Home Policial Control di Prijs di Supermercadonan a sigui pisa e siman aki

Control di Prijs di Supermercadonan a sigui pisa e siman aki

237
0
SHARE
- Advertisement -

ORANJESTAD (AAN)–  Diaranson pasa un bez mas e team di control forma pa Departamento di Asuntonan Economico Comercio E industria, Cuerpo Policial Aruba y Departamento di Salubridad Publico a haci nan control na diferente supermercado y e biaha aki tabata den Piedra Plat.

For di mainta tempran e team a reuni y representantenan di e departamentonan menciona a sali y haci control di e.o. riba prijs máximo di productonan cu ta forma parti di e canasta básico, control riba e parti sanidad y higiëna di e supermercadonan, control si e establecimiento tin nan permisonan di operación na ordo pa nan por opera, como tambe si e kaarchi berde ta na ordo pa por atende cu publico.

A controla na tres supermercado den Piedra Plat, e promer control tabata na Food 99 na Piedra Plat y a constata cu e establecimiento no ta cumpli cu e reglanan di sanidad y higiëna. Aki a tuma e decision pa sera e supermercado pa 24 ora pa asina e propietarionan percura pa haci e lugar bon limpi como tambe pa busca un compania di pest fumiga e lugar.

E segundo control tabata na Flatstone Supermarket caminda a haci control, como tambe Mega Stone Supermarket, ambos tabata cumpli cu prijs máximo di producto di canasta básico, regalanan di higiëna y sanidad y tabata tin nan permisonan na ordo.

Recientemente e productonan di Canasta Basico a wordo amplia di 11 producto pa 22 producto. E promer fase di ampliacion a drenta na vigor na februari y ta consisti awor di cuminda pa baby, hariña di maishi, te, koffie, lechi likido pa koffie, lechi polvo, aros, azeta pa cushina, lechi pa baby y den e promer fase e canasta basico a wordo amplia cu broccoli frozen, spinashi frozen, mixed vegetables frozen, bonchi cora seco, bonchi preto seco, bonchi lima seco, tunafish den bleki, den awa chunk/flaked/grated, sardine den bleki den awa.

E fase 2 lo wordo anuncia despues y esaki lo bini acerca pasta spaghetti, papa havermout, hariña, lechi likido duradero den tetrapak of boter.

Pa garantisa cu e supermercadonan ta cumpli, controlnan ta sigui tuma lugar tur dia, 5 bez pa siman, caminda Departamento di Asuntonan Economico su controladornan ta haci nan control na supermercadonan, cu e productonan di canasta básico ta wordo ofreci na e prijs máximo fiha pa gobierno y e tambe cu e lugarnan ta cumpli cu sanidad y higiëna, de lo contrario lo ricibi sanción.

E control tambe ta si e supermercado tin permisonan na ordo y e carchi berde mester ta balido di tur trahadornan. Na momento cu constata cu un supermercado no ta cumpli, ta tuma pasonan, caminda ta bay hasta na scra e lugar te ora cu cumpli cu nos leynan. E controlnan lo sigui tuma lugar y lo percura pa informa comunidad riba esaki.

Banda di esaki tin e Macuto di Compras cu ta keda publica tur siman den cual tin un comparacion di prijs di alrededor di 25 producto cu no ta regula na 10 supermercado. Cu e informacion aki e consumidor mes por haci comparacion di prijs y dicidi na unda e ta bay haci su compras. Ademas por bishita e website y Facebookpage di Departamento di Asuntonan Economico Comercio y Industria caminda por haya mas informacion.

Por ultimo ta recorda tur hende pa haci bon uso di e App Control di Prijs, pa por haya tur informacion tocante e prijs di e productonan di canasta basico cu tin prijs maximo fiha.

 

- Advertisement -

DUNA COMENTARIO

Please enter your comment!
Please enter your name here