Home Hudicial Trinta luna di prison exigi pa homber cu a bati su dos...

Trinta luna di prison exigi pa homber cu a bati su dos yiunan y a haci actonan inmoral cu dos prima

659
0
SHARE
????????????????????????????????????
- Advertisement -

ORANJESTAD (AAN): E homber Venezolano biba na Aruba V., riba Diabierna a scucha Fiscal exigi 30 luna di prison p’e. Fiscal ta haya V. culpable di a bati su dos yiunan y a haci actonan inmoral cu dos prima tempo nan tabata mucha.

  1. a bisa Hues cu el a dal su yiunan pero pa coregi nan y pa mustra disciplina. El a desmenti un di e acusacionnan di acto inmoral cu un prima. E otro acusacion el a admiti cu un biaha so su prima a mishi cun’e y despues el a mishi cun’e. Esaki a sosode na Venezuela. Abogado mr. Lejuez ta haya cu henter e asunto aki ta un forma di set up contra su cliente pasobra e tabatin problema cu su ex señora.

ACUSACIONNAN:

Den sala di Corte tabata presente e ex señora di V. y su yiunan. Tambe tabatin familiarnan sinta den sala di Corte. Tur a presenta pa scucha e caso. Fiscal a bisa Hues cu tin acusacion contra V.

E promer acusacion ta cu V. a maltrata su dos yiunan, mucha homber y mucha muher entre Juni 2009 y April 2018.  E forma con V. tabata maltrata nan tabata dal nan cu wanta y/of arma manera faha, taki di mata of slof.

Tambe V. ta worde acusa di a haci actonan sexual contra un dama bao di 16 aña entre 10 Juni 1996 y 9 Juni 2004. Tambe Fiscal ta acusa V. di a haci actonan sexual contra un otro dama bao di 16 aña entre 11 Juni 2002 y 10 Juni 2004. Tur dos dama ta prima di V.

MALTRATO YIUNAN:

Hues a mustra cu V. a admiti di a maltrata su yiunan cu faha, slof y taki di mata. Ta asina cu e yiu muher a worde maltrata cu taki hasta cu el a sangra. Tambe V. a admiti di a dal e yiu muher cu man.

Segun V., nunca el a haci’e pa haci nan daño sino pa coregi nan pa duna disciplina. Hues a remarca cu tanto e ex casa di V. como e yiunan ta considera e maltrato exagera. V. a bisa cu nan por ta tum’e asina pero el a haci’e pa coregi nan.

ACTONAN IMORAL:

Hues a mustra cu V. ta worde sospecha di a haci actonan inmoral cu un prima cu e tempo ey tabatin 4 aña te cu su 16 aña. Hues a bisa cu e dama a bisa cu V. tabata mishi na su parti intimo tanto na Aruba y na Venezuela durante un periodo largo.

Hues a mustra cu V. a admiti cu enberdad na Venezuela el a mishi cu e mucha un biaha so y tambe na Aruba un biaha so e mucha a bin den camber y a kita su paña pero nada a pasa. Hues a bisa cu segun e mucha, diferente biaha V. a mishi cun’e.

Hues a remarca cu con por ta cu segun V. ta promer biaha na Venezuela den truck, siendo cu e tabata den e truck cu un otro persona kende tabata na soño. Hues ta kere cu mester a sosode mas biaha cu e cos a bay cu asina confianza. Segun V. ta e mucha a cuminsa mishi cun’e y el a mishi cu e mucha su parti intimo.

E otro caso ta un otro dama prima cu a bisa cu tempo e tabatin 13 of 14 aña, V. a bay den su camber y a mishi cu su pecho. V. a desmenti esaki. Hues a puntra con por ta cu e dos primanan ta declara asina. Segun V. e no sa pakico nan ta bin bisa asina contra dje.

Abogado mr. Lejuez a haci V. pregunta riba e maltrato di su yiunan. El a puntra si despues di e maltrato mester a hiba e muchanan docter. V. a bisa cu no.

Pa loke ta actonan inmoral, mr. Lejuez a bisa cu na Polis V. a bisa cu e mucha di su mes a mishi cu V. su parti intimo y cu e mucha mes a coy V. su man pa mishi cu e mucha su parti intimo. V. a bisa cu esey ta berdad.

YIU A MENAZA SU TATA:

Hues a puntra V. pa cu su situacion actual na cas. El a cuminsa yora y admiti cu su yiunan no kier mir’e mas. El a bisa Hues cu el a haci tur posibel pa comunica cu su yiunan pero no ta posibel. Ta asina cu e su ex casa a core for di cas.

El a bisa cu October 2018 su yiu homber y su ex a bin bishit’e na prison y e tabata contento cu esaki. Pero e bishita no tabata agradabel. Segun V., e yiu homber a menace cu morto. El a bisa cu asina V. sali e lo mat’e of laga mat’e. El a bisa cu mihor pa V. bay for di Aruba. Ta asina cu V. tabata 18 aña casa cu su ex.

   EXIGENCIA DI FISCAL:

Fiscal ta haya legalmente proba cu V. a maltrata su yiunan cu slof, man y taki di mata. El a bisa Hues cu V. a admiti esey tambe den Corte. Fiscal a bisa cu e no ta comparti e punto di bista cu V. a haci’e pa corigi y diciplina. Fiscal a remarca cu durante 8 aña, V. a maltrata e muchanan y no por papia aki di sla pa corigi y diciplina.

Pa loke ta e casonan di inmoral, ta casonan hopi dificil pasobra no tin pruebanan. Un di e muchanan ta papia di 8 aña largo V. tabata mishi cun’e y cu V. tabata lag’e mishi cu e parti intimo di e sospechoso pa e satisfase su mes. Tempo cu e tabatin 8 – 9 aña, V. a purba penetre y door cu el a cuminsa yora e no a sosode. E actonan inmoral a sigui te tempo cu e tabatin 12 aña. Esey a sosode na Venezuela den un truck. E sospechoso mes a admiti e caso di Venezuela y a bisa cu na Aruba un biaha so e mucha a bin den camber pero nada a pasa. Fiscal no ta kere V. cu ta un biaha so a sosode na Venezuela den truck. Fiscal a bisa Hues cu e ta kere declaracion di e mucha cu diferente biaha a haci actonan inmoral cu e mucha.

Tambe Fiscal ta haya e otro caso di inmoral proba aunke cu V. ta desmenti esaki.

Fiscal ta haya cu ta durante un periodo largo V. tabata haci esaki cu su primanan. E ta haya e casonan aki hopi serio pasobra den un periodo largo esakinan tabata tuma lugar. Haya cu e hecho cu casonan ta bieu no ta haci cu mester duna menos castigo. El a exigi 30 luna di prison, kitando e tempo cu V. ta sera den KIA.

   ABOGADO A MUSTRA RIBA UN SET UP:

Abogado mr. Lejuez a remarca cu tur e acusacion contra V. a sosode e mesun momento. E abogado ta haya cu esaki ta mustra un accion planea contra V. durante e proceso di divorcio.

El a bisa Hues cu tabatin problema entre e ex señora cu V. riba cu V. lo tabata manipula e yiu muher contra e ex y dos dia promer cu e denuncia a worde haci, cos a bira mas peor. E abogado ta haya cu no por duna balor na e denuncianan. Abogado a mustra cu e sospechoso tabata dal e yiunan pa corigi nan pa loke nan lo no ta haci bon.

Abogado ta haya cu no tin suficiente prueba di sosten riba actonan inmoral. El a remarca cu no ta e mucha a bay bisa e mama cu el a worde molestia. Ta e mama a puntra e mucha si e tambe a worde molestia door di V. Abogado ta haya cu e 206 dianan cu V. ta sera ta suficiente castigo.

Hues a sera tratamento di e caso y a bisa 1 Februari 2019 lo tin sentencia.

- Advertisement -

DUNA COMENTARIO

Please enter your comment!
Please enter your name here