*Na Juni/Juli lo tene apertura oficial
ORANJESTAD (AAN): Desde mitad di December Aruba Water Park na Hooiberg tin doñonan nobo y for di e tempo ey caba nan a cuminza cu renovacionnan grandi na e parke.
DIARIO a entrevista propietario nobo di e parke cu ta inclui tambe algun apartamento, Arnold Rood.
El a splica cu e intencion ta pa renova entre otro e cushina, e slides y mayoria parti di e parke, cu e enfoke sigur riba seguridad di tur hende cu ta bishita e lugar.
E intencion ta tambe pa despues cuminza cu happy hour Diabierba y/of Diadomingo, unda cu bandanan lo bin toca.
Segun Rood, e kier pa famianan y gruponan grandi bishita e lugar, cu ta ofrece tur hende locual cu nan tin mester pa relaha y pasa bon.
Aruba Water Park, cu despues probablemente lo haya un nomber nobo, tin un waterslide nobo di 250 meter y apesar cu actualmente tin renovacionnan tumando lugar, hendenan por y ta bishita e lugar.
Rood a indica tambe cu lo desaroya mas apartamento rond di e parke y cu e intencion ta pa sea Juni of Juli hasi apertura oficial di e parke, ora cu tur cos keda cla.
