Home Hudicial E trio cu tabata traha directo cu Paul Croes condena na castigo...

E trio cu tabata traha directo cu Paul Croes condena na castigo combina

816
0
SHARE
- Advertisement -

ORANJESTAD (AAN): E tres empleadonan di Gobierno cu tabata traha directo cu ex minister Paul Croes, Capriles, Aparicio y Arends, ayera mainta a worde condena na castigo combina. Hues ta haya cu nan ta forma parti di un organizacion criminal hunto cu Paul Croes.

Hues a cuminsa cu Capriles, kende tabata director di e stichting di Paul Croes. Hues ta haya Capriles complice di malversacion di e stichting. Hues a mustra cu Fiscal a mustra cu 100 mil Florin Paul Croes a usa pa asuntonan priva. Hues a sigui bisa cu Capriles a bisa cu Paul Croes tabata doño di e stichting y e tabata haci loke Paul Croes bisa. Hues ta haya cu como director di stichting, aunke cu ta cay bou minister, mester controla e placanan cu stichting tabata haya ta worde usa corectamente.

Hues ta haya cu e placanan cu tabata worde dona, tabata bay fuera di e meta di e stichting. Nan tabata bay pa asuntonan priva cu no tin nada di haci cu campaña. Hues ta haya cu Capriles tabata responsabel pa placanan cu tabata worde poni na disposicion di Paul pa asuntonan priva.

Hues ta haya cu e instalacion di airco pa oficina di Paul na su cas, ta un asunto priva. Hues a bisa cu e ta declara Capriles liber parcial di 27 mil Florin di malversacion. E 17 mil Florin cu lo ta procedente di bendemento di carchinan di concierto no por considera malversacion y no por culpa Capriles di esaki. Como director ta responsabel di malversacion di mas cu 52 mil Florin y ta forma parti di organizacion criminal.

Ta asina cu Fiscal a exigi 220 ora di trabao of 110 dia sera, 4 luna di prison condicional. Hues a bisa cu e ta tene cuenta cu salud di Capriles, kende lo ta sufri di curazon y no ta haya cu Capriles mester bolbe bay sera. Hues a condena Capriles na 146 dia di prison di cual 60 dia ta condicional cu un tempo di prueba di 3 aña.

Pa loke ta Aparicio, Hues a declar’e liber di complice di malversacion di placanan di stichting. Hues a bisa cu ariba orden di Capriles of Paul, Aparicio tabata deposita cheques riba cuenta di Paul. E no tabata sa e intension di esaki. Hues ta haya cu Aparicio ta culpable di cumpramento pasivo y organizacion criminal. Hues ta haya cu Aparicio a haya placa pa regla permiso y e mester tabata sa. E tabata deal cu Chinesnan caminda e tabata busca mercancia y placa. E tabata man drechi di Paul Croes y tabata bay busca e cosnan cerca Chinesnan. Esaki tabata na gran escala y pesey ta culpable di un organizacion criminal. Hues no ta haya cu Aparicio mester bolbe bay sera. El a condena Aparicio na 180 dia di prison di cual 95 dia ta condicional cu un tempo di prueba di 3 aña.

Hues ta haya cu Arends tabata hopi activo pa pidi placa pa Paul Croes. Empresarionan tabata worde poni bou presion pa cumpra carchinan. Hues ta haya cu Arends ta complice di worde cumpra. Como secreataria di Minister e no por haya regalo. A pidi empresarionan pa cumpra carchi y tabata bende loteria. Hues ta haya cu Arends a mal usa su funcion. E pidimento di placa pa participa den carnaval tambe ta worde considera como haya regalo. Hues ta haya cu Arends ta forma parti di e organizacion criminal. Hues a condena Arends na 180 ora di trabao y 4 luna di prison condicional cu un tempo di prueba di 3 aña.

 

- Advertisement -

DUNA COMENTARIO

Please enter your comment!
Please enter your name here