Home Comentario Crimen di lesa humanidad: Un poblacion cu lo sigui muri di hamber!

Crimen di lesa humanidad: Un poblacion cu lo sigui muri di hamber!

89
0
SHARE
- Advertisement -

Comentario:

Pa Mercedes Monge

E sadismo di Nicolas Maduro no tin pordon! Mi ta kere cu ni di Dios, si nos ta kere den un Dios di Amor, den un Tata husto.

Vicepresidente di Venezuela Juan Guaido y e Secretario General di OEA a califica e acto di kimamento di e trucknan cu e ayudo humanitario como “Crimen di lesa humanidad”, y ta berdad pasobra locual a sosode den e puntonan unda e trucknan mester a yega ta reuni tur e caracteristicanan di un crimen di lesa humanidad, y segun mi hasta di un holocausto. Te e ultimo noticianan cu mi a mira anochi, segun declaracion di Luis Almagro e cifranan oficial na e momento ey tabata papia di 14 asesinato y 285 herido, di cual Almagro a indica cu varios tabata desangrando pa falta di material medico y remedi.

Esnan na Aruba cu a keda practicamente pega na nan television, wak e acontecimentonan, ami mes via Univision, por a mira e momento cu nan a kima un truck cu alimento y remedinan, no obstante tabata tin un grupo di hoben sinta riba nan, pa evita cu e lo a keda sin pasa.

Na mesun un momento e asina yama “colectivos” (delincuentenan) tabata basha no solamente gas lacrimogeno pero perdigon y bala mes, y por a mira como un mucha muher a cay, aparentemente morto.

E valentia di e hobennan boluntario cu tabata na disposicion di e causa yama pa Guaido, ta loable. 14 di nan e bataya a costa nan bida. Un bataya di hobennan desarma y cu tabata canando trankil, pacificamente, contra burdugonan arma!

Hopi tristo di a mira un desafiante Nicolas Maduro ta balia riba un podium cu su casa, celebrando su crimen!

Ki porqueria di sernan cu mi no ta tribi di yama nan hende! Via mi muro den facebook mi tabata den contacto cu algun persona local, cu  con poco nan por ta, nos por a comparti nos sentimentonan di dolor, impotencia y hasta frustracion, mirando e masacre for di nos cas, y sintiendo asco di un gobierno degenera, cu a manda kima e cuminda y medicina destina pa e gran necesidad cu tin na Venezuela.

Mi por pensa riba e sufrimento di e residentenan Venezolano na Aruba, ohala sin excepcion (sabiendo cu aki tambe tin Chavista y Madurista cu ta defende e regimen, claro mirando “los toros desde la barrera”) cu tin famia den e pais mas rico di America Latina pero alavez esun di mas pober y mas daña pa un regimen “Socialista” y dirigi pa un loco total, cual sadismo no tin limite y un set di secuaz cu ta siguie sin un ons di caridad y calidad humano pa nan propio conciudadanonan. Mi no ta sinti aworaki optimista. Mi ta puntra na unda e Comunidad Internacional a keda. Na unda nos tur a keda! Mi ta sinti cu den e mundo aki, mayoria di ser humano ta deshumaniza, individualista, sin amor pa nos prohimo, y cu ta pensa cu “loke ta pasa cu nos bisiña no ta nos asunto”. Na final, mi ta kere cu Maduro, Cabello y tur e gang ey no tin pordon di Dios, pero e humanidad indiferente eyfo, tampoco!

- Advertisement -

DUNA COMENTARIO

Please enter your comment!
Please enter your name here