Home Parlamento A comproba cu durante 1 aña y 10 luna a comete fraude...

A comproba cu durante 1 aña y 10 luna a comete fraude cu casi 370 mil florin na EBP Hato

318
0
SHARE
- Advertisement -

Parlamentario Sue-Ann Ras:

ORANJESTAD  (AAN):  E herencia di corupcion, malversacion y fraude ta hopi mas amplio, cu nos ta pensa y cu nos a haya diferente stempel relaciona cu corupcion, cu ta parce di ta parti di haci negoshi na Aruba. Remarcabel ta cu segun Banco Central, 60% di nos poblacion ta pensa cu corupcion ta normal, ora di haci negoshi.  Y mas condenabel ta, cu corupcion, malversacion y fraude a contamina den nos sistema di enseñansa tambe y esunnan encarga cu cierto posicion clave, a perde nan principionan y moral, en bes di aporta na enseñansa y nos mucha- y hobennan.

“Pa cambia e imagen aki sigur ta encera un caminda largo y dificil, pero esey no ta kita afor cu nos no mester hacie. Aña pasa mi a trece dilanti cu den SEPB y EPB Hato, ta di lamenta cu malversion, fraude y mal maneho tambe ta biba den e area di enseñansa, unda cu a mal uza placa di inversion pa nos hobennan pa luho di bida di algun persona”, parlamentario Sue-Ann Ras a cuminsa na bisa durante su conferencia di prensa ultimo.

RAPPORT DI INSPECCION DI ENSEÑANSA

E situacion di EPB specialmente pa loke ta trata e sector di tecnica, ta pasando den momento basta preocupante  y no ta cos di awor. For di un rapport di Inspeccion di Enseñansa di april 2018, a constata cu tin varios punto di atencion urgente y mas cu claro esaki ta djis algun:

Pa loke ta trata construccion y carpinte ta uza 3 lokaal pa duna les. E sector aki ta haci uzo di e mashinnan grandi, cu ta data for di tempo di J.F. Kennedy School. Ta mashinnan bieu y nan no ta cumpli cu e exigencianan di siguridad di awendia. Por ehempel nan no tin rem pa para e mashin inmediatamente den un situacion di emergencia.

Algun mashin falta pieza manera un ‘beveiligingskap’, nan no ta funciona optimal, ta haci hopi desordo of tin un periodo largo cu no ta uzabel mas.

E lesnan ta duna pa 1 docente cu mester ta den dos lokaal na mesun momento. Esaki mas cu claro ta hacie hopi dificil pa e docentenan pa loke ta trata vigilancia y supervision.

Den e sector di electro ta uza actualmente  4 lokaal, di cual 2 ta realmente un lokaal di practica. Esaki ta door di e interes grandi di e hobennan den e estudio aki, unda e scol mester a amplia su espacio y 2 lokaal no ta meubla ni diseña pa lokaal di practica.

Pa loke ta trata e materialnan di practica tin 6 ‘voedingskasten’, di cual 4 no ta operacional of ta funciona parcialmente.

Pa loke ta trata e metodo di  Electro e docentenan tin solamente buki di tarea y buki copia pa e alumnonan y nan no ta dispone di un manual pa docente.

Pa e sector di mantencion tambe ta uza algun di e lokaalnan aki y e mashinnan cu ta uza den e sector aki tambe ta bieu.

Pa loke ta trata e lokaalnan di las, tin 10 hoki pa las cu e aparato di las y tambe ta trata di aparato bieu, di cual 1 ta kibra y no por drecha mas.

Pa siguridad mester cambia e ‘schorten’ cu e alumnonan ta bisti, pa un jacket special y ‘safety shoes’ tambe ta un exigencia, pero lamentablemente esaki no ta e situacion.

CUSTUMBER DI 2 UNITMANAGERS

Segun Ras “ta tristo y masha di lamenta cu en bes a uza e subsidio di gobierno debidamente  y responsablemente, pa inverti den material di scol pa nos hobennan, bo ta haya cu 2 unit manager, tin e custumber pa firma hopi check den blanco, cu tabata pa propio uzo y pa no lanta sospecha, tabata traha factura falso pa trabou cu nunca a tuma lugar”. Y tur esaki a sosode rond di october 2017, ora cu e directora di EPB Hato anterior a baha cu pensioen, cu tabata for di 1998 den e funcion ey, y riba dje cu un tremendo fiesta di despedida.

Un balente suma di Afl. 369.738,01 a keda malversa den e periodo di 1 di januari 2016 te cu 31 october 2017.

“Imagina bo, cu esaki ta den periodo di 1 aña y 10 luna y e pregunta cardinal ta, cuanto placa mas e trio aki a malversa y cuanto hende mas ta complice di esaki? Placa cu sigur por a uza pa un sinfin di necesidad pa e scol y nos hobennan y mas tristo ta, cu e dos unitmanagernan, ainda ta eherce e mesun funcion.

Ki confiansa ami por tin awo, cu e cosnan por ta diferente si SEPB haya subsidio extra? P’esey ta importante pa tin e relatonan anual na ordo y haci nos trabou como Parlamentario pa vigila y controla. Riba dje ta bon ancra den ley, cu tur fundacion cu ta haya subsidio di gobierno, mester entrega nan relato anual, prome cu 15 di februari di cada ‘dienstjaar’”, Ras a finalisa bisando.

 

 

 

 

- Advertisement -

DUNA COMENTARIO

Please enter your comment!
Please enter your name here