Home Editorial Editorial: Berdad ta e regalo pa Aruba riba Dia di San...

Editorial: Berdad ta e regalo pa Aruba riba Dia di San Valentin

48
0
SHARE
- Advertisement -

“Berdad nunca a perhudica ningun hende,  ningun causa ni ningun nacion.”  Esaki tabata e punto di salida di DIARIO for di momento cu nos fundado Jossy Mansur a entrega Aruba su prome matutino como arma esencial den e lucha pa Status Aparte.

Awe Aruba ta confronta otro crisis grandi cu por deshaci di tur loke Aruba a crea den su historia. Integridad y siguridad di e pais, ta basa riba e posibilidad pa Arubianonan comprende loke ta pasa y asina opina pa por sostene pasonan responsabel cu ta ser tuma na bienestar di e pais.

Na e momentonan aki preferencia personal, politico of cualkier otro base partidista mester perde prioridad pa Aruba a base di berdad por enfrenta e situacion serio cu e ta enfrenta y por sigui e riba e caminda di recuperacion.

Awe cu nos ta celebra Dia di San Valentino, Dia di Amor, berdad ta loke nos mester presenta na pueblo, cu ta biba den momentonan di angustia pasobra tur hende ta hopi consciente di e situacion den region y na Aruba.

DIARIO a honra su compromiso cu Aruba cu no a ser confronta di sorpresa cu loke a pasa na Venezuela y tin su resultadonan pa Aruba. A base di informacion profesional, investigacionnan profundo, analisis di tur suceso local y mundial, contactonan internacional y conocemento di politica, economia, mundo financiero y diplomatico local y mundial, DIARIO a pone Aruba na haltura di loke por pasa y a pasa.

Awe a base di berdad nos ta defende nos informacionnan y nos trabou y nos ta entrega Aruba mas sosten pasobra un pais cu no conoce berdad, no por defende su economia, su comercio cu ta fuente di su bienestar na un pais liber.

Awe DIARIO ta halsa e balor di e pueblo di Aruba, di e suela natal di hendenan cu curashi cu a bisa “si” na un destino liber, pa sigui informa Aruba a base di berdad. Pa Aruba sali for di e abismo economico y financiero den cual el a cay durante casi un decada te 2017, e mester bandona e mundo di fantasia cu a ser pinta. Aruba mester kita bista for di e promesa di un recuperacion economico cu 15 porciento cu tabata un promesa falso y habri caminda pa un futuro nobo.

Aruba mester defende propositonan empresarial a base di un comercio liber pa garantisa e proceso democratico cu ta alma di bienestar y progreso di Aruba. Profetanan falso cu kier sigui sconde e berdad  amargo y cruel di comunismo cu hasta na Union Sovietico a cay for di siglo pasa, lo ser contraresta cu berdad pa asina nan no abusa e dolor di e pueblo Venezolano pa trata di kibra bienestar di Aruba.

Na 1982 ora pueblo di Aruba tabata enfrenta e momento mas crucial den su historia, Jossy Mansur a entrega su talentonan, su bienestar propio, su bida na su pais. DIARIO a bira simbolo di poder di comunicacion ora pueblo ta lucha pa su bienestar.

Awe Dia di San Valentin, dia di amor tambe pa nos patria cu mester di nos, DIARIO ta honra Jossy Mansur y ta entrega berdad na e pueblo di Aruba pa e por sigui lucha pa su libertad y integridad riba tur tereno.

Ban uni den amor patriotico pa nos pais Aruba cu hamas por ser perhudica dor di berdad, su arma mas poderoso.

- Advertisement -

DUNA COMENTARIO

Please enter your comment!
Please enter your name here