Home Gobierno Aña di transicion pa personanan cu no a cumpli cu Acta di...

Aña di transicion pa personanan cu no a cumpli cu Acta di erpacht a pasa Dialuna caba

182
0
SHARE
- Advertisement -

Gobierno ta aplica medida:

ORANJESTAD (AAN) – Dialuna mainta a tuma lugar e prome conferencia di prensa semanal di Gobierno, e biaha aki cu participacion di e Ministernan Otmar Oduber, titular di Infrastructura, Medio Ambiente y Desaroyo Teritorial; Minister Di Turismo, Salud y Deporte Dangui Oduber y Minister di Economia, Finanzas y Cultura mr. Xiomara Ruiz Maduro.

Minister Otmar Oduber a inicia e rueda di prensa, na prome lugar el a indica cu e aña transitorio pa maneho di terenonan erfpchat a termina y a splica e consecuencianan pa esnan cu no a cumpli cu nan Acta; tambe a informa cu dia 21 lo otorga pre-reservacion pa terenonan residencial pa añanan 2005 y 2006.

Y como di tres punto di agenda, a referi na e maneho di tereno comercial y Hotel na Cero Colorado, anunciando tambe e proyecto pa traha un hotel den area di Baby Beach.

AÑA TRANSITORIO:

Minister Otmar Oduber a menciona cu Dialuna aki tabata exactamente un aña cu gobierno a anuncia e maneho habri y transparente, pa loke ta trata otorgamento di tereno, tanto residencial como comercial.

Den e contexto aki a referi na e maneho riba terenonan otorga varios aña atras y cu a traha e Acta Notarial, pero cu te ainda ta terenonan habri, sin cu den e transcurso di tempo nada a wordo construi ni desaroya riba nan.

Esaki posiblemente, pasobra den e Acta no ta aparece un termino of condicionnan den dje, y aña pasa a duna un fase transitorio di un aña pa regla e asunto.

Na e momentonan aki tur e reglanan cu a wordo poni den e beleid cu a wordo anuncia y publica door di gobierno, ta wordo reforza tambe riba terenonan cu a wordo otorga anteriormente, prome cu Februari, cu no tabata tin termino describi den dje of reglanan y beleid conforme loke a wordo anuncia aña pasa.

Esaki ta nifica cu na e momentonan aki ta cuminza implementa pa tur persona, cu ta ocupa un tereno cu ta pertenece na Pais Aruba, sea na huur of erfpacht, sea den a parti comercial of residencial, e reglanan cu ta conta pa tur hende, mientras tambe ta cuminza un control riba terenonan cu no ta wordo uza na e momentonan aki, of cu no a duna nan e destino cu a wordo poni den e contrato cu tin cu gobierno y pa cual e tereno a wordo otorga, y e personanan concerni lo ricibi un notificacion for di DIP, cu nan no ta den cumplimento cu locual ta stipula den e Acta cu a wordo pasa y esey ta nifica cu gobierno lo por pidi e terenonan aki bek.

Tres siman pasa, e mandatario a notifica na medionan di comunicacion cu mas of menos tres luna atras gobierno a cuminza manda carta na e personanan concerni y pidi nan e terenonan bek, cu ta mas of menos 17 y a mira cu cantidad di rosamento a cuminza na diferente tereno, specialmente na Palm Beach, Eagle, entre otro.

No pasobra nan ta cla pa construi sino pasobra e personanan aki a kere cu door di roza of pone un muraya rond di e terenonan, manera e mandatario por a observa varios di nan, comosifuera esaki ta parti di construccion mientras cu hopi duidelijk ta skirbi den e acuerdo cu esaki no ta construccion.

 

- Advertisement -

DUNA COMENTARIO

Please enter your comment!
Please enter your name here