Home Editorial Editorial: Awe mundo liber ta uni pa debolbe Venezuela derecho humano

Editorial: Awe mundo liber ta uni pa debolbe Venezuela derecho humano

67
0
SHARE
- Advertisement -

Mientras na Aruba nos ta prepara pa duna inicio na e culminacion di celebracion di Carnaval, mundo liber ta cambia historia di humanidad. Venezuela ta bira centro di un acto sin precedente den historia, ora paisnan democratico uni cu e pueblo di Venezuela pa debolbe e pais e derecho humano mas sagrado cu ta respet pa e bida y bienestar di hende.

Pa prome bes den historia humano, paisnan democratico ta deshaci di limitacionnan di Nacionnan Uni pa na un forma boluntario pone un fin na e drama humano na Venezuela, cu lo sirbi como ehempel di loke democracia ta alcansa ora e bira un forsa internacional.

Venezuela mescos cu tanto otro pais cu a ser destrui pa e abuso y opresion di tirania dictatorial sin e armanan democratico pa defende su mes, tin e sosten di mundo. Na fronteranan di paisnan bisiña, lidernan y representantenan di paisnan democratico rond mundo ta uni cu Venezolanonan cu ta lucha pa democracia di nan pais, pa asina bira un forsa internacional.

Manera tanto pais cu a cay den e gara di dictadura socialista y regimennan extremo, Venezuela no tabata por a enfrenta e regimen di Chavismo cu a entrega Venezuela na e teror di hamber y miseria y destruccion di un pueblo rico.

Venezolanonan honrado, trahado, hendenan cu a cultiva nan suela y pisca den lama bruto pa por a produci cuminda, a bira victima di despota cu kier a uza e metodo socialista pa por a indoctrina e pueblo. Venezolanonan a perde nan tera cu a ser entrega na amigonan di dictadura.

E rikesa cu naturalesa a brinda Venezuela capaz di tin e economia mas grandi na mundo debi na tur e condicionnan natural cu e pais conoce, a ser uza pa crea poder pa trapa riba e Indjan den su selva, e cunukero den cunucunan cu el a hereda di su antepasadonan, e trahado den industrianan a base di loke e rikesa natural di e pais.

Profesionalnan Venezolano mester a mira con nan pueblo ta sink den e abusa Chavista. Specialistanan medico den clinicanan di mas avansa cu antes henter region Caribe tabata bishita, mester a para man crusa pa mira Venezolanonan muri pasobra ni pa haci test di sanger pa evita malesa manera AIDS, tabata tin placa.

Nacionnan Uni a limita na busca placa pa e refugiadonan, cu a bandona nan pais. E parti di poblacion cu a keda atras mester a come for di baki di sushi di militarnan amigo di Chavismo, cu tabata exigi muhenan decente bira prostituta pa haya cuminda.

Awe mundo ta uni pa kibra e poder di arma di e union socialista. No ta cu spada ni ehercito mundo ta confronta Nicolas Maduro y su grupo, pero cu e balornan mas grandi hancra den e esencia di Derechonan Humano di democracia.

Artistanan, cantantenan, figuranan publico internacional cu no ta parti di escenario politico, ta reuni cu dirigentenan, organisacionnan y sostenedonan activo pa cu canto y balentia exigi e regimen destructor socialista di Nicolas Maduro pa pone un fin na e drama di Chavismo y debolbe Venezuela e democracia cu el a destrui pa asina e Venezolano por haci uzo di derechonan humano cu socialismo no conoce.

Historia ta ser skirbi awe na Venezuela, despues cu na tanto pais prueba a ser duna cu mester duna un contenido nobo pa union di nacionnan cu mester ta arbitro  na defensa di bienestar humano den realidad.

Cu introduccion di e prome matutino di Aruba, nos fundado Jossy Mansur a entrega Aruba e palanca di democracia cu ta prensa liber. Awe nos ta uni cu alma democratico di Venezuela y e lucha historico pa trece un cambio na mundo y fin na abusa contra e ser humano.

 

- Advertisement -

DUNA COMENTARIO

Please enter your comment!
Please enter your name here