caminda Aparicio tabata negosha pa haya cahanan di cerbez. El a pidi 5 y Luis a bisa cu e por duna 2. Ora Hues tabata lesa esaki, Luis tabata sacudi cabez. El a bisa cu e no sa nada di esey. El a bisa cu por bien ta cu a pidi hopi cos pero e no a duna nada. El a bisa Hues cu e tabata yuda Paul pa e partido cu e ta afilia cun’e y sin ningun interes. E ta considera cu el a haci un fabor na Paul den tempo di Pasco.

Paul Croes a reacciona riba e declaracion di Luis. El a bisa Hues cu aki ta un evento politico, Concierto Di Speranza. Segun Paul, ta manera Luis mes a bisa cu ta un evento politico y no tin nada di haci cu dispensacion di permiso. E dispensacion tabata dos aña promer y no tin nada di haci cu e combersacion aki. Hues a remarca cu tabatin peticion pa dos dama. Paul a bisa cu e no ta corda nada di esey.

Abogado mr. Faarup ta haya cu a interpreta parti di un combersacion robez. “Como esta la cosa, bien”. Esey no kiermen, con ta cu e cos. Esey ta e forma con nan ta cuminda otro.

DI VECCHIA

Di Vecchia a bisa Hues cu el a keda sorprendi cu e ta wordo mira como sospechoso. El a bisa di conoce Paul pa hopi tempo y cu e tin compania di instala airco y a haci esaki na cas di Paul. Hues a bisa cu Di Vecchia a bay instala sistema di airco y a duna descuento y di otro banda a pidi dispensacion di permiso.

Segun Di Vecchia, el a haci palabracion cu Paul cu e ta duna descuento pa Paul haci propaganda p’e pa e bende airco. El a bisa cu Paul a haci bon propaganda p’e y a haya cliente. Segun Di Vecchia, na 2016 el a pidi pa prolongacion di permiso y a keda sorprendi cu DPL a rechaza esaki. Di DPL a bis’e cu e por protesta y mester bay minister Paul. Hues a mustra cu tin combersacion scucha entre Paul cu Di Vecchia y Paul a bis’e cu e por yud’e cu permiso y cu e mester di un airco.

Di Vecchia a splica Hues cu el a avisa Paul cu e mester di un airco mas grandi y a resulta cu ta asina. Hues a bisa Di Vecchia cu e mester compronde cu e combersacionnan cu a scucha ta crea sospecho. Hues a bisa cu tin combersacion caminda Di Vecchia a puntra Paul con ta para cu e prolongacion di permiso. Paul a bis’e cu esaki a keda regla y Di Vecchia a puntr’e con ta bay cu e airco.

Paul a reacciona cu aki Fiscal ta crea un relacion robez cu pa un airco ta regla permiso.  Hues a remarca cu no tin indicacion cu Paul a haya placa pero si cada vez ta mira cu e ta haya algo na momento di permiso. Paul a reacciona cu como politico, e no por haya un descuento? E ta haya cu Fiscal a bay mucho leu pa interpreta cosnan robez.

BAREÑO

Doño di Bright Bakery, Bareño a bisa Hues cu tur hende a keda sorprendi cu e acusacion cu el a cumpra Paul. El a bisa cu ta inhusto. Hues a mustra cu Paul a yuda cu dispensacion di permiso.

Segun Bareño, e empresa a pidi permiso pa empleado. Hues a mustra cu tin prueba cu Bareño a paga Paul. Segun Bareño el a haci donacion pa torneo di bowling y tambe concierto di Pasco.

Hues a mustra cu Bareño a haci deposito riba Stichting di Paul Croes. Segun Bareño, el a haya carta di Stichting cu tabata pidi donacion. Hues a mustra cu investigacion ta mustra cu Bareño a paga 4000 florin na 2014 y na 2016 a dona 5000 florin. Hues a bisa cu riba e lista di donacionnan, Bareño tabata un di esnan mas halto.

Bareño a bisa Hues cu el a haci masha hopi donacion na Stichting. El a bisa cu el a haya 2 mesa pero e mes no a bay. Segun Bareño, Paul pa medio di e Stichting a pidi donacion di 5000 florin y el a haci’e. Bareño a bisa Hues, ccu el a sponser Paul pa campaña y a haci’e pa otro partidonan tambe. Hues a remarca cu si ta haci asina hopi donacion y sponser, Bareño lo mester tabata kier algo a cambio. Bareño a bisa Hues cu e no ta haci’e pa haya fabor politico bek. El a splica Hues cu e ta bin di un famia politico y ta costumber cu ta haci donacion na partidonan y no pa fabor.

Hues a mustra cu tin grabacion di combersacion caminda a scucha Bareño puntra Paul con a para cu e permiso. Bareño a bisa cu tin permiso a keda rechaza pa DPL y nan ta bis’e pa check cu minister. Segun Bareño tur e personanan cu e mester, ta personanan cu bo no ta haya na Aruba. Hues a remarca cu segun investigacion, Bareño ta un di esnan cu a haya mas dispensacion di permiso. Hues a bisa cu por spera cu Fiscal lo bisa cu e cantidad di placanan cu a dona y e cantidad di permisonan cu a haya tin relacion cu otro entre 2015 y 2016.

Paul a bisa Hues cu el a studia na Hulanda politica y no mester mira e caso manera Hues ta bisa cu empresanan ta haci donacion pa haya algo bek. Na Aruba tin empresanan cu ta haci donacion na politiconan pa yuda e pais. E tin berguenza cu empresarionan ta wordo persigui pa algo cu no ta manera Fiscal ta pretende.

CHANG FUNG

E dama Chang Fung doño di un supermercado, a bisa Hues cu e tabatin mester di hende pa traha y pa añas e tabata ocupa. Simeon Mong a yud’e cu permisonan. Hues a bisa cu Simoen a declara cu el a pidi Chang Fung placa pa regla permisonan. Segun Chang Fung, su casa mester a bay China pasobra su tata tabata hopi malo y mester bay urgente.

Ariba pregunta di Hues si tabata normal cu a paga pa permisonan, Segun Chang Fung a bisa cu no tabata normnal pero a paga 1500 florin y dos caha cerbez y boter di whisky pero no a hiba bebidanan. Simeon Mong a bis’e cu Paul kier 1500 florin y e bebidanan.

Segun Chang Fung, e sa cu Simeon Mong a haci malo pero e tabatin mester di hende pa su casa bay China. E dama a bisa cu su casa a bay China na tempo pa haya su tata na bida. Entretanto e tata a fayece. Chang Fung a bisa Hues cu e sa cu ta malo pa paga haya algo pero e ta haya cu e no mester wordo persigui.

Fiscal a remarca cu tin combersacion entre Simeon y Paul tocante di e 1000 dollar pa permiso. Pero Paul a bisa cu e no a haya placa sino Simeon. Paul no ta haya cu esaki no ta contra di ley. 

WEVER

Wever director di un PMEC, a bisa Hues cu e ta decepciona. El a bisa ora di traspaso Valero pa Citco, tabatin un protocol cera y mester di Paul pa hendenan. E palabracion tabata cu lo sigui ehecuta e protocol di Valero y e departamento di gobierno lo mantene esaki.

E protocol ta encera cu extranheronan ta bin Aruba y aki lo cuminsa e proceso pa permiso. Segun Wever, Paul a haci su trabou pa tin reunion cu DIMAS pa ehecuta e protocol. Hues a mustra cu despues di esey, Wever a haya carta di Stichting pa haci donacion y Wever a haci donacion di 1500 florin. Hues a bisa cu Wever a bisa Polis, el a haya un sentimento negativo cu e carta. Wever a bisa cu esey ta despues cu el a mira tur e cosnan cu a sali den publicidad. Hues a bisa cu Wever lo a expresa cu e no por nenga di duna donacion pasobra Aruba ta un isla chikito.

Segun Wever a interpreta su expresion robez. El a bisa Hues cu ta diferente ora bo ta bisa algo y ora hende ta pone palabra den bo boca. E ta referi aki durante su interogacion lo a pone haci cierto declaracion cu no ta loke e kier a bisa. Hues a puntra si no ta asina cu placa kier a gana un bon relacion cu Paul. Wever a bisa Hues cu absolutamente no ta asina cu placa e kier crea relacion cu Paul. Hues a puntra pakico a haci donacion na Paul. Wever a bisa cu segun e cultura di Aruba, ta duna bek na comunidad. El a bisa Hues cu e compania ta haci donacion na diferente stichting y no solamente politico.

Fiscal a remarca cu manera Paul a haya carta di Wever tocante permiso, el a instrui Capriles pa manda un carta di Stichting pa Wever. Esaki tabata un casualidad of no? Paul a splica cu a manda pidi sponser adelanta pa e campaña. Na opinion di Pual, no ta manera Fiscal ta pretende cu lo a manda carta pa donacion. Paul a bisa Hues cu pa gobierno, e apertura di Citco tabata un prioridad.

Fiscal a bisa cu riba peticion di Wever a scucha un empleado Krozendijk cu e mustra e protocol. Segun Fiscal, segun e protocol lo mester bay DPL pa haya hende y no mester haya dispensacion di permiso. Segun Wever lo tabata mucho mas mihor pa haya hende local cu ta cumpli cu e rekisitonan pasobra e ora ey no mester bay busca lugar pa hende biba, etc. Fiscal ta haya cu door di e dispensacion di Paul, Wever tin seguridad cu lo haya hende di exterior pa traha. 

ARANGO QUINCENO

Hues a puntra Arango Quinceno di Don Jacinto Restaurant si e acusacion ta cuadra. Arango Quinceno a nenga di a haci soborno. Arango a splica con a spaar placa y a cuminsa un restaurant. A cuminsa busca hende y e restaurant a crece. A yega momento cu mester mas trahador. Su señora tabata cushina y Arango atende cliente. DPL a rechaza e peticionnan pa haya empleadonan.

Segun Arango, tabata a punto sera restaurant. A yega na minister Paul. A logra haya un cita y a mustr’e e situacion. E minister a bisa cu e lo bay mira kico e lo por haci. Nan a laga tur e documentonan di DPL atras. Despues a haya tres pa cuater permiso a keda resolve. A haya tres pa cuater empleado cu a yuda drecha situacion di restaurant. Despues a haya carta di minister pa donacion pa fundacionnan.

Nan a scoge fundacion Sonrisa. Mester a dona 15 mil florin. Segun Arango, nan a spaar te yena na e placa aki. E motibo cu a scoge Sonrisa ta pasobra cu e yiu di e señora ta bay Sonrisa. Nan a keda hopi satisfecho cu a colabora cu Sonrisa.

Segun Arango durante interogacion miembronan di Recherche a mustr’e copia di cheque di 2500 florin. Mientras cu e tabata splica, Fiscal a pidi Hues pa declar’e liber pa esaki.

Hues a mustra cu tin cheque di 5 mil y un di 2500 florin manda pa Stichting. Segun Arango el a laga chequenan habri y lo ta su señora a yena esakinan y haci donacion na Stichting di Paul.

Paul a remarca cu e ta haya di mala fe di Fiscal di mescla un cos cu otro. El a splica cu a crea posibilidad pa sector priva yuda fundacionnan. Esey ta loke Don Jacinto a haci. Awor Fiscal ta crea e imagen cu door di Paul duna dispensacion y Paul a crea Stichting pa nan haci donacion. Hues a remarca cu e sospecho ta cu a favorece otro fundacion cu donacionnan.

Paul a bisa cu a manda carta pa Don Jacinto pa donacionnan pa eventonan politico. A haya un cheque di 5 mil florin y 2500 florin cash. Hues a bisa cu segun Polis, esaki ta un capa pa hustifica placanan cu tabata haya. Paul a bisa cu esaki ta un pensamento robez. Hues a mustra cu tin grabacion di Paul a bisa cu si Don Jacinto haci fastioso, mand’e su number y ami lo bisa nan cu a yuda nan.

- Advertisement -

DUNA COMENTARIO

Please enter your comment!
Please enter your name here