Home General Titularnan noticia DIARIO durante e aña nobo

Titularnan noticia DIARIO durante e aña nobo

121
0
SHARE
- Advertisement -

Inventario di informacion cu por spera na 2019

Kico Aruba por spera den e aña nobo?  Na un pais democratico, planificacion ta parti di bon gobernacion y bon funcionamento di tur sector priva di e comunidad. Como matutino di Aruba, awe DIARIO ta presenta un resumen di parti di noticia cu e lo presenta na su lectornan durante e aña nobo segun planificacion periodistico, baluarte di democracia.

 

PRESENTE

Y FUTURO

DI CITGO

 

E creacion di pilarnan adicional di economia, no por spera mas. For di 2014 tabata evidente cu Aruba tabatin necesidad di expansion economico.

E pais tabata den un situacion sumamente delicado, ora gobierno anterior a uni forsa cu Venezuela pa rehabilita e refineria di Aruba contra tur advertencia internacional.

Na 2018 e refineria no a habri su porta pero a bira titular internacional. Mientras ni Venezuela, ni PDVSA ni CITGO por a duna gobierno nobo di Aruba un contesta kico lo pasa cu e proyecto, a scrap e proyecto for di presupuesto y listanan oficial di proyecto di e pais.

Mientras Venezuela no por paga su debenan mas, e ultimo informacionnan di 2018 tabata indica cu Venezuela lo perde CITGO. Futuro ta mustra mas cu scur pa e proyecto.

 

BASE MILITAR

Y PODER RUSO

DEN CARIBE

 

Debenan enorme di Venezuela na Rusia, a entrega e pais Latino Americano na Rusia cu tin mita di CITGO como borg.

Na final di 2018, informacion concreto a mustra cu Rusia tabatin gran parti di e minanan di petrolero y di gas di Venezuela den su man. Ademas Rusia a expande su poder den mineria di oro.

Venezuela no por debolbe Rusia e sumanan cu e debe mescos cu ta e caso cu China. E dos paisnan ta expande nan poder na Venezuela.

Un base militar Ruso den porta di Aruba, ta crea e expectativanan di un segundo Cuba den Caribe.

 

TURISMO Y

COMPETENCIA

GRANDI PA

UNICO PILAR

 

Fragilidad di turismo como pilar economico di cualkier destinacion conoci actual, a ser confirma na 2018.

Competencia severo ta aumenta rond mundo. Paisnan pober ta haya asistencia cu fondonan special pa desaroya turismo. Paisnan rico manera China, Canada y estadonan Europeo, ta inverti sumanan enorme den atraccion di turismo na nan pais.

Con Aruba lo adopta su turismo cu no a conoce e diversificacion cu mester a tuma luga? Un moratorio pa construccion di hotelnan a wordo introduci.

Na December 2018, anuncionan importante a wordo haci riba conservacion di naturalesa y infrastructura.  Paso a paso lo sigui desaroyonan na 2019 ora destinacionnan den Caribe, destrui dor di horcan, ta ricibi turistanan atrobe y ta bira mas competencia.

Diversificacion di economia y sosten na empresanan chikito pa sostene turismo lo wordo presenta.

 

PETROLEO

Y GUERA FRIU

MENASA PA

TURISMO

 

Dos aspecto cu DIARIO lo cubri di acerca, ta e prijs di petroleo y e escalacion di un guera friu entre Merca y Rusia den region di Caribe.

Aumento di prijs di petroleo, cu a baha na 2018, por bira realidad na 2019 ora OPEC lo perde su poder, cu a conduci na e crisis di petroleo na añanan 70 y 80.

Prijs mas halto di petroleo lo ta peliger pa turismo debi na aumento di prijs na Merca, pais di origen di e gran mayoria di turista pa Aruba.

Un guera friu den Caribe lo tin impacto negativo pa Aruba, mas ainda cu un refineria cu a huur cu CITGO di Venezuela, cu a duna Rusia casi mita di e propiedad na 2014.

 

NACIONNAN

UNI TA DICIDI

RIBA CANNABIS

MEDICINAL

 

Manera DIARIO a anuncia na 2018, na maart 2019 e Comision di Narcotica di Nacionnan Uni lo atende e resultadonan di investigacion di e organisacion mundial pa salud riba marihuana medicinal.

Lo mester dicidi si ta legalisa uzo di marihuana medicinal, cu actualmente ta riba e lista di droga cu Gobiernonan mester controla.

 

TRASPASO

DI FORTUNA

ENTRE

GENERACION

 

E traspaso di poder y fortuna mas grandi den historia lo ta topico di informacionnan importante cu DIARIO lo presenta na su lectornan.

Na 2018 DIARIO a enfatisa riba e topico aki, cu lo tin influencia grandi riba comercio internacional pero tambe e maneho di sectornan priva y local.

E generacionnan nobo di profesionalnan, gerentenan, trahadonan, famia, organisacion y tur loke ta parti di comunidad a base di exigencianan cu ta surgi, lo haya amplio cobertura.

 

CRISIS

HUMANO

Y AIDS

 

E problemanan humanitario rond mundo ta provoca expansion di e riesgo di enfermedadnan contagioso peligroso, cu mundo tabatin bou control.

AIDS ta ocupa un luga importante riba e lista.

DIARIO lo sigui informa a base di informacion concreto di World Health Organization y tur instancia oficial.

 

ANALISIS DI

RELATONAN

OFICIAL

 

Democracia ta exigi pa pueblo comprende informacion cu ta ser presenta. Den analisis, resumen y informacionnan exclusivo, DIARIO lo presenta relatonan oficial na un forma cu pueblo por cera conoci cu tur desaroyo.

Den un tempo cu tur Arubiano mester coopera den recuperacion di e pais, DIARIO lo presenta den profundidad planificacion local y internacional pa 2019 y futuro.

Planificacion di e comunidad di Aruba y organisacion mundial lo ta base pa informacion integral di e matutino di Aruba, DIARIO na 2019.

- Advertisement -

DUNA COMENTARIO

Please enter your comment!
Please enter your name here