ORANJESTAD (AAN) – Minister di Husticia y Extranheria, mr. Andin Bikker, a reuni cu e representantenan di e aerolineanan cu ta duna servicio entre Venezuela y Aruba, tocante e diferente sistemanan cu a introduci pa controla e afluencia di pasaheronan cu via nan, ta drenta nos pais, pa loke ta concerni e aspecto di seguridad.
E mandatario a anuncia siman pasa den conferencia di prensa, tocante e proceso di negociacion cu tabata tin y cu Dialuna 18 di Februari awor a conclui, encuanto e sistema di intercambio di informacion di pasahero.
E dignatario a señala cu den e decreto cu ta regarda admision di turistanan, ya caba den articulo 3 (entre otro) di e manera tradicional e aerolineanan mester duna di conoce ken ta e pasaheronan cu ta bishita nos Isla.
E mandatario a splica cu mirando e avancenan tecnologico cu e mandatario ta bezig cu nan. Manera APIS (Advance passenger Information System), PNR (Passenger Name Registration) y tambe nan ta bezig trahando riba e implementacion di un sistema pa pre-registra pa wak si ta haya permiso pa viaha pa e pais concerni.
Basa riba esaki y riba e ley existente caba, gobierno a dicidi di yega na un acuerdo cu e aerolineanan pa haya informacion di antemano, di ken a reserva of cumpra un pasashi cu intencion di bin Aruba, pa check den e sistema local pa wak si e pasahero ey, sea recientemente of den pasado, a wordo deporta y tin prohibicion pa aborda pa bin Aruba.
E acuerdo aki, e dignatario a señala, ta duna espacio pa por haya informacion digital di adelanta, y di e banda aki e ta innovativo, pasobra loke gobierno y e aerolineanan kier logra ta pa esnan cu bin Aruba, ta turistanan genuino cu ta bin pa contribui na nos pais su economia y pasa un vacacion manera Aruba ta custumbra cune.
E mandatario a declara cu e ta hopi gradici pa e manera rapido cu nan a bay di acuerdo y e responsabilidad mutuo cu ta wordo comparti, pa cu e situacion dificil cu nos region ta pasando door di dje, y firma e “data sharing & processing agreement” aki.
Minister Chris Romero den su calidad di titular di transporte, bao di cual Direccion di Aviacion Civil ta parti di su maneho, tambe a hiba palabra tocante e firmamento di e “Data Sharing Processing Agreement” cu keda firma Dialuna atardi.
E mandatario a splica cu e departamento aki tin e obligacion di guia, vigila y implementa diferente proceso cu tin di haber cu aeropuerto.
El a señala cu e sistema APIS (Advanced Passengers Information System) ta uno mundialmente conoci y uza. E mandatario a declara cu e acuerdo aki ta wordo firma cu aerolineanan cu ta bula entre Aruba y Venezuela, unda cu informacion ta wordo manda di adelanta pa asina por percura pa e seguridad cu mester tin.
E trabao aki ta asegura nos fronteranan y locual ministerio di husticia ta haciendo ta sumamente importante, y esaki ta un instrument cu sigur lo trece mas seguridad pa nos fronteranan.
El a reitera cu e acuerdo a wordo firma cu diferente aerolinea di Venezuela en bista di e situacion cu andando aworaki, den nos pais bisiña.
