Home Enseñanza Cacique Macuarima School preparando un ‘Sponsorloop’ pa asina purba cera placa pa...

Cacique Macuarima School preparando un ‘Sponsorloop’ pa asina purba cera placa pa instalacion di airco

231
0
SHARE
- Advertisement -

ORANJESTAD (AAN): E trabaonan pa haci instalacion di coriente di 220 Volt, relaciona cu e proyecto di airco pa Cacique Macuarima School ta andando e dianan aki.  Esey ta loke DIARIO a tuma nota di dje na e scol aki na Macuarima.

Por corda, con aña pasa e Comision cu ta encarga pa recauda fondo pa yuda cubri e gastonan aki, a organiza un Bingo den Centro Caiquetio na Paradera.  Aunke cu no ta tur buki a wordo bendi completamente pa e evento ey di recauda fondo, tog nan a logra genera un suma di riba 42.000 Florin.

Esey ta loke Michael Croes y Rachel Murray di Cacique Macuarima School a relata e siman aki.  Nan ta den e Team Activo cu a organiza e Bingo.  E ganashi neto di e Bingo teni dia 1 di December 2018 tabata 42.645 Florin.  Pero e gastonan a sali na 16.151 Florin.  Esey nifica cu e ganashi total tabata apenas 26.496 Florin.

E team di Cacique Macuarima School ta gradici comunidad pa e placa aki, pasobra e ta yuda nan haci algo bunita pa e muchanan, pa mehora e ambiente den cual nan ta siña y haya les na scol.

Segun Michael Croes, e trabao di coriente na scol a cuminza caba.  Algun klas ya caba tin wayanan di 220 volt poni pendiente pa e siguiente fase, cu ta e adquisicion y instalacion di airconan.  Instalacion di coriente lo keda cla pa dia 15 di Februari venidero.

Ainda scol mes no a cumpra e airconan.  Nan a busca quotation si di algun compania local enbusca di 24 unit di 24.000 BTU, y tambe 2 unit di 18.000 unit.  A haya oferta di como 108.000 Florin pa tur 26 unit di airco.

Michael Croes a haci un suplica, pidiendo amigonan comerciante cu kier haci donacion den forma di por lo menos 1 unit di airco, pa contact e scol.  Y pa e fase 2 di compra y instalacion di airco, incluyendo bracketnan anti-robo, nan tin plan pa organiza un otro evento pa recauda fondo.

Rachel Murray a splica cu pa luna di Mei 2019, nan tin pena di organiza un “Sponsorloop” pa e studiantenan.

Murray a mustra, cu nan speranza ta cu e evento aki lo yuda cera e suma di placa cu nan tin mester pa e proyecto di Airco.

Sponsorloop lo bay ta djis un evento unda e alumnonan di scol lo haya patrocinio di nan famia of sponsor, pa e haya placa y asina e tin di core ‘x’ cantidad di biaha den un circuito.

Segun juffrouw Murray, ainda nan no sa unda e Sponsorloop lo tuma lugar, pero kizas e lo bay ta den cura di scol mes na Macuarima.

E dianan venidero, e alumnonan di e scol basico lo haya un carchi cu nan ta bay cas cune.  Di e forma ey nan ta busca sponsor di famia of un compania, pa e suma maximo di 25 Florin.

Di e forma aki, cada alumno lo por sinti nan mes orguyoso cu nan ta haya chens pa yuda nan scol haya airco.  Y alavez nan lo competi den e Sponsorloop, sabiendo cu tin e sosten di patrocinadornan cu ta empuhe pa haci su best den e caminata.

Nan plan ta pa haci esaki na luna di Mei, pero ainda no tin sigur e fecha exacto cu esaki lo tuma lugar.  Nan lo anuncia esaki despues den DIARIO.

 

- Advertisement -

DUNA COMENTARIO

Please enter your comment!
Please enter your name here