Home Parlamento Alan Howell completamente pro y dicidi na sostene proyecto hotel na San...

Alan Howell completamente pro y dicidi na sostene proyecto hotel na San Nicolas

53
0
SHARE
- Advertisement -

ORANJESTAD (AAN) – Parlamentario sr. Alan Howell, di fraccion di POR a elabora tambe riba e proyecto di construccion di hotel na San Nicolas, cu e ta para su tras cien porciento, apesar cu tin diferente opinion al respecto.

E Parlamentario a señala cu e, personalmente, ta hopi contento di scucha hopi ciudadano tanto di pabao como pariba di brug, cu ta contento cu e anuncio haci durante un conferencia di prensa duna, conhuntamente, pa e ministernan Dangui Oduber y Otmar Oduber.

Esaki tabata Dialuna di e siman aki, unda nan a duna un splicacion amplio di e desaroyo cu tin pa e distrito di San Nicolas, unda cu nan kier trece un direccion nobo pa San Nicolas su economia, pa asina esaki bolbe florece.

Howell a haya hopi satisfactorio con e dos mandatarionan a splica detayadamente con e proyecto di hotel ta hinca den otro, Dios mediante.

El a indica cu hopi persona posiblemente no ta ni kere cu e proyecto aki ta bin, pasobra hopi biaha a priminti hopi cos pa San Nicolas, pero cada biaha cu algo mester bin pa e distrito hopi grito ta sali contra, comosifuera San Nicolas no merece di haya progreso.

E parlamentario a declara cu e ta pro e proyecto di hotel pa San Nicolas. El a scucha cu kizas un boutique hotel tabata mihor pa e distrito, y kizas por ta berdad, pero en realidad no tabata tin ni un persona cu acerca gobierno pa mustra interes pa traha un boutique hotel na San Nicolas.

Awor e oportunidad pa un hotel all inclusive a presenta, y Howell ta contento cu gobierno a gare no cu un man, pero cu dos man. Asina e parlamentario a expresa.

El a agrega cu pa añanan San Nicolas no tabata tin nada. Awor e gobierno aki, den su poco tempo na mando, ta concentrando grandemente riba e desaroyo di pariba di brug. E ta spera cu den transcurso di tempo tur cos cana bon pa e hotel bira un realidad, pasobra no solamente e gritonan tabata tey pa San Nicolas haya atrobe un bonanza economico, pero pasobra e lo alivia bastante ciudadano di San Nicolas cu ta traha den sector hotelero den Oranjestad.

Pa esnan cu no sa, el a expresa, 25% di e salario di diferente di e trahadornan aki ta bay na transporte publico. Y ademas, ora nan yega cas no tin mucho tempo pa nan famia. E ta sigur cu hopi hende di San Nicolas lo kier traha den nan propio distrito pa asina tin mas tempo pa nan por comparti cu nan famia.

El a agrega cu automaticamente ora cu cuminza tin movecion pariba di brug, lo stimula tambe pa otro comerciantenan inverti den diferente negoshi na San Nicolas. Ademas, un hotel na San Nicolas lo surti pa nos hobennan di pariba di brug cu ta caba EPB y EPI pa nan haya un trabao cerca di nan propio cas.

Tambe e ta sinti cu e restaurantnan situa na San Nicolas lo beneficia di esaki. E ta garantiza cu e mes lo bay zorg pa e hotel aki no stroba ningun ciudadano pa haci uso di Baby Beach.

Den nomber di fraccion di POR y sigur di su mes persona, tanten cu tur cos cana manera mester ta, gobierno por conta cu su sosten pa e proyecto aki y e ta spera cu Dios mediante esaki no ta e unico proyecto pa San Nicolas.

Finalmente, el a menciona cu den e siguiente simannan e propietarionan di cinema, tambe lo bishita e distrito pasobra nan kier habri y a anuncia esaki caba, un cinema na San Nicolas. Un proyecto cu pa hopi aña ciudadanonan di San Nicolas a pidi pe y tabata tin den pasado y e mes tabata bishite di chikito. E ta contento cu Meta Corp lo bin cu e proyecto aki atrobe y asina tambe lo yuda na e distrito su economia.

- Advertisement -

DUNA COMENTARIO

Please enter your comment!
Please enter your name here