Home General Diversificacion ta solucion pa Aruba!

Diversificacion ta solucion pa Aruba!

92
0
SHARE
- Advertisement -

DIARIO y Camara di Comercio cu pensamento comun 

*Traspaso historico di poder internacional di inversion

*Aruba mester adapta na exigencianan mundial moderno 

ORANJESTAD  (AAN) — 2018 tabata un aña cu crisis mayor a bati na porta di Aruba, cu pa soluciona su problemanan economico tradicionalmente a uza turismo y refineria.  E peligernan cu e dos unico pilarnan di economia di Aruba ta contene y e realidad di e situacion na Aruba, a exigi pa periodismo asumi su responsabilidad como guia directo di pueblo, cu mester opina y asina sostene bienestar di su pais. DIARIO cu prueba y informacion profesional local y internacional a mustra cu mester bandona e tradicionalismo hancra den historia economico y diversifica economia, incluyendo comercio local. Cu prueba DIARIO a mustra pakico no por sigui expande turismo cu mester adapta na exigencianan nobo y no por tene na refineria cu a fracasa cu Exxon, Wyatt y Valero debi na situacionnan mundial for di añanan 70. Awe DIARIO ta uni cu Camara di Comercio di Aruba pa sostene diversificacion economico a base di exigencianan moderno,  cifranan di e pais, realidad mundial y local. 

Diversificacion ta a punto di salida cu DIARIO a uza, a splica en extenso,  ora a bira evidente cu Aruba mester a separa su mes di e idea cu refineria of turismo mester ta e salbabida di economia di e pais.

Awe DIARIO ta resumi su informacionnan y ta demostra e caracter imparcial y profesional di periodismo pa por sirbi pueblo di Aruba durante e pio crisis den su historia.

E terminal por bira hub den un contracto renoba cu ta proteha interes di Aruba y e popularidad turistico ta habri caminda pa Aruba como centro comercial y industrial pues “hub”. Inversionnan riba termino corto por ta parti di e traspaso historico di placa di un generacion pa otro y e preferencia di e generacion mundial nobo.

CIFRANAN DI  TURISMO TA PAPIA IDIOMA CLA 

Pa por informa un pueblo debidamente, mester di cifra y rapportnan experto cu ta ser analisa, evalua y presenta na pueblo na e idioma cu un persona cu no ta experto riba su tereno, por comprende. Esaki ta esencia di periodismo

Cifranan y rapportnan produci dor di entre otro dos instancia oficial y independiente di Aruba, a ser analisa y presenta cu luho di detaye. Cifranan y rapportnan di Banco Central y Algemene Rekenkamer Aruba a ser analisa, discuti cu expertonan riba tur tereno, pa por splica Aruba kico a pasa, ta pasa y por pasa cu Aruba.

E investigacionnan y analisisnan tabata a base di conocemento di e materia y no tabata a base di preferencia of loke cualkier instancia lo por tabata kier pa periodismo trece dilanti.

E cifranan di Aruba y e rapportnan di expertonan ta mustra con e caida di turismo for di Venezuela, a kibra e produccion turistico na Aruba na un forma sumamente peligroso. Si no tabata pa e hecho cu e produccion di e mercado Mericano a subi debi tambe na resultadonan entre otro si horcan den Caribe, turismo di Aruba lo a sufri un sla formal.

DIARIO a mustra cu cifra con peligroso dependencia di turismo ta, mas ainda si tene cuenta cu e cambionan den mundo turistico.

Cifranan ta mustra cu mas y mas turista ta bay keda den apartamento. E turista a cambia y no ta e turista di inicio di crecemento turistico na Aruba, pero hopi bes di hende cu entrada mas abou cu ta yega na areglo di pago pa nan vacacion.

Otro grupo cu a lanta ta e Millenials, e generacion nobo cu ta bira e consumidor mas importante y tambe e inversionista y grupo cu mas poder economico. Nan ta busca mercado diferente cu ta duna nan balor pa loke nan kier.

Aruba na e momentonan aki mester adapta su sector turistico pero sigur no por construi mas hotel manera DIARIO a trece claramente dilanti.

VENEZUELA Y RUSIA POR DUNA LAGO BIEU BIDA? 

Na 1985, crisis mundial di petroleo y e realidad nobo di comercio y industria internacional a pone fin na existencia di Lago, un refineria bieu cu tabata basa riba tecnologia di su tempo. Tres compania a mustra for di 1985 cu no por duna Lago reanimacion artificial.

Refineria, cu antes tabata crea hopi cupo di trabou, awe no ta uza ekipo cu tres compania mundialmente poderoso no por a tene habri. Si Lago por a produci placa, e gigante Exxon cu a hunga un papel clave den industria di petroleo, lo no a cera su portanan.

Loke a pasa cu Lago na 1985 no tabata basa riba realidad di partidonan politico na San Nicolas, Playa y henter Aruba durante eleccion, pero loke a pasa rond mundo for di 1970 ora OPEC y no OPEC a confronta otro.

Realidad ta cu pa Aruba tin un refineria, mester deshaci di e instalacionnan actual y mester construi un refineria nobo. Ningun instancia por bisa cu esaki no ta berdad, pasobra actualmente ta traha un rapport di e necesidadnan pa por habri e refineria atrobe.

E pregunta clave ta, si Venezuela cu un inflacion cu a pasa un Miyon y tin mas debe cu e tin dirigente actual capaz, por bin habri e restonan di Lago.

Rusia tambe mester dicidi pasobra casi mita di CITGO ta di Rusia for di prome cu Aruba a firma e contracto cu CITGO.

UN ECONOMIA MODERNO Y POPULARIDAD CREA PA TURISMO 

E economia cu Aruba mester a ser splica dor di DIARIO cu a presenta den luho di detaye e diversificacion cu ta nifica cu ta haci uzo di profesionalnan nobo riba tereno nobo di servicio pa asina Aruba brinda servicio riba cantidad di tereno.

E idea cu comercio ta yama “hub” comercial ta completamente di acuerdo y ta inclui den e pakete cu DIARIO a presenta y cu ta habri trabou pa e generacion nobo di profesional universitario te hendenan di fishi cu por amplia e base comercial nobo di Aruba.

Ta e base comercial di Aruba ta alma di economia y no politica cu mester sirbi e interes economico di e pais.

Investigacionnan di DIARIO y contacto directo cu mundo di expertonan local y internacional a indica, cu na e momentonan aki Aruba ta conoci a base di su desaroyo turistico for di nacemento di e sector.

Den e añanan venidero, manera DIARIO a trece dilanti, sumanan historico lo pasa di un generacion pa otro y Aruba por beneficia di e inversionnan cu e generacion aki lo haci.

Pues esaki ta e momento pa Aruba haya un caminda nobo pa cana pa un futuro duradero, a base di bon gobernacion y principionan democratico den e mundo nobo cu ta surgi.

- Advertisement -

DUNA COMENTARIO

Please enter your comment!
Please enter your name here