Home Editorial Editorial: E situacion actual ta rekeri sano huicio y responsabilidad

Editorial: E situacion actual ta rekeri sano huicio y responsabilidad

44
0
SHARE
- Advertisement -

Aruba despues di un aña den cual e situacion tabata casi completamente dirigi riba e debe nacional y su resultadonan, ta ser confronta cu un crisis mucho mas severo. Sorpresa e no ta pasobra DIARIO a asumi su responsabilidad y for di Augustus ora Hues na Merca a crea hurisprudencia cu a expone e realidad di CITGO, continuamente a informa Aruba di e problema serio.

Den e tempo cu companianan cu Venezuela, PDVSA, CITGO ta debe sumanan exorbitante, DIARIO a splica Aruba e berdad di CITGO cu luho di detaye.

No tabata facil pa nos cumpli cu nos compromiso pa informa Aruba, pero nos deber pa guia nos pais den temponan crucial nunca a ser poni un banda. Na mes forma cu nos a guia Aruba pa su Status Aparte, den e crisis despues cu Lago a cera na entrada di Status Aparte, na 2018 DIARIO a asumi su responsabilidad y a pidi tur instancia envolvi pa laga sano huicio prevalece y tuma accion pa evita cu e aventura di CITGO por a explota den cara di Aruba.

Cu dolor awe nos ta mira con tur nos informacionnan a ser confirma pa otro crisis enorme cu Aruba mester confronta. Por papia di un crisis cu ta exigi preparacion extraordinario di un pais cu a ser hiba atrobe na un crisis mundial manera e pais no a conoce for di tempo di Segundo Guera Mundial.

Mescos cu tabata e caso e tempo, e refineria di Aruba a crea problema serio pa Aruba cu a mira torpedo dilanti su porta. Den e desaroyonan na Venezuela caminda un guera friu a rementa, un refineria ta haci Aruba parti di e confrontacion internacional. Mas ainda, a base di un acuerdo firma cu e regimen di Nicolas Maduro cu ya a entrega mita di CITGO den man di Rusia, Aruba ta den un crisis internacional mucho mas grandi cu solamente e peliger cu e ta entrega petroleo na aliadonan manera a pasa den Segundo Guera Mundial.

DIARIO no por a sconde berdad pa Pueblo di Aruba cu awe ta e victima grandi di e crisis mundial, den cual e interes Ruso ta na Aruba mes.

Nos a cumpli cu nos responsabilidad periodistico y manera ya bisa, awe mester guia Aruba a base di banconan di informacion cu nos a compila, investigacionnan pisa cu ta haci cu nos no ta depende di ningun influencia di ningun banda pa nos por informa nos pueblo na forma honesto manera democracia ta exigi.

Awe Aruba ta exigi di tur sector, di tur Arubiano, pa laga sano huicio prevalece y pa demostra responsabilidad pa e pais aki. No presenta informacion cu no ta cuadra cu berdad, pero tampoco presenta informacion cu ta stroba uza e hermentnan cu nos tin den man pa asina yega na solucionnan.

Nos ta den un situacion cu ningun hende por bisa kico lo pasa den e proximo 24 oranan. Nos mester ta honesto cu loke a conduci mundo na e conflicto aki. Mal maneho di Venezuela, e pensamento socialista cu ta abusa di instancianan democratico cu ta exigi entre otro basenan social den reglanan di un comunidad.

E solucion cu tin actualmente ta, cu mester acepta cu e proyecto CITGO a faya for di 2017 y cu CITGO no a cumpli cu loke e mester a haci na Aruba. No ta Merca a manda CITGO yega na un acuerdo cu Aruba ni ta Merca a manda CITGO crea debenan di mas cu 6 Biyon na CITGO na Merca, cu a bira e baca di lechi di e gobierno Venezolano.

CITGO ta gana placa na Aruba y DIARIO a bisa cu e placa aki mester ser uza pa cumpli cu e debernan di CITGO cu Aruba no por ser teni responsabel pe.

DIARIO ta para ariba su exigencia pa e plan di emergencia cu mester a ser diseña ora a firma un contracto beneficioso pa CITGO, den cual Rusia tabata tin interes directo, awor mester mira luz.

Placa di CITGO mester ser uza pa scapa Aruba for di problema y DIARIO ta mantene su postura cu e lo defende cu tur prueba documenta cu e tin, cu no por permiti e grupo di Nicolas Maduro sigui saca placa for di Aruba ni haci ningun palabracion mas pa Aruba.

Ni comerciantenan di Aruba, ni departamentonan di Aruba, ni trahadonan di Aruba ta responsabel pa e situacion actual cu a origina na Venezuela.

DIARIO ta haci un yamada urgente pa e plan di emergencia mira luz pa asina Aruba tin direccion den un crisis mundial.

Nos lo sigui cumpli cu nos compromiso y deber periodistico.

- Advertisement -

DUNA COMENTARIO

Please enter your comment!
Please enter your name here