Pa di 4 aña
ORANJESTAD (AAN): E aña aki pa di cuater bes, Centro di Bario Noord lo celebra nan fiesta nacional cu nos actividad Fiesta Arubiano cu cada biaha ta un exito rotundo. Riba e dia aki lo entrega tambe pa di cuater biaha un premio na un persona of grupo cu a traha boluntariamente pa e pueblo di Noord, esta Premio meneer Ovito Tromp.
Na 2016 directiva di CBN a dicidi pa introduci un premio pa duna reconocimento na baluartenan di e bario di Noord cu pa varios aña na un manera of otro a aporta grandemente nan dushi bario. No solamente ta reconoce e echo cu ta importante pa duna balor na nan trabou awo cu nan ta na bida, pero tambe ta di opinion cu un premio asina por forma como incentiva pa e generacion nobo por haya e smaak pa tambe aporta na nan bario.
Mas cu claro cu na momento cu a bay duna nomber na e premio en cuestion directiva den su totalidad unanimamente a dicidi di duna honor na nos presidente meneer Ovito Tromp d.f.m. Ta un echo cu meneer Ovito Tromp tabata un boluntario di curason cu a laga un trayectoria largo di logro, trabou- y esfuersonan cu te dia di awe e bario di Noord ta gosa di nan. Den corto: un ehempel pa sigui.
E premio ta dirigi pa duna reconocimento na baluartenan di e bario di Noord cu den pasado of awo ta/a realisa prestacionnan particular pa y den comunidad.
E trabaonan realisa mester ta di nivel boluntario y por ta riba diferente tereno contal e meta ta dirigi ariba desaroyo general di e bario di Noord y su habitantenan. Na 2016 sr. Chua Faro a ricibi e Premio Meneer Ovito Tromp, na 2017 srs. Julian Eli Pers (awe d.f.m.) y Isnardo Faro a ricibi esaki y aña pasa e la keda otorga na Rosalinda ‘Tanta Lili’ Luydens. Personanan cu pa añanan largo a of te ainda ta aporta grandemente na nan dushi Districto di Noord.
Si ta desea di nomina un persona pa Premio Meneer Ovito Tromp por pasa laga un carta acompaña pa e cv di e persona en cuestion. Por haci esaki te dia 12 di maart 2019. Mester entrega e nominacion den un envelop cera dirigi na Comishon Premio meneer Ovito Tromp na Chikitin Bin Bin na CBN durante ora di trabou entre 7:30 am y 2:00pm of di diamars pa diabierna di 6:30 pm te cu 10:30 pm na Centro di Bario Noord mes cerca beheerder sr. Pedro Henriquez.
Si tin pregunta of ta desea yudansa cu e nominacion por manda un email na cbnoord@gmail.com.
Manera añanan anterior Directiva di CBN a apunta un comishon cu independientemente ta bay evalua tur sugerencia ricibi y a base di criterianan stipula lo escoge e persona/grupo cu lo ricibi e Premio meneer Ovito Tromp 2019.
Di awor caba Directiva di CBN ta invita pueblo henter pa pasa celebra Dia di Himno y Bandera cerca nan na CBN.
