Home Editorial Editorial: Cu berdad riba mesa nos por planea futuro!

Editorial: Cu berdad riba mesa nos por planea futuro!

76
0
SHARE
- Advertisement -

Ta di lamenta cu un situacion extremo mester a habri porta pa Aruba cera conoci cu e berdad di e realisacion di e proyecto CITGO na Aruba.  Awor cu realidad a ser presenta na Aruba, nos por sigui planea futuro riba un base sano cu lo yuda crea un base economico stabiel pa Aruba.

Stabilidad tabata completamente perdi na Aruba cu den su cifranan oficial no por a menciona CITGO mas debi na e falta di informacion cu Gobierno y instancianan oficial mes tabata tin riba e proyecto, cu a ser introduci como un formula magico pa Aruba pero cu mundo a yama aventura.

Pa por a realisa nos trabou como matutino di Aruba, nos mester a presenta pruebanan di e realidad cu tabata mustra claramente cu for di momento cu e acuerdo a ser firma, e futuro di CITGO tabata scur.

DIARIO no tabata tin como meta pa bati alarma falso ni causa panico na Aruba. Nos a para firme sabiendo cu berdad lo presenta su mes y ta lamenta cu ta den dolor profundo di henter mundo, confirmacion a ser duna di loke DIARIO a presenta.

Rapportnan di instancianan oficial semper a papia un idioma cla y a mustra cu tabata imposibel pronostica futuro economico di Aruba sin conocemento di loke futuro di e proyecto refineria lo a entrega Aruba.

Ya na 2017, Hulanda a exigi pa cuminsa scrap refineria di CITGO for di cifranan oficial di Aruba y a permiti solamente presentacion di cifranan mara na e benta di productonan petrolero riba mercado local. Hulanda a confirma e riesgonan pa cual el a adverti hunto cu henter mundo for di 2014 ora e contracto a ser firma.

Na 2018, Gobierno Wever-Croes a entrega Parlamento di Aruba, e representacion di Pueblo, e documentonan cu nunca Parlamento di Aruba a haya oportunidad di studia debidamente na 2016 despues cu Gobierno anterior a firma e acuerdo cu Maduro.

CITGO nunca a demostra e responsabilidad di tene Aruba na haltura di loke por a spera. Tur cifra cu DIARIO a entrega Aruba di situacion di PDVSA, Venezuela y CITGO tabata a base di investigacionnan cu DIARIO tabata haci y cu a demostra entre otro cu Rusia tabata tin casi mita di e compania cu na 2018 tabata den man di compania priva cu Venezuela tabata debe.

Documentonan cu mester a proba e factibilidad economico y financiero di e proyecto na Aruba no tabata presente, pero si tur informacion financiero necesario pa papia di un proyecto fantasma, imposibel pa ser realisa.

Awe Aruba ta ser confronta cu un realidad, cu lo tabata pio, si no a scrap CITGO for di nos calculacionnan nacional y tambe for di cifranan oficial di entre otro Banco Central.

Aruba mester planea un futuro nobo. Aruba tin posibilidad pa haci esaki si Aruba duna oportunidad na capitannan di industria di Aruba, cu ta comercio y expertonan economico y financiero di nos pais den sector priva y publico.

Comercio di Aruba a pone un bon plan pa crea un pilar nobo pa Aruba, manteniendo petroleo como un di e productonan cu por haci uzo di facilidadnan comparabel cu e zona comercial di Panama.

Tempo di sigui un soño a pasa. Cu animo nobo Aruba mester haci uzo di oportunidadnan pa diversifica su economia y percura pa un crecemento realistico.

Cu berdad riba mesa, nos futuro ta presente. Mester cuminsa ehecuta proyectonan factibel pa Aruba cu a conoce berdad.

 

 

 

 

- Advertisement -

DUNA COMENTARIO

Please enter your comment!
Please enter your name here