Home Salud Departamento di Salud ta conseha pa muchanan bao di 5 aña no...

Departamento di Salud ta conseha pa muchanan bao di 5 aña no wordo hiba carnaval

39
0
SHARE
- Advertisement -

ORANJESTAD (AAN): Ta drentando e ultimo simannan di Carnaval y den cuadro di esaki Departamento di Salud Publico e siman aki kier concientiza ariba e salud di e muchanan.

DVG ta conseha pa muchanan bao di 5 aña no wordo hiba carnaval, Jurette Croes, vocero di e departamento aki a duna conoce.

El a agrega cu muchanan bao di 5 aña normalmente durante dia nan ta tuma nan siesta y carnaval ta hopi largo, tin hopi solo, musica duro y esaki ta peligroso pa e muchanan aki.

Muchanan bao di 5 aña hopi biaha ta inkieto, nan no ta para keto y por ta peligroso pa na momento cu e trucknan ta pasa y ariba e ruta di carnaval e muchanan por perde for di bista di nan mayornan, a bisa.

Pesey ta hopi importante pa instrui e muchanan cu si nan perde nan mayornan kico nan mester haci. Ta bon pa nan tene den nan saco di carson nan nomber, fam y adres. Instrui nan pa busca un agente policial cu uniform cu por yuda nan haya nan mayornan bek.

SERVICIO DI CRÈCHE

Tin hopi crèche cu ta ofrece e servicio di cuida mucha pa e temporada di carnaval. Ta bon pa haya un lugar unda e muchanan por keda safe.

Tambe por acerca familiarnan cu no ta bay carnaval si nan por tira un bista y pa e muchanan por keda safe na cas, Croes a remarca.

MUCHANAN MAS GRANDI

Pa loke ta e muchanan mas grandi, cu un edad riba 5 aña DVG ta conseha pa tambe tira bon bista pa nan. Uso di “sunblock” ta hopi importante. Cancer di cuero ta number un na Aruba y ta importante pa proteha e muchanan.

E conseho ta pa usa SPF 30 of mas. SPF 50 lo ta hopi bon y pa corda re-aplica e “sunblock”, preferibelmente cada dos ora. Zorg pa e muchanan tin bril pa solo bisti of sino un petchi. Laga nan para den sombra y evita e solo pisa, vooral esun di merdia.

Tambe ta importante pa e muchanan bebe hopi likido, di preferencia awa y evita hopi bebida cu sucu.

Uso di earplugs ta indispensabel pa proteha nan oido. Na Aruba ainda no tin un ley cu ta regula e musica. Pesey e uso di earplugs ta hopi importante, Jurette Croes di DVG a indica.

Banda di esaki ta recomedabel pa hiba wipes of handsanitizer pa e mucha por tin su man limpi prome cu e come algo y tambe pa despues di come, principalmente despues di bay haci uso di WC.

 

 

 

- Advertisement -

DUNA COMENTARIO

Please enter your comment!
Please enter your name here