Home Hudicial Empleado cu a horta renchi for di pakete na Post Aruba dilanti...

Empleado cu a horta renchi for di pakete na Post Aruba dilanti Hues

511
0
SHARE
- Advertisement -

ORANJESTAD (AAN) – E homber Arubiano R.St.J. ayera mainta a presenta dilanti Hues pa duna cuenta pa e casonan penal cu Ministerio Publico a cuminsa contra dje.

Fiscal ta acusa R.St.J. di desfalco riba 23 Augustus 2016 na Post Aruba N.V. y di menaza un homber F. riba 7 Juni 2017. 

DESFALCO Y MENAZA

Hues a mustra cu R.St.J. e tempo ey tabata traha na Pos Aruba N.V. y via camera a mira con el a coy un renchi for di un pakete di post. El a admiti di a haci esey y cu el a duna e renchi bek. Segun R.St.J. e temporada ey e tabata den situacion dificil. Ta asina cu el a wordo kita.

Dia 7 Juni 2017, homber F. kende ta esun cu a mira R.St.J. riba camera, a haci denuncia cu R.St.J. lo a menaza cu lo tira. Segun F., e y algun persona tabata para dilanti Post Aruba N.V. y R.St.J. a pasa den un auto y lo a saca man for di auto mustrando forma di pistol y a bisa cu bala lo cay. R.St.J. a bisa Hues cu e no a haci’e pa F. sino pa un grupo di trabou cu tabata para ey banda cu cada vez nan sa haci chansa cu otro. Segun R.St.J., aparentemente F. lo a kere cu ta cun’e pero no ta asina. Segun R.St.J. el a bisa Polis cu e no a menaza F. y cu el a topa cu F. na un lugar publico y cumind’e. Fiscal a remarca cu tabatin un Tomzitting pero R.St.J. no a presenta. 

EXIGENCIA DI FISCAL

Fiscal a bisa cu e ta haya legalmente proba cu R.St.J. a coy E renchi for di un pakete. Pa loke ta e menaza, R.St.J. ta bisa cu el a haci esey cu un grupo di trabou para ey banda. Pero segun F. y esnan para cun’e, no tabatin ningun hende mas para ey banda. Fiscal a bisa cu e no ta kere R.St.J. Pa cu e castigo, Fiscal a bisa cu e ta tene cuenta cu ta promer biaha cu R.St.J. ta cay den man di husticia. Fiscal a remarca cu si R.St.J. a presenta na Tomzitting, lo e no mester a bin Corte awor. Fiscal a exigi trabou pa comunidad di 50 ora y si no cumpli cu esaki e lo mester bay 25 dia sera. 

DEFENSA

Abogado mr. Canwood a bisa Hues cu R.St.J. a admiti di a horta e renchi. Pa loke ta e menaza, e abogado a mustra cu R.St.J. ta desmenti cu el a menaza F. Segun e abogado, nunca su cliente a wordo yama pa Polis of interoga riba esey. R.St.J. a haci chansa cu su amigonan para pafor. E no tabata sa mes cu F. tabata para eybanda. E abogado a mustra cu R.St.J. ningun momento a haya prohibicion pa no bay mas Post Aruba pa busca su señora. Esey ta mustra cu no tabatin un menaza manera F. ta kere. Tambe e abogado a mustra cu R.St.J. tur dia ta topa cu F. na school unda nan ta busca nan yiunan y nan ta cuminda otro normal. E abogado a pidi Hues pa no duna castigo pa e menaza. El a splica cu awor R.St.J. tin un bon trabou y si bay duna castigo lo bay perhudik’e. 

SENTENCIA

Hues a sera tratamento di e caso y a dicta sentencia di biaha. Hues a bisa cu e ta haya e desfalco y menaza legalmente proba. Hues a bisa cu e no ta kere e declaracion di R.St.J. cu a haci chansa. Tin mas hende cu a mira R.St.J. Hues a bisa cu e ta tene cuenta cu circumstancia personal y cu awor R.St.J. tin trabou atrobe. Hues a confirma exigencia di Fiscal y a condena R.St.J. na 50 ora di trabou pa comunidad y si e no cumpli cu esey, e lo mester bay 25 dia sera.

- Advertisement -

DUNA COMENTARIO

Please enter your comment!
Please enter your name here