Home Social Fundacion VeneAruba Solidaria cu accion humanitario pa yuda Venezuela  

Fundacion VeneAruba Solidaria cu accion humanitario pa yuda Venezuela  

132
0
SHARE
- Advertisement -

Ya caba 1100 caha ta bayendo Corsow!

ORANJESTAD (AAN):  Presidente di e Fundacion VeneAruba Solidaria, Sra, Hernandez a duna di conoce den un rueda di prensa cu nan ta invitando pueblo di Aruba, comunidad henter y tambe e fundacionnan pa ta parti di un evento cu nan ta bay tin pa uni na e ayudo humanitario cu ta bay tin Corsow como centro di acopio.

Hernandez a indica cu Aruba no por keda afo y a haya e invitacion formal dui Venex Corsow cu ta e fundacion principal pa esaki tur esaki posibel na Corsow. Tin e probacion di Hulanda pa Corsow ta un di e tres centronan di ayudo humanitario pa Venezuela den Caribe.

E fundacion a haya e invitacion y esaki a wordo acepta cu man habri pa asina yuda e personanan na Venezuela. “E biaha aki ta un yamada mundial y nos no ta bay keda afo”, a remarca.

E yamada ta pa cada persona cu por colabora cu esaki por haci’e. Ta bay tin centro di acopio. Isla Pop ta bay ta un. Eynan lo tin un box unda por laga cuminda y tambe remedi. No ta acepta paña. Tin un lista largo di insumonan cu por hiba y tambe di otronan cu no ta wordo acepta, a bisa.

Segun Hernandez, nan ta bay acerca laboratorionan y boticanan pa wak con nan tambe por yuda den esaki. Tin un lista di e medicamentonan cu ta wordo solicita door di Asamblea Nacional di Venezuela cu a haci un investigacion na tur e hospitalnan na Venezuela.

El a remarca cu e remedinan contra cancer, anti-convulsivonan, lechi den bleki pa e babynan, etc. esey ta esunnan mas importante pa awo y sigur e remedinan pa personanan cu tin malezanan cronico.

Mester di cuminda pa e personanan cu ta ariba caya  of cu no tin acceso na cuminda.

E ayudo no tin un limite. Ta trata di un colaboracion cu tur e paisnan ta haciendo.

Ya caba 1100 caha ta bayendo Corsow pa medio di un actividad cu e fundacion mes a haci y cu a logra colecta diferente articulo na December.  Tin otro 200 caha cu a bay caba.

Awor door cu esaki tin di haber cu un peticion formal, un carta lo bay na tur organizacion y empresa pa wak ken por yuda.

Tambe tin un chatgroup di boluntario pa esnan cu kier brinda un man. Ta formando comisionnan pa traha di un manera structura y pa tin un transparencia total, a laga sa.

A agrega cu pa loke ta donacionnan di placa, esakinan lo bay directamente pa medio di Venex Corsow. E fundacion aki na Aruba no lo handle cu placa. Kiermen ta posibel pa haci donacion di placa atravez di e cuenta di banco di Venex Corsow. Pa mas informacion por manda un email na venearubasolidaria@gmail.com

Hernandez a bisa cu parti di e ayudo humanitario ta bay cuminza drenta Venezuela dia 23 di Februari. Riba dia 23 mes nan ta bay tin un actividad grandi aki na Aruba unda tur hende lo por yega pa haci donacion, Lo ta un lugar priva, a enfatiza.

Banda di esaki lo tin lugarnan specifico unda lo pone un caha identifica, Hernandez a indica. Eynan por pasa laga e remedinan of e cuminda. E lugarnan cu lo tin e cahanan aki ta: Beach Tenis Aruba, Paseo Herencia, Isla Pop, Twenty 2 Gelato and Coffee, Bontires, Caribbean Print Center, Caliente 90.7 FM y Coco Plum Restaurant.

 

 

 

- Advertisement -

DUNA COMENTARIO

Please enter your comment!
Please enter your name here