Home Enseñanza Directiva di SEPB: Investigacion relaciona cu fraude ainda ta tumando lugar

Directiva di SEPB: Investigacion relaciona cu fraude ainda ta tumando lugar

323
0
SHARE
- Advertisement -

Ta investiga ex directora di EPB Oranjestad

ORANJESTAD (AAN):  Pa medio di un comunicado di prensa, Directiva Fundacion Educacion Basico Profesional (SEPB) a duna di conoce cu nan a tuma nota di speculacionnan cu tin andando relaciona cu e fraude cu a tuma luga na EPB Oranjestad.

INVESTIGACION     

Directiva a duna tur espacio pa e investigacion por a tuma lugar sin ningun intervencion.  Directiva ta di opinion cu Pueblo mester sa kico a tuma lugar realmente y a scoge pa awor duna informacion publicamente.

Directiva a haya informacion na luna di october 2017 di un posibel fraude door di e ex directora di EPB Oranjestad kende a caba di baha cu pensioen. Mes ora Directiva a cuminsa un proceso di investigacion interno.

Basa riba prome resultado na luna di november 2017  y reconociendo e complehidad di e investigacion rekeri, entre otro facturanan falsifica, checknan dudoso, gran cantidad di datonan digital, Directiva a contrata un compania di servicio ‘forensico’/investigacion criminal profesional riba tereno di accounting.

FRAUDE CONSTATA

Directiva di SEPB di prome momento cu e fraude a yega na su conocimento a sigui e procedura usual y a informa Minister encarga cu Enseñansa y departamentonan gubernamental concerni.

E compania specialisa forensico hopi liher na luna di november 2017 a confirma cu fraude a wordo cometi na gran escala y na e momento ey Directiva a duna instruccion pa profundisa mas den e caso/investigacion.

Locual a resalta ta e forma sofistica cu e fraude a sosode door di entre otro hasi mal uso di confiansa di entre otro personal di e organisacion. E compania contrata a haya suficiente prueba pa Directiva por a entama un caso civil y entrega keho penal contra e ex directora di EPB Oranjestad.  Na luna di juni 2018 Directiva a informa personal di e organisacion di e fraude den liñanan grandi, pa no stroba e investigacion andando.

MEDIDANAN

Basa riba e experiencia y conocimento adicional cu e caso di fraude aki a duna Directiva, Directiva a cuminsa e proceso pa mehora y fortifica diferente proceso administrativo y financiero cu ayudo di expertonan den e ramo.  Un di e consecuencianan tambe ta cu otro personal (administrativo y di maneho) a haya medidanan disciplinario  di Directiva aunke nan no a beneficia personalmente di e fraude y cu nan a actua di buena fe/confiansa den e directora. Al contrario na loke a wordo publica den prensa den e ultimo dianan.

Otro consecuencia di e caso di fraude ta cu Directiva di SEPB a bay corte pa termina relacion di trabou cu e directora general di SEPB. Esaki considerando cu su persona a nenga structuralmente  di atende cu Directiva riba su responsabilidadnan y posibel fayonan relaciona cu e fraude. Na december 2018 huez a dicta sentencia na fabor di Directiva di SEPB.

DENUNCIA PENAL

Directiva a haci denuncia penal na luna di juni 2018 na Landsrecherche simultaneamente cu esun entrega door di e Minister encarga cu  Enseñansa y despues cu e rapport forensico a sali definitivamente. E denuncianan aki ainda ta den tratamento. Directiva ta mantene contacto estrecho cu oficina di Minister y cu Minister di Enseñansa referente e pasonan cu a ser tuma y ainda falta pa tuma pa fortifica e organisacion mas ainda.

Directiva ta lamenta e fraude constata y tin tur comprension pa e frustracion di trahadornan di SEPB y di comunidad cu fondonan publico pa enseñansa profesional a wordo malversa. Nan ta conciente di e sla duro cu esaki  ta nifica pa educacion profesional na Aruba, specialmente considerando e inversionnan cu ta necesario pa sigi desaroya educacion profesional aun mas.

Sinembargo manera ya informa Directiva di SEPB ta tumando e pasonan necesario pa  evita algo semehante ripiti den futuro.

Por ultimo Directiva di SEPB ta apela na comunidad y gobierno pa sigui duna sosten na un forma positivo na mehoracion di educacion profesional basico na Aruba.

 

- Advertisement -

DUNA COMENTARIO

Please enter your comment!
Please enter your name here