Home Editorial Editorial: Carnaval y e sosten positivo di autoridad y pueblo

Editorial: Carnaval y e sosten positivo di autoridad y pueblo

30
0
SHARE
- Advertisement -

Na e momento cu DIARIO alcansa casnan na Aruba awe, e pais ta prepara pa e fin di siman di Carnaval.

E ambiente cu cual Aruba ta drenta e dianan tradicionalmente festivo pa Aruba, ta diferente na añanan anterior. Preocupacion grandi ta existi a base di e situacion na Venezuela, cu ta afecta e situacion economico y social na Aruba.

Ya por nota cu e presencia na luganan cu pueblo den e temporada di Carnaval ta busca pa comparti e temporada unico, ta menos. Sinembargo tin factornan decisivo pa indica cu tanto autoridad local como e pueblo di Aruba kier demostra nan sentido di responsabilidad.

No ta facil pa den e situacion actual, pensa “Carnaval”.  Por lo general Aruba for di un distancia grandi tabata tuma nota di sucesonan internacional cu poco of ningun importancia directo pa Aruba. Manera ta pasa cu tur desaroyo negativo, ora nan ta leu for di cas, nan no ta crea e peso cu Aruba a experencia den porta di Venezuela y e lasonan cu tin cu e pais.

Tin lasonan familiar, lasonan nobo cu Venezolanonan cu a huy di nan pais y busca refugio na Aruba. Ademas economia di Aruba ta afecta pa e proyecto di refineria na diferente forma importante.

Pa celebra carnaval 2019, Aruba mester di pensamento y aspectonan positivo pa sostene su bienestar y asina por yuda tur pueblo den problema.

Na prome luga ta resalta dos factor: e miedo cu sigur prome cu Carnaval, condicionnan por a ser crea cu ta afecta e cantidad di turista cu ta bin Aruba, no a bira berdad. E situacion mundial no a conoce e extremo cu a teme durante e dianan tan importante pa Aruba cu ta den un crisis financiero grandi.

Biahe internacional  no a ser afecta ya cu e instabilidad riba mercado petrolero no a culmina y no tin un impacto riba prijsnan di pasashi. Tampoco, gracias na Dios, e explosion politico den nos region no tabata tin te awor, un angulo internacional cu lo a afecta Aruba y sigur e sector di turismo.

Esey ta haci cu nos unico sector productivo, e unico pilar economico di Aruba, cu ta turismo, ta drenta epoca di carnaval segun proyeccion.

Otro factor importante ta, cu autoridad a asumi su responsabilidad y den esaki sigur mester duna un elogio na Minister di Husticia, cu a sa di dirigi un maneho cu a haci polis visibel y prepara pa defende e ciudadano.

E hecho cu continuamente por mira polis activo riba Aruba pa frena kiebra di ley, ta sumamente importante den e ambiente di fiesta.

E crisis financiero y economico di Aruba na 2018, a crea e temor cu gruponan di Carnaval lo no por a honra expectativa. Aruba ta conoci pa e produccion di gruponan di Carnaval, produccion di su artistanan musical y e ambiente cu pueblo ta forma.  Esaki ta bira realidad a base di sosten comercial y personal di pueblo cu te awor ta motibo di un aplauso grandi di nos parti.

Nos a menciona e Minister di Husticia cu e tarea mas grandi di percura pa poblacion tin e sentido di siguridad. Nos mester menciona sigur e Ministro Presidente di Aruba, cu mester dirigi e barco Aruba den un tempo sumamente dificil y sigui evita cualkier aspecto cu por ta contra e bienestar general di Aruba. Durante e temporada di Carnaval, nos mester a asumi nos responsabilidad y permiti pueblo gosa di e temporada, mientras nos tabata vigila tur informacion. Mientras e fin di siman di Carnaval ta yega mas cerca, awe informacionnan mundial ta confirma e forma responsabel cu DIARIO a cumpli cu su compromiso cu Aruba.

Cu fe nos ta entrega nos problemanan na nos Creador y nos ta sigui mantene responsabilidad pa un celebracion sano.

- Advertisement -

DUNA COMENTARIO

Please enter your comment!
Please enter your name here