Home Social Habri bo curazon

Habri bo curazon

24
0
SHARE
- Advertisement -

Violencia ta e perversidad di mas tragico di un curazon. E curazon a keda duna na hende pa stima, pa pordona i pa e keda habri  pa otro. Pero curazon su espacionan infinito por keda yena tambe cu scuridad di egoismo of cu polvora di soberbia. E ora ey un chispa so ta suficiente pa hacie explota den violencia.

E caracteristica misterioso di curazon ta inagotable, esta locual e tin, e ta hasie bira inagotabel, ta habri pe espacionan semper nobo, ta troke den un fuente. E por hasi esey cu amor, como tambe cu odio; cu misericordia of cu violencia; cu pordon of cu venganza. Locual ta drenta den curazon, mesora ta bira inagotabel, ta keda eterniza, ta bira un pasion cu ta exigi sirbishi y entrega di henter un bida.

Pesey mester tin un warda na porta di curazon, pesey hende no por laga cualkier sentimento hospeda den nan curazon. Pasobra tur cos ta cuminza aya, den curazon. Aya ta cuminza amor y odio, aya ta nace santidad y hipocresia, aya, den curazon ta cuminza tempo di paz of tempo di guera.

Hende cu a entrega nan curazon na scuridadnan di rencor, venganza of odio, lo entrega nan bida den sirbishi di e scuridadnan aki, lo troca nan alma den un monster insaciable di sanger, di lagrima y di dolor di otro. Locual nan a haya, pa ta fuente di bida y fuente di amor, nan a troke den un pos di lodo sin fondo.

Un curazon ta pa stima, y si e no ta stima e no ta curazon mas, ta pesey tin hende sin curazon. Un curazon bashi di amor ta troca den un bestia, cu ta devora bo for di paden, den un colebra of den un scorpion, of den un lobo, of simplemente den un baranca. Cada hende ta nace cu un curazon habri y foi chikito ta cuminza yene cu sentimentonan. Feliz esun cu por yene cu amor, cu gratitud, cu generosidad, cu humildad, cu paz.

E simianan aki ta inmortal, nan lo tira raiz mesora y lo troka e kurason ei den un hofi, den un kosecha abundante, den un fiesta sin fin. Pero tambe e simianan di skuridat ta inmortal. Nan tambe sa tira rais den kurason ku ta risibi nan. Mesora nan ta krese bira grandi, bira gigantesko, ta troca curason, den un frega di wowo, den un mondi, den sumpiña, den un suicidio cu no ta caba.

Curazon tin contesta pa hopi preguntanan sin contesta. Si bo sa mira den dje, bo sa di con bo ta rabia, of tristo, of feliz, of desespera. Si, mira bo curazon, mira kico ta crese den dje. Bo bida tin smak di e frutanan cu bo curazon ta produci, bo bida tin e fragancia di e yerbanan cu ta crece den bo curazon, bo bida, mescos cu bo curazon ta un hofi of un mondi. Mira bo curason, wak bon su plantashinan.

Kico bo ta cultiva den su paden? Locual bo ta cultiva, tesey lo bo cosecha! Habri bo curazon pa rayonan di amor. Nan ta asina misterioso cu mesora nan ta kima e mal yerba y na mes tempo ta fortalece y ta hasi crece simianan di bondad. Habri bo curazon pa rayonan di amor y nan lo troca su baranca den un hardin yen di flor.

Habri bo curazon pa rayonan di amor y nunca mas scuridad lo drenta den dje! Den rayonan di amor, felicidad lo bati na bo porta. Bo curazon lo recupera su sentido di bida. Ta pesey el a keda duna na bo, pa bira un fuente di amor, di felicidad, di paz! Si, e fuente di bo soñonan ta den bo! Yene cu bo deseonan y pronto lo bo mira con nan ta crece y bira realidad. Invita Dios den bo curazon, e ora ey E lo hasie omnipotente.

Invita Dios den bo curazon, anto E lo transforme den paraiso, den shelu mes! Laga Hesus drenta den dje, pa bo sinti con oceano di amor ta inunda bo ser.

 

- Advertisement -

DUNA COMENTARIO

Please enter your comment!
Please enter your name here