Home Hudicial Hopi empresario a haya castigo combina y multa pa a paga ex-minister...

Hopi empresario a haya castigo combina y multa pa a paga ex-minister Paul Croes pa permiso

307
0
SHARE
- Advertisement -

ORANJESTAD (AAN): Diabierna mainta Hues a haya cu 9 empresario a haci nan mes culpable di cumpra ex-Minister Paul Croes. E mayoria a haci donacion na e stichting di Paul Croes pero Hues ta haya cu esaki ta un forma di cumpra e ex minister pa asina regla dispensacion di permiso pa trahadornan.

   CASTIGO DI MULTA:

Hues a mustra cu Jairo Wever a pidi ayudo na ex minister Paul Croes pa haya trahadornan di exterior pa Valero. Hues ta haya cu e hecho cu riba peticion di Paul Croes, Wever a cumpra carchinan na 1500 florin pa e concierto, esaki ta cumpramento. Hues a mustra cu Wever a bisa cu e no kier daña e relacion cu e ex minister pesey el a cumpra e carchinan. Hues ta haya cu Wever a haci donacion pa haya ayudo e momento y pa den futuro. Hues a baha e castigo cu Fiscal a exigi cu ta encera trabou pa comunidad y castigo di prison condicional. Hues a bisa cu pa e mayoria di e empresarionan el a castiga cu un multa. Hues a condena Wever na un boet di 5 mil florin di cual 2500 florin ta condicional cu un tempo di prueba 3 aña.

Pa loke ta e Chines, Chunyan Liang, Hues a bisa cu Liang a haci donacion di cahanan di cerbez na Paul Croes. Hues ta haya cu Liang tabata depende di e ex minister pa haya permiso siendo cu por haya Arubiano mes pa e trabou aki. Hues a condena Ling na 5 mil florin di boet di cual 2500 florin ta condicional cu un tempo di prueba 3 aña.

Hues ta haya cu e Chines Hang Chang Fung tambe tabata haci donacionnan pa haya permiso. Hues a condena Fung na 5 mil florin di boet di cual 2500 florin ta condicional cu un tempo di prueba 3 aña.

E empresario Fernando Latoracca, Hues a mustra cu Latoracca a paga mil florin pa ticketnan di concierto pa haya ayudo pa permiso pa yuda un dama. Hues a bisa cu e no ta considera e mil florin un donacion. El a mustra cu tin yamada cu ta mustra cu despues di a pidi pa haya permiso el a yama Paul Croes pa busca e cheque. Latoracca a wordo condena na 5 mil florin di boet di cual 2500 florin ta condicional cu un tempo di prueba di 3 aña.

Pa loke ta Juan Vasquez Lopez, Hues ta hay’e culpable. Hues a mustra cu Vasquez Lopez a yama ex minister Paul Croes pa haya hende pa traha. E secretaria di Paul Croes, Selma Arends, a yama bisa Juan cu mester paga pa e dos productonan. Juan a papia di trahadornan pero Selma a bisa cu nan ta papiando na telefoon. Vasquez Lopez a haci donacion di 2500 florin na stichting di Paul Croes despues cu e dispensacion di dos permiso a keda realisa. Hues a condena Vasquez Lopez na 5 mil florin di boet di cual 2500 florin ta condicional cu un tempo di prueba di 3 aña.

Hues a bisa cu Marie Vernais como director di compania a haci cita cu ex minister Paul Croes pa haya permiso. Paul Croes a haci 8 dispensacion di permiso. Un dia despues tabatin combersacion entre Trimon cu Vernais caminda Vernais a priminti di haya votonan pa Paul Croes. Hues ta considera esaki un forma di cumpramento. El a condena Vernais na 5 mil florin di boet di cual 2500 florin ta condicional cu un tempo di prueba 3 aña.

Luis Ochoa Ramirez director di Tierra Colombiana, Hues ta haya culpable di a cumpra ex minister Paul Croes. Hues a mustra cu Ochoa Ramirez a haya dispensacion di permisonan y Paul Croes a pidi donacion di bebidanan y tambe pan di jamon pa un evento politico. Hues a conden’e na 5 mil florin di boet di cual 2500 florin ta condicional cu un tempo di prueba 3 aña.

E Franklyn Bareño di Bright Bakery, Hues ta haya culpable di a cumpra ex minister Paul Croes. Hues a bisa cu Bareño a admiti di a haci donacion na e stichting di Paul Croes na tres occasion. Hues ta considera esaki cumpramento di Paul Croes. Hues a bisa cu Paul Croes a haci diferente dispensacion. Segun Hues, tabatin yamadanan caminda Bareño tabata insisti pa regla dispensacion di permiso. Hues a bisa cu aunke cu Bareño ta haci hopi donacion caritativo pero den e caso aki a desvia door haci donacion pa haya dispensacion di permiso. Hues a conden’e na 5 mil florin di boet di cual 2500 florin ta condicional cu un tempo di prueba 3 aña.

Hues ta haya cu Robert Dalmeijer tambe a haci donacion pa no daña su relacion cu ex minister Paul Croes. Hues a conden’e na 5 mil florin di boet di cual 2500 florin ta condicional cu un tempo di prueba 3 aña.

- Advertisement -

DUNA COMENTARIO

Please enter your comment!
Please enter your name here