Home General Tin mester di famianan di crianza pa muchanan entre 6 y 12...

Tin mester di famianan di crianza pa muchanan entre 6 y 12 aña

76
0
SHARE
- Advertisement -

Actualmente tin scarcedad di famia pa e grupo di edad aki

ORANJESTAD (AAN): Nathalie Tromp ta trahador social na Centro Famia di Crianza  Arubano (CFCA) y den entrevista cu DIARIO el a conta cu 2018 tabata tin su retonan pa e centro.

Aña pasa a haya varios famia pa yuda cu e crianza di mucha. Ta trata di famianan cu kier yuda e muchanan mas chikito, bao di 5 aña.

Tromp a bisa cu esaki ta algo comprendibel pasobra esey ta “sona” mas facil, e muchanan ta chikito. Pero e asunto ta cu e centro no ta haya solamente peticion pa muchanan chikito pero nan ta haya peticion pa muchanan ariba 5 aña.

E centro ta atende cu muchanan entre 0 cu 18 aña y ta keda e muchanan mas grandi cu tambe ta pasa den un situacion cu no ta bon pa nan na cas.

Cu por ta tin hopi tempo caba den un internado y cu nan merece di topa un famia of un persona den nan bida cu kier pasa momentonan alegre cu nan, pasa dia, of cu kier brinda nan te hasta un hogar.

Segun e trahador social, asina cu Januari 2019 a habri, e centro a haya 7 mucha cu tabata caba na 2018 y cu ta entre 6 cu 12 aña. Tin di nan ta mucha cu no por bay biba cu un famia door di locual nan a pasa aden manera trauma cu nan tin, etc.

Esey ta pone cu nan tin cierto comportacion, cu tin di nan cu no ta pas den un famia, pero e otronan si. E muchanan aki e centro ta keda busca famia, pasadia y oa e otronan ta keda busca famianan di weekend.

E muchanan aki manera cu e tempo ta sigui pasa cu nan ta custumbra mas cu e famianan y e famianan na nan, cu e ora e mucha por bay biba cerca e famia. Esaki ta famianan cu ta habri pa e muchanan bay biba “full time” cerca nan.

Na e momentonan aki tin algun famia cu ta disponibel, pero mayoria di nan ta habri pa atende cu baby.

Centro di Famia di Crianza Arubano ta haya muchanan recien naci, pero no ta asina cu constantemente ta drenta un baby. Pero si muchanan di edad mas grandi, a bisa.

Si e centro no tin famia di crianza disponibel ta bira hopi fastioso pa por yuda e muchanan aki. E ora e muchanan ta keda masha tempo mes den nan internado. E internadonan ta haci un bunita trabao, pero e internadonan ta pa un momento cu por ta largo, te ora cu e muchanan por bay cerca un famia di crianza.

“Esey ta locual nos ta pidi comunidad di Aruba, si e ta den bo curazon, si e ta den bo mente pa yuda un mucha, please acerca nos pa asina eynan bo tende con bo por yuda un mucha”, Natalie Tromp a remarca.

COMPORTACION

Tin diferente factor cu mester compronde tocante e comportacion di e muchanan mas grandi. Nan comportacion, por ehempel, tin di haber cu e echo cu e cas di e famia di crianza no ta e cas di e mucha y e tin cu bin cu un manera con pa proteha su mes.

E mucha aki tin hopi factor emocional rond cu ta traha riba dje y cu ta pasa den nan cas. Nan tin cu laga nan mayornan atras, nan no por wak nan ruman (nan).

Ta hopi cos cu mester siña e famia di crianza pa asina siña compronde y yuda e mucha. Tin biaha ta pensa cu e mucha ta comporta di un manera pasobra e ta mala mucha. Pero nan comportacion ta bin pa un motivo.

Tin mester di famianan cu ta habri pa haya e informacion y pa compronde e mucha mihor. “Sino bo ta give up hopi lihe”, Sra. Tromp a indica.

BIRA FAMIA DI CRIANZA

Segun e representante di Centro di Famia di Crianza Arubano, prome cu un famia por bira famia di crianza ta bin un proceso di “screening” y un parti di esaki ta e “stap cursus” unda cu nan ta wordo prepara pa ricibi e mucha cerca nan na cas.

Unbes cu e famia tin e mucha na cas, nan ta hay e guia di CFCA.

SCARCEDAD FAMIA

Nathalie Tromp a remarca ariba e hecho cu tin mester di famianan di crianza, vooral pa e muchanan mas grandi.

Tin muchanan cu no por bay mas bek cerca nan famia biologico y pa e muchanan aki tin mester di famia di crianza. Ta trata di 7 mucha entre 6 y 12 aña. Tin dos di e muchanan aki cu ta buscando famia di crianza pa pasa dia y no pa bay keda biba. 

CONTACTO

E famianan of personanan interesa den bira famia di crianza por tuma contacto cu e number 582-0088 of 582-0089 y pidi un cita pa asina haya mas informacion. Tambe por comunica via facebook CFCA Aruba of email cfca@setarnet.aw.

- Advertisement -

DUNA COMENTARIO

Please enter your comment!
Please enter your name here