Home arte y espectaculo Foto-Documentalista di Switch Foundation a destaca cu su potret durante concurso “Faces &...

Foto-Documentalista di Switch Foundation a destaca cu su potret durante concurso “Faces & Nature”

220
0
SHARE
- Advertisement -

Rafael Barragán orguyoso di por sensibiliza otro sernan humano pa medio di imagennan

ORANJESTAD  (AAN):  Durante Aruba Art Fair 2018, un di e actividadnan cu nan a ofrece na e comunidad tabata un concurso di fotografia: “Faces & Nature”.

Esaki tabata e di dos edicion y durante esaki, Rafael Barragán, Fotografo y Documentalista Social, a dicidi di participa cu un retrato cu el a haci di un señora di San Nicolas cu yama Dina Vorts.

Barragán, kende a traha como foto-documentalista di e reconocido fundacion cu enfoke social “Switch Foundation”,  a indica cu e concurso tabata habri pa publico y mas di 150 potret a participa  y a wordo evalua. Na final a scoge 10 potret: 5 potret pa “Faces” y 5 potret pa “Nature”.

E potretnan aki a wordo exponi na e galeria Artisa, ubica na San Nicolas den e luna di December durante e “San Nicolas Experience”.

Esnan cu a bishita e galeria a haya oportunidad di vota pa e potret di nan preferencia. Ningun potret tabata tin e nomber di e autor. Nan a wordo identifica cu un number y e publico simplemente tabata vota segun e number ariba e potret.

E potret di Rafael ta esun cu a haya mas voto pa loke tabata e categoria di “Faces”. “Esaki ta yena mi di alegria pasobra no tabata tin un hurado meymey, sino cu tabata e persona mes, e comunidad, kende a elegi mi potret como e imagen cu mas a impacta nan y cu mas a mustra e identidad di e arubianonan”, e comunicador social a expresa.

Segun Rafael Barragán, esaki p’e ta un echo importante. “Ami cu ta un imigrante na Aruba, por tin e privilegio di acerca na e comunidad arubiano y di por sensibiliza otro personanan cu e imagen aki ta yena mi di orguyo”.

El a agrega cu e organizador di e evento, Tito Bolivar, a laga sa cu e expo aki di “Faces & Nature” lo sali di Aruba y cu lo wordo exponi na Hulanda, Miami y Colombia. “Esaki ta yena mi di emocion tambe pa dos motibo clave. E echo cu Aruba ta mustrando e identidad di su isla pa medio di e imagennan capta door di esnan cu ta participa den e concursonan aki, buscando e sensibilidad diario di e arubiano. E di dos motivo ta como imigrante venezolano mi por  representa Aruba na otro pais, ya cu mi ta sinti parti di e comunidad y cu e comunidad ta aprecia mi trabao”, a manifesta.

TRABAO NA SWITCH FOUNDATION

Rafael Barragán a yega Aruba varios aña pasa pa traha como parti di e team di produccion di Switch Foundation. For di cuminzamento, su fundadora, Paula Nahr a wordo impacta pa e trabao di Rafael. “El a wak parti di mi “portfolio” ariba internet y el a wak den mi fotografianan e sensibilidad social cu tabata tin mester den e fundacion y cu ta permiti logra un interaccion cu otro persona pa medio di e imagen”.

Barragán ta un apasionado di e fotografia, pa medio di cual por transmiti emocionnan.

Un potret por transmiti miles di storianan, cu un simpel bista, pa medio di e paña di e persona of  atravez di nan entorno. Esey ta e magia di e fotografia y loke e documentalismo y periodismo a pone mi busca, el a manifesta.

“Mi ta gradici Switch Foundation y e organizadornan di ‘Aruba Art Fair’ pa permiti mi mustra mi imagennan, pa permiti mi forma parti di e comunidad”.

Desde cu Rafael a yega Aruba el a traha incansabelmente cu Switch Foundation haciendo entrevistanan y bishitando fundacionnan. “Esey a yuda mi siña Papiamento casi di biaha, at least pa un par di minuut”, a expresa.

“Como periodista, despues di a traha den diferente medio, e fotografia a yega na mi persona formalmente y poco poco tur cos a alinea pareu. Periodismo cu Fotografia y asina mi a bira un reportero grafico of un “photo journalist”.

Esey ta precis loke Paula Nahr di Switch Foundation a wak den mi trabao, a bisa. E poder di acercamento y e poder di humanidad y di logra cu otronan por identifica nan mes cu e imagen.

Mester remarca cu Rafael Barragán a participa den e produccion di varios documentario hunto cu Switch Foundation cu a causa hopi impacto na Aruba. E ultimo ta un proyecto cu ta hayando hopi acogida na nivel regional y internacional y esaki ta ‘Promesa Falso’ cual ta enfoca riba e tema di trafico humano.

“Definitivamente esaki ta di e proyectonan mas importante cu mi a asumi den mi bida. Conta cu e colaboracion di e team di Switch Foundation tabata algo hermoso ya cu ta trata di un tema hopi sensibel y bastante delicado”.

“Promesa Falso” a resulta di ta un documentario cu un trabao fotografico exkisito y esaki ta danki na e excelente trabao di Paula Nahr, su tremendo team, y cu Rafael Barragán como foto-documentalista.

Por aprecia e documentario aki pa medio di Youtube: Switch Foundation.

- Advertisement -

DUNA COMENTARIO

Please enter your comment!
Please enter your name here