Rooster 2019-2020 cu un siman di vacacion den carnaval:
ORANJESTAD (AAN)—Den entrevista cu Josephine Albertus, Presidente di Sindicato di Maestronan di Aruba (SIMAR), el a elabora tocante e rooster escolar 2019-2020.
El a splica cu esaki a wordo prepara na aña 2017 pero te awo a keda presenta, y den dje a pone un siman di vacacion den temporada di carnaval, locual SIMAR ta haya ta un decision iresponsable.
El a splica cu semper, e Departamento di Enseñanza ta traha un concepto di rooster, dos aña prome cu esaki tin cu drenta na vigor.
Esaki Departamento di Enseñanza ta mande pa Inspeccion di Enseñanza, directivanan di scol, y SIMAR pa nan por wak’e, lese y duna nan input.
Ora esaki bay bek pa Departamento di Enseñanza, nan hunto cu e minister ta tuma e decision final y e ora ey e ta drenta na vigor.
Sra. Albertus a duna di conoce cu ora SIMAR a wak e rooster di 2019-2020, cu tin indicacion cu tin maestronan mal contento cune, el a wordo aproba for di 2017 caba. Kiermen, e no ta algo di aworaki; aworaki el a wordo presenta pero for di dos aña pasa el a keda acepta.
E dama a señala cu ora el a papia cu e bestuur anterior tocante e asunto aki, nan a indica cu e decision pa pone un siman di vacacion den e temporada di carnaval no ta responsable.
Esaki mirando cu e middelbaar onderwijs ta traha cu trimester y e di dos trimester ta cortico y si kita un siman di dje e ta bira mas cortico.
Alumnonan cu wordo prepara pa examen y aworaki tin un siman menos pa nan wordo prepara pe.
Sra. Josephine Albertus a splica u e bestuur a indica cu esaki ta un decision iresponsable. El a reitera: “E ta algo cu ta wordo publica awor, pero el a keda aproba na Juni aña 2017 (door di e minister anterior) y e ta bira e rooster pa 2019-2020”.
Sra. Albertus a splica cu SIMAR kier bay cerca e minister di awor, pa puntre tocante e decision aki, pa despues bay na e docentenan pa splica nan pakico, pero na e momentonan aki ta algo cu ta foi di e sindicato su man.
Sra. Albertus a indica cu e decision aki ta afecta henter e sistema di enseñanza, pasobra awor con ta bay bisa cu tin cu hala e periodo di examen un siman y wak con ta fix in tur cos pa prepara e alumnonan, y aworaki un siman menos nan tin; un siman ta wordo kita pa por prepara e alumno.
El a splica tambe cu e summer vacacion lo bay cuminza mas laat y e ta bay bira cuater dia mas cortico tambe, ademas cu lo afecta e periodo di vacacion di fin di aña, cu e maestronan ya ta hopi cansa caba y nan tambe kier un pause.
